РЦИ-Аланийы Сæргълæууæг Сергей Меняйло цы æмбырд сарæзта Æнæнхъæлæджы цаутæ æмæ зынгсирвæзтытæ ма ‘руадзыны республикон къамисæн, уым æркастысты ног ахуыры размæ ахуыргæнæндæтты цæттæдзинады, хи найæн афоны доны объекты æдасдзинады, стæй 2026 азы сывæллæтты æнæниздзинад фидардæргæнæн кампанийы фарстатæм.
Скъолатæ æмæ рæвдауæндæтты зынгсирвæзтыты ныхмæ цавæр мадзæлттæ арæзт цæуы, уый тыххæй радзырдта ахуырад æмæ наукæйы министр Алыбегты Эллæ. Уый куыд фæбæрæг кодта, афтæмæй республикæйы æппæт муниципалон ахуырадон уагдæттæ æмæ рæвдауæндæтты дæр ис зынгсирвæзтыты ныхмæ сигнал дæттыны автоматикон системæтæ. Лæмбынæг цæстдард цæуы, 2026 азы бындуронæй кæй цалцæг кæнынц, уыцы ахуырадон артдзæстытæм, уыдон та сты 35 организацийы. Куыстыты рæстæг уæлдай æргом здахынц зынгсирвæзтытæй хъахъхъæныны системæтæ нырыккон уагыл сифтонг кæнынмæ.
Æдасдзинадыл дзуапдæттæг ведомствæтæй Сергей Меняйло бадомдта æппæт мадзæлттæ саразын республикæйы ахуырадон уагдæттæ ног ахуыры азмæ бацæттæ кæнынæн. Регионы Сæргълæууæг цæстдарæг оргæнтæн бафæдзæхста æрмæст хъæндзинæдтæ рабæрæг кæнын нæ, фæлæ сæ ма ‘руадзыныл разæнгардæй архайын.
«Курын республикæйы цæстдарæн оргæнтæй, Ахуырад æмæ наукæйы министрадæй, стæй муниципалон скондты сæргълæуджытæй иумæйаг хъарутæй объектты æдасдзинад æмæ зынгсирвæзтытæй бахъахъхъæныны фарстатæ лыг кæнын. Сæйрагдæр у къуылымпытæ сбæрæг кæнын æмæ уый тыххæй гæххæтт ныффыссын нæ, фæлæ ахуырадон уагдæтты директортæ æмæ администрациты сæргълæуджытимæ æппæт мадзæлттæ аразын объектты æнæнхъæлæджы уавæртæ ма ‘руадзыны тыххæй», – бафиппайдта регионы разамонæг.
Хи найæн афоны агъоммæ къамисы уæнгтæ æрныхас кодтой доны объектты фыдбылызтæ ма ‘руадзыны мадзæлттыл. Уæрæсейы Æнæнхъæлæджы цауты министрады РЦИ-Аланийы сæйраг управленийы хицауы хæстæ рæстæгмæ æххæстгæнæг Николай Иванов муниципалон скондты сæргълæуджытæн ратта амынддзинæдтæ. Фыццаградон æххæстгæнинаг домæнтæ – сезоны райдайæны агъоммæ фæфылдæр кæнын официалон æгъдауæй адæмы фæлладуадзæн бынæттæ доны раз, хи найын кæм не ‘мбæлы, уыцы бынæтты сæвæрын тæссаг уавæрæй рагфæдзæхст кæныны нысантæ æмæ цæстуынгæ агитацион фæрæзтæ, стæй донуаттæ хъахъхъæныны патрульты график саразын. Дзыллон информацийы æххуысæй адæмæн иудадзыг зонын кæнын, хи найын кæм æмбæлы æмæ тæссаг кæм у, уый.
Æнæниздзинад фидардæргæнæн сæрдыгон кампанийы тыххæй дзургæйæ, Алыбегты Эллæ фæбæрæг кодта, ныридæгæн куыст кæй цæуы – æдæппæтæй хъуамæ сæ фæллад суадзой 23 738 сывæллоны. 1 июны республикæйы байгом уыдзысты скъолаты раз лагертæ. Сабитæн сараздзысты æппæт уавæртæ сæ рæстæг пайдайагæй æрвитынмæ, уыдзæн сын æмбæлгæ хæрд, хъахъхъæд цæудзысты.
Фæллой æмæ социалон рæзты министры фыццаг хæдивæг Мамайты Анджелæ æмбырды архайджыты зæрдыл æрлæууын кодта, социалон æгъдауæй æххуысхъуаг бинонты сывæллæттæн сæ фæллад суадзын сæ бон кæй уыдзæн республикæйы фæзуаты фараст стационарон фæлладуадзæн æмæ дзæбæхгæнæн организацийы. 2026 азы Сау денджызы былгæрон традицион фæлладуагъд рæстæгмæ урæд æрцыд æнæзæрдæмæдзæугæ экологион уавæры аххосæй. Уый бæсты сабитæн балцæгтæ ратдзысты кавказаг æндæр курорттæм, уым сæ бон уыдзæн æрмæст сæ фæллад суадзын нæ, фæлæ ма се ‘нæниздзинад фæфидардæр кæнын дæр.
Кæронбæттæны лæвæрд æрцыдысты æппæт объекттæ æмæ службæты цæттæдзинады хæрзхъæддзинад æмæ æдасдзинадæн хъæугæ мадзæлттæ саразынæн бæлвырд фæдзæхстытæ.
РЦИ-Аланийы Сæргълæууæг æмæ Хицауады пресс-службæ
