Хуыцаубоны, 1 июлы, Мæскуыйы дунеон чемпионаты 1/8-æм хайы Уæрæсейы иугонд командæйы ныхмæлæууæг уыди Испанийы командæ. Ацы фембæлды размæ æгас дунейы футболуарзджытæн сæ фылдæр рагацау уæлахиздзауыл нымадтой испайнæгты. Кæй зæгъын æй хъæуы, уымæн бындур уыди. Испанийы командæ нымад у дунейы тыхджындæр командæтæй иуыл.
2010 азы испайнæгтæ систы дунейы чемпионтæ. Абон дæр сæ командæйы хъазынц къорд зындгонд футболисты.
Уый зæгъæн нæй Уæрæсейы командæ æмæ йæ хъазджытæй, фæлæ куыд рабæрæг, афтæмæй нæ лæппутæм разынд фаг сæрæндзинад æмæ арæхстдзинад, ахæм тыхджын командæйæн ныхкъуырд раттынæн. Уæрæсейы командæйы сæргълæууæг Черчесты Станислав йе ‘ххуысгæнджытимæ ссардтой мадзæлттæ испайнæгты ныббырстыты ныхмæ æмæ æппынфæстаг уæлахизы бардуаг бахудт Уæрæсейы командæмæ.
Хъазт райдыдта испайнæгты ныббырстытæй. Растдæр зæгъгæйæ та, пурти фылдæр уыди уыдонмæ, фæлæ уæрæсейæгтæ тынг къæрцхъусæй хъахъхъæдтой сæ арæнтæ æмæ нæ дуаргæс Игорь Акинфеевы уæззау уавæры бахауын нæ уагътой. Фæлæ футболы алцы дæр æрцæуы. Хъазты 12-æм минутыл испайнæгтæ 25 метры дарддæрæй иварон цæф куы ныккодтой, уæд пурти нæ хъахъхъæнæг Сергей Игнашевичыл фæстæрдыгæй сæмбæлд æмæ нæ кулдуары хызмæ басхъиудта. Ахæм æнæнхъæлæджы цæфы фæстæ нæ футболисттæн сæ ныфс нæ асаст æмæ сæ архайд фæцырддæр кодтой. 41-æм минутыл нæ командæ цы ныббырст сарæзта, уый фæсыкк кæныныл архайгæйæ, испайнæгты хъазджытæй иуæн сæ кулдуармæ хæстæг пурти йæ къухыл сæмбæлд æмæ тæрхонгæнæг æвæстиатæй 11- метрон цæфæй фæивар кодта Испанийы командæйы. Нæ размæбырсæг Артем Дзюба 11-метронæй хыгъд сæмхуызон кодта 1:1. Футболуарзджытæ сæхæдæг федтой, уый фæстæ цавæр хъазуатон тох цыдис суанг хъазты кæронмæ дæр, уый. Хъазты дыккаг хай кæд пурти фылдæр испайнæгтæм уыди, уæддæр нæ футболисттæ сæ кулдуары цур тæссаг уавæртæ скæнын нæ бауагътой.
Тынг къæрцхъус уыди нæ дуаргæс Уæрæсейы командæйы капитан Игорь Акинфеев дæр. Уæлæмхасæн цы 30 минуты лæвæрд æрцыд командæтæн, уыдоны дæр хыгъд аивын никæмæн бантыст æмæ ерысты фæткмæ гæсгæ фæуæлахизуæвæг бæрæггонд хъуамæ æрцыдаид 11-метрон цæфты фæрцы.
Ацы фæлварæны уæрæсейæгтæ равдыстой хуыздæр цæттæдзинад æмæ хиуылхæцынад.
Нæ хъазджытæ Федор Смолов, Сергей Игнашевич, Александр Головин æмæ Денис Черышев æнæкъуыхцыйæ бакъуырдтой цыппар пуртийы æмæ уый фæстæ фæндзæм цæфы сæр дæр нал бахъуыд, афтæмæй Уæрæсейы командæ фæуæлахиз Испанийы тыхджын командæйыл 4:3 хыгъдæй.
Ацы уæлахизы уæлдай арфæйы аккаг у нæ дуаргæс Игорь Акинфеев. Уый дыууæ хатты йæ кулдуар бахъахъхъæдта испайнаг футболисттæ Коке æмæ Иньестайы цæфтæй.
Уыцы бон сбæрæг ис, Уæрæсейы командæйы ныхмæлæууæг чи уыдзæн чемпионаты 1/4 хайы, уыцы командæ дæр.
Хорвати æмæ Данийы иугонд командæты ныхмæлæуд дæр рауад тынг хъазуатон.
Сæ фембæлд райдыдта, хур бон æвиппайды арв куыд ныннæра, ахæм цаутæй. Хъазтæн йæ тæккæ райдайæны Данийы командæ уыцы-иу лæгæрст акодта размæ, æмæ иу минут дæр нæма рацыд, афтæ пурти басхъиудта Хорватийы хызы. 1:0 Дани размæ рацыд.
Хорватæгтæ уый фæстæ уайтагъд сæхимæ æрцыдысты æмæ цыппæрæм минутыл хыгъд сæмхуызон кодтой 1:1. Уыцы рæстæг чи æнхъæл уыди, æмæ ацы хыгъд аивын дыууæ командæйæ никæмæнуал бантысдзæн суанг уæлæмхасæн 30 минуты фæрцы дæр. Куыд Уæрæсе æмæ Испанийы ‘хсæн хъазты, афтæ Дани æмæ Хорватийы командæтæ дæр фæуæлахизуæвæг сбæрæг кодтой 11-метрон цæфты фæрцы.
Рæстдзæвиндæр разындысты хорватаг футболисттæ æмæ рамбылдтой 3:2 хыгъдæй.
Афтæмæй 7 июлы Сочийы стадион «Фишт»-ы Уæрæсейы командæ чемпионаты 1/4-æм хайы хъаздзæн Хорватийы иугонд командæимæ.
Æнæмæнг, уый уыдзæн тынг цымыдисаг фембæлд. Кæй зæгъын æй хъæуы, дыууæ командæйы дæр тырндзысты æрмæстдæр уæлахизмæ, фæлæ мах, Уæрæсейы командæйы иузæрдион фарсхæцджыты уырны, Черчесты Станислав æмæ йæ командæ ацы фембæлды дæр сæхи афтæ хъомысджынæй кæй равдисдзысты æмæ та нын ногæй нæ зæрдæтæ сæ хъазтæй кæй барухс кæндзысты, уый.
Куыд æмæ цæй фæрцы сын бантысдзæн уыцы хъуыддаг, уый та зонынц Черчесы-фырт æмæ йе ‘ххуысгæнджытæ. Сæ фæндтæ сæ къухы бафтæнт!
БАСКАТЫ Уырызмæг
