Уыд РЦИ-Аланийы Хицауады радон æрвылкъуырион аппаратон æмбырд. Амыдта йæ республикæйы ног равзæрст Сæргълæууæг Сергей МЕНЯЙЛО. Архайдтой дзы министрадтæ æмæ ведомствæты разамонджытæ, муниципалон скондты сæргълæуджытæ. Ныхас дзы цыд зымæджы хъармгæнæн рæстæгмæ цæттæдзинадыл æмæ æндæр ахсджиаг социалон-экономикон фарстатыл.
Хицауады Сæрдары хæдивæджы хæстæ рæстæгмæ æххæстгæнæг Томайты Ирбег фехъусын кодта республикæйы оперативон уавæр:
– Ивгъуыд къуырийы дæргъы республикæйы æвирхъау цаутæ бæрæггонд не ’рцыд. Цæгат Ирыстоны фондз районы: Горæтгæрон, Алагиры, Рахизфарсы, Кировы æмæ Мæздæджы, стæй 32 хъæуы дарддæр дæр тæссаг у зынгсирвæзтытæй, уымæ гæсгæ дзы æххæстгонд цæуы сæрмагонд уавæр. Ивгъуыд къуыри ахуыссын кæнын бантыст 21 зынгсирвæзты. Регионы сæрмагонд службæтæ архайынц бæрзонд цæттæдзинады уавæрты. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 108 фæндаггон фыдбылызы. Хъыгдард дзы баййæфтой 19 адæймаджы æмæ сæ æвæстиатæй рынчындонмæ аластой. Дыууæ адæймаджы дзы фæмард сты. Арвыком æмæ Транскамы фæндæгтæ гом сты æппæт автотранспорты хуызтæн дæр. Республикæйы фæндæгтыл электронон рады æнхъæлмæ кæсынц 256 автотранспортон иуæджы. Уæрæсейы Федераци æмæ Гуырдзыстоны арæныл къуырийы дæргъы дыууæрдæм ахызтысты 26885 автотранспортон иуæджы æмæ 71510 адæймаджы, – загъта Томайы-фырт.
Æнæнхъæлæджы уавæрты министрады регионалон управленийы хъусынгæнинагмæ гæсгæ, республикæйы ахуыссын кæнын бантыст 23 зынгсирвæзты, уыдонимæ – хус кæрдæджы сыгъд дæр.
Сергей Меняйло арфæ ракодта Мидхъуыддæгты оргæнтæ, Росгварди æмæ Æнæнхъæлæджы уавæрты министрады кусджытæн, æвзæрстыты рæстæг æхсæнадон фæтк æмæ æдасдзинад кæй бахъахъхъæдтой, уый тыххæй. Республикæйы Сæргълæууæг Мидхъуыддæгты, Росгварди æмæ Æнæнхъæлæджы уавæрты министрадæн бафæдзæхста, уæлдай зæрдиагдæрæй йæхи чи равдыста, уыцы кусджыты номхыгъд бацæттæ кæнын, цæмæй хорзæхгонд æрцæуой, уый тыххæй.
«Роспотребнадзор»-ы регионалон хайад фехъусын кодта, республикæйы эпидемиологон уавæр нывыл кæй у, уый. Уыимæ, ОРВИ-йæ рынчынты нымæц зынгæ фæфылдæр, фæлæ эпидемиологон бæрæггæнæнтæй нæ ахызт. Рынчынты фылдæр хай сты сывæллæттæ – 75 проценты. Ахуыргæнæндæттæ æмæ рæвдауæндæтты алы райсом дæр цæстдард цæуы сывæллæтты æнæниздзинадмæ. Республикæйы грипп бæрæггонд не ’рцыд. Ивгъуыд къуыри ног коронавирусон инфекци разынд 2 адæймагмæ.
РЦИ-Аланийы ахуырад æмæ наукæйы министры хæстæ рæстæгмæ æххæстгæнæг Алыбегты Эллæ куыд радзырдта, афтæмæй рынчын сывæллæтты нымæц скъолаты у 9 проценты, рæвдауæндæтты та – 12 проценты.
Сергей Меняйло РЦИ-Аланийы цæрæнуатон-коммуналон хæдзарад, артаг æмæ энергетикæйы министры хæстæ рæстæгмæ æххæстгæнæг Хъараты Тимурæн бафæдзæхста, артагæвгæнæн станцæты куысты, адæм цæмæй рады лæугæйæ, бирæ рæстæг ма хардз кæной, уый тыххæй спайда кæнын бархионты æххуысæй. Республикæйы Сæргълæууæг фæбæрæг кодта, шофыртæ рады дыккаг рæнхъæй куы ралæууынц, уæд иннæ машинæты цыдæн тæссаг уавæртæ кæй саразынц, уый. Уымæ гæсгæ, бархионтæ сæ цæст дардзысты æгъдаухæлдтытæм.
Сергей Меняйло ма æмбырды фехъусын кодта, министрты кабинеты
ивддзинæдтæ кæй æрцæудзæн, уый тыххæй.
– Æнæмæнг фæзындзысты ног адæм. Кадрты фарста, ведомствæты разамонджытæ сæ куыст куыд æххæст кæнынц, уыцы бæрæггæнæнтæм гæсгæ лыггонд цæудзæн хæстæгдæр дыууæ мæйы дæргъы, – загъта Сергей Меняйло.
Æвзарæн къамисы сæрдар Моргуаты Жаннæ арфæ ракодта барадхъахъхъæнæг оргæнтæн, æвзæрстыты рæстæг æдасдзинады мадзæлттæ æмбæлгæ уагыл æххæстгонд кæй цыдысты, уый тыххæй.
– Цæгат Ирыстоны æппæт æвзарæн участоктæ дæр куыстой æнæкъуылымпытæй. Иунæг цæстдарæг дæр, уыдон та æдæппæтæй уыдысты минæй фылдæр, иу æгъдаухæлд дæр нæ раргом кодта. Æвзарæн къамисы куысты тыххæй нæм иу хъаст дæр не ’рбацыд. Уый у нæ иумæйаг куысты бæрæггæнæн, – загъта Моргуаты Жаннæ.
Æмбырды ныхас цыд æндæр ахсджиаг нысантыл дæр.
