Цæгат-Кавказаг аграрон-технологон колледж ссис æнæтæхæг авиацион системæтæ (БАС) ахуыр кæныны бынат. Ацы ахуыргæнæндон у фыццагдæр, бæрнон нысанмæ чи бавнæлдта, ахæм. Колледж уыцы хъуыддаг æххæст кæндзæн национ проект «Æнæтæхæг авиацион системæ»-мæ гæсгæ.
Колледжтæ æмæ техникумтæм ныртæккæ исынц абитуриентты, ацы дæсныйад у, тынгдæр кæй агурынц, ахæм. Кæд æмæ бæрзонд технологитæ уæ бæллиц сты, уæд æнæтæхæг авиацион системæтæ абон дуæрттæ гом кæнынц фидæнмæ. Ахæм специалисттæ ныртæккæ тынг хъæуынц, раст зæххы куыстæй райдай æмæ арæзтад, аэрокъамисынæй фæу.
Колледжы рауагъдонтæн сæ бон куыст ссарын уыдзæн технологон компаниты: дронтæ аразынæй сæ цалцæг кæныны онг. Куыст цæудзæн раззагдæр ифтонггæрзтимæ, æрмæст теори базоныныл нæ архайдзыстут, фæлæ уæ арæхстдзинад æвдисдзыстут нырыккон тренажертыл. Технологон хæдбардзинадмæ уе ‘вæрæн хæсдзыстут, суыдзыстут, æдасдзинад æмæ бæстæйы уæлдæфон тыгъдад ахадгæ хуызы чи аразы, ахæм командæйы уæнг.
Колледжы разамонæг Моурауты Алан куыд фæбæрæг кодта, афтæмæй ацы программæ регионæн хорз фæахъаз уыдзæн. «Абон иунæг къабаз дæр æнæ ацы технологитæй нал сарæхсдзæн. Нæ размæ ис студенттæн хуымæтæджы диплом сæ къухы бакæнынæй уæлдай ахадгæ дæсныйад раттыны хæс. Уыимæ, уæндонæй кæсдзысты фидæнмæ. Ныртæккæ стæм иттæг хорз материалон-техникон бындуры хицау, йæ зæрды ацы дæсныйад райсын кæмæн ис, уыдон хонæм», – загъта Моурауы-фырт.
Студенттæм æнхъæлмæ кæсы, алыхуызон æвæджиауы цаутæй дзаг ахуырадон программæ, зонд сын амондзысты дæсны специалисттæ. Царды хъуыддæгтæ цы хуызы хуыздæр равдисæн ис, уый зонынц. Ахуырдзаутæн колледжы ис хорз фадæттæ, авналæнтæ, гæнæнтæ, ратахт аразджытæ, æнæтæхæг авиацион фæрæзты алы хуызтæ æмæ æндæртæ базонынæн. Стыр æргом здæхт цæудзæн практикон авналæнтæм, проектон архайдмæ.
Абитуриентты хонынц Æрыдоны горæты Хораны-фырты уынджы 2-æм бæстыхаймæ.
РЦИ-Аланийы Ахуырад æмæ наукæйы министрады пресс-службæ
