РЦИ-Аланийы Сæргълæууæг Сергей Меняйлойы хъæппæрисæй 2021 азы нæ республикæйы астæуккаг скъолаты байгом кодтой кадетты кълæстæ. Æвзонг кадеттæ ахуырты рæстæг зонгæ кæндзысты слестгæнæн, хъазахъхъаг æмæ пъæлицæйаг куыстыты дæсныйæдтимæ. Кадетты кълæстæ арæзт цæуынц, æрыгон фæлтæрæн сæ фидæны дæсныйад равзарыны, профориентацион куыст æмæ профилон уроктæ кæныны мадзæлттæн. Хъомыладон архайды сывæллæттимæ кусынц, отставкæйы чи ис, уыцы афицертæ. Кадетты кълæсты архайынц 5, 10 æмæ 11-æм кълæсты ахуырдзаутæ.
Кадетты ног рæнхъытæм бацæуыны кадджын бон (посвящение в кадеты) алы аз дæр ацæуы Советон Цæдисы Хъæбатыр Петр Барбашовы цыртдзæвæны раз Джызæлы сæрмæ. Ацы хатт дæр та æрбамбырд сты скъоладзаутæ сæ ахуыргæнджытæ æмæ ныййарджытимæ, цæмæй сæ кадджын уавæры айсой кадетты рæнхъытæм. Бæрæгбонмæ æрбацыдысты РЦИ-Аланийы Сæргълæууæг Сергей Меняйло, УФ-йы Слестгæнæн комитеты управленийы цæгатирыстойнаг хайады разамонæг, юстицийы инæлар-лейтенант Валери Устов æмæ РЦИ-Аланийы ахуырад æмæ наукæйы министр Алыбегты Эллæ. Сергей Меняйло арфæтæ ракодта се ‘ппæтæн дæр, æмæ радзырдта, кадетты кълæстæ куыд ахсджиаг сты нæ бæстæйы æппæт регионты дæр, уый тыххæй.
– Абон уæ царды ахсджиаг цау æрцыд. Кадеты рæнхъытæм бацæуынмæ цæттæ стут ардбахæрдмæ. Кæй зæгъын æй хъæуы, æфсæддоны ардбахæрдæй зынгæ хицæн кæны, фæлæ кадеты ардбахæрдæн дæр стыр нысаниуæг ис – Фыдыбæстæ бахъахъхъæныны сæраппонд кæддæриддæр цæттæ уæвын хъæуы. Стæй ма уæ иу хъуыддаг хицæн кæны. Уе ‘мкъласонтæй кадет чи нæ у, уый хи дарыны фæткимæ сымахæн иумæйагæй ницы ис, уыдонæн уынджы цы ‘мбæлы, уый сымахæн – нæ. Æз фыццаг хатт кадетты кълæстæ байгом кодтон Севастополы 2014 азы, стæй дарддæр уыцы хъуыддаг æххæстгонд цыдис. Нæхи республикæйы ма баззад æрмæст Дыгуры æмæ Æрæфы районты байгом кæнын, æмæ архайдзыстæм Ахуырад æмæ наукæйы министрадимæ иумæ уыцы районты дæр ахæм кълæстæ байгом кæныныл. Кадетты кълæсты ахуырдзаутæн уæлдай хицæн уавæртæ ис æмæ уæлæмхасæн ахуырад. Сымах стут прокуратурæ, слестгæнæн комитет æмæ пъæлицæйы фидæны кусджытæ, æмæ уæ размæ бирæ хæстæ æвæрд цæудзæн. Уырны мæ, æнтыстджынæй кæй æххæст кæндзыстут уæ хæстæ нæ бæстæйы сæраппонд,– загъта нæ республикæйы Сæргълæууæг.
Æвзонг кадеттæн арфæ ракодта Валери Устов дæр.
– Æз стыр бузныг зæгъын Сергей Меняйло æмæ УФ-йы Слестгæнæн комитеты управленийы сæргълæууæг Александр Бастрыкинæн, уый фæрцы сырæзыд нæ бæстæйы кадетты змæлд дæр. Ирыстоны фыццаг хъуамæ байгом кодтаиккам иунæг кълас, фæлæ Сергей Меняйлойы бафæндыд ахæм кълæстæ фæфылдæр кæнын, æмæ йын зæгъын бузныг. Нæ алы хъуыддагæн дæр нын ныфс æмæ æнцой кæй фæлæууы, уый тыххæй, – загъта Валери Устов.
Райдыдта бæрæгбоны сæйраг æмæ кадджындæр хай – кадеты æвдисæндартæ скъола-
дзаутæн раттой Сергей Меняйло æмæ Валери Устов.
Саутæты Тамилæ
