Газет «Рæстдзинад»-ы рагондæр кусæг æмæ ма йæ абон дæр зæрдиагæй чи кæсы, уый у ДЖИМИТЫ Зинæ.Уый дзы бирæ азтæ фæкуыста корректорæй. Ныр йæ цардвæндагмæ куы акæсы, уæд дзы куыд нæ уыд тыхст æмæ зын бонтæ дæр, фæлæ нæ иунæг æрвылбонон газет «Рæстдзинад»-ы кæй куыста, уымæй хоны йæхи амондджын
Зинæ каст фæци Дзæуджыхъæуы Хетæгкаты Къостайы номыл 13-æм астæуккаг скъола. Уый фæстæ та йæ ахуырмæ тырнындзинады фæндæгтæ æркодтой Цæгат Ирыстоны педагогон училищемæ. Уым цы азтæ ахуыр кодта, уыдон уыдысты уæззау, Фыдыбæстæйы Стыр хæст йæ тæмæны кæй уыд, уый аххосæй. Фæлæ сæ зæрдæтæ базырджын уыдысты Советон Æфсады Уæлахизы ныфсæй. Зинæ абон дæр ма хорз хъуыды кæны, педагогон училищейæ-иу æй йе ‘мбæлттимæ Мæздæгмæ хъахъхъæнынадон объекты арæзтадмæ куыд æрвыстой, уый. Зын та куыд нæ уыд уыцы уæззау азты, фæлæ уæд фæсивæды æхсæн цы хæлардзинад уыд, уый абарæн ницæимæ ис.
Зинæ 1944 азы æнтыстджынæй каст фæци училище. Уый фæстæ йæ 1945 азы 5 мартъийы кусынмæ æрбахуыдтой газет «Рæстдзинад»-ы редакцимæ. Уæд газеты сæйраг редакторæй куыста Челæхсаты Аслæнджери. Зинæ йæ абон мысы рухс зæрдæйы æнкъарæнтимæ. Уый, зæгъы, уыд куыстыл иттæг æнувыд, уæздан, æцæг ирон лæг. Æрыгон чызг фыццаг куыста редакцийы секретарæй, фæлæ-иу куы хъуыд, уæд-иу редакцийы фыстæджыты хайады кусæг Цъæхилты Женяйæн дæр аххуыс кодта.
Аслæнджери æмæ редакцийы æппæт кусджытæ дæр цыбыр рæстæгмæ хорзæй базыдтой Зинæйы. Сæ алкæй зæрдæмæ дæр рæсугъд фæндаг ссардта йæ куыстуарзондзинады æмæ æгъдауы фæрцы. Фæстæдæр Зинæ кусын райдыдта газеты корректорæй. Абоны корректорты куыстæй йæ архайд уыд бирæ зындæр. Фæлæ никуы фæфæсмон кодта газет «Рæстдзинад»-ы кæй куыста, ууыл. Йæ кусгæ бон-иу райдыдта боны 12 сахатыл æмæ иу иннæ ахæццæ фæсæмбисæхсæвтæм дæр.
— Куыстмæ-иу куы æрбацыдтæн — мысы Зинæ, — уæд-иу æппæты разæй сцæттæ газеты дыккаг фарс. Æмæ иу æй кæсын райдыдтон. Фæлæ-иу ахæм рæстæджытæ дæр уыд æмæ иу газеты ног номыры æрмæджытæ се ‘ппæт дæр ивд куы æрцыдысты. Уый иу уыд Мæскуыйæ партийы съездæй æрмæджытæ редакци куы иста, уæд. Уæд та-иу мыл редакцийы куы æрбабон ахæм замантæ дæр бирæ уыд. Фæлæ уæддæр ме ‘мбæлттимæ, фæллад цы у, уый нæ зыдтам.
Хорз ма хъуыды кæнын, нæ цытджын фæтæг Сталин куы амард, уæддæр нæ бахъуыд уыцы æвирхъау цауыл фæд-фæдыл æртæ сæрмагонд номыры цæттæ кæнын. Газеты редакцийæн республикæйы хохаг æмæ быдираг хъæуты уыд бирæ æхсæнадон уацхæсджытæ. Уыдонæй алчидæр редакцимæ хаста йе ‘рмæг тынг зæрдиагæй æмæ æхсызгонæй. Мах сæ тынг бирæ уарзтам æмæ сын стыр аргъ кодтам.
Уæды рæстæджы газет «Рæстдзинад»-ы редакци уыди Дзæуджыхъæуы Сабырдзинады проспекты 25-æм хæдзары. Мыхуыр та йæ кодтам Дзанайты Иваны уынджы 20-æм хæдзары (ныртæккæ дзы ис РЦИ-Аланийы Культурæйы министрад). Æртын азæй фылдæр дзы фæкуыста Хъаныхъуаты Валодя. Бирæ æнæхуыссæг æхсæвтæ арвыстон, газет «Рæстдзинад» цæмæй афоныл Ирыстоны дзыллæтæм фæхæццæ уа æмæ мæм редакцийы разамындæй уайдзæф ныхас ма æрхауа, уый сæраппонд. Мемæ ма корректортæй куыстой Гусаты Соня, Саукуыйты Милæ, Бекъойты Симæ, редакцийы абон дæр кусынц Гаглойты Наташæ æмæ Фæрниаты Мæдинæ. Се ‘ппæты дæр зæрдиагæй æрхъуыды кæнын. Мæхицæй не ‘ппæлын, фæлæ ме ‘ххуыс куы бахъуыд газет «Социалистическая Осетия»-йы, уæддæр сыниу сæ фарсмæ балæууыдтæн. Уæдæ алы паддзахадон бæрæгбонты дæр кусгæ кодтам».
Зинæ корректорæй «Рæстдзинад»-ы цы рæстæг куыста, уыцы азты редакцийы фæллой кодтой хистæр æмæ астæуккаг фæлтæры журналисттæ. Абон дзы Зинæ се ‘ппæты дæр зæрдиагæй æрымысы. Сæ алкæй тыххæй дæр у йæ бон сахатгай дзурын. Се ‘ппæт дæр, зæгъы, уыдысты, æвзаргæ хоры нæмгуытау куыстыл æнувыд, сæ алчидæр сæ бæрзонд æмæ рæсугъдæй фарн æфтыдта газет «Рæстдзинад»-ы кадыл. Семæ уæздан æмæ кæрæдзи æмбаргæйæ фæкуыста. Абон дзы кæд нал кусы, уæддæр ыл куыд газеткæсæг, афтæ йæ зæрдæ нæ ивы. Æрвылаз дæр æй рафыссы, канд йæхæдæг æй нæ кæсы æхсызгонæй, фæлæ ма йæ уарзын кæны йæ кæстæртæн, йæ сыхæгтæн, йæ хæстæджытæн æмæ зонгæтæн. Уыимæ æнгом бастдзинад дары, йæ рæстæджы йемæ редакцийы чи куыста æмæ ма дзы абон дæр зæрдиагæй чи фæллой кæны, уыдонимæ. Зæрдиагæй фæцин кæны «Рæстдзинад»-ы алы уацхæссæджы хорз æрмæгыл, редакцийы æрцæуæг æхсызгон цаутыл. Зынаргъ хæзнайау æфснайдæй дары газет «Рæстдзинад»-ы йæ фæллойадон фæндагыл дзурæг къамтæ, фыстæджытæ, хæрзиуджытæ. (уыдон та чысыл не сты ЦИАССР-йы Сæйраг Советы Президиумы Кады гæххæттытæ, хæсты фæсчъылдымы фæллойы ветераны архайæджы æвдисæндартæ æмæ къорд майданы).
Ацы æрмæг цæттæкæныны нысанимæ Зинæйы хæдзары уазæгуаты куы уыдыстæм, уæд дзы баййæфтам йæ хæстæг Бæройты-Джимиты Тимæйы æмæ нын уый та афтæ радзырдта: “1952 азы Зинæ йæ цард баиу кодта Айдарты Никъалаимæ. Æмæ тынг уарзонæй фæцардысты. Адæм сын сæ уаг æмæ кæрæдзийы æмбарындзинады æгъдау хорз дæнцæгæн хастой. Дунейы рухсмæ сын рантыст дыууæ хъæбулы: чызг Наташæ æмæ лæппу Сергей. Хъæбулы хъæбултæ йын ис дыууæ — Иннæ æмæ Марат. Уыдоны кæстæртæ та сты æртæ Эвелинæ, Давид æмæ Георги. Мах, Джимиты чындзытæ, нæ хистæр ходыгъд Зинæйæ стæм сæрыстыр”.
Газет «Рæстдзинад»-ы зæрдиагдæр зиууон, фæллойы æмæ хæсты фæсчъылдымы фæллойы ветеран Айдарты-Джимиты Зинæ ацы бонты бæрæг кæны йæ кадджын 95 азы юбилей. Æмæ йын нæ редакцийы номæй кæнæм зæрдæбын арфæтæ. Нæ цæст ын уарзы фидар æнæниздзинад. Йæ кæстæрты хуртæй æфсæст куыд уа, сæ хорздзинæдтæй райгондæй, йæ уарзон æмæ зынаргъ газет «Рæстдзинад»-ы 100 азы юбилейыл дæр ма немæ кад æмæ радимæ куыд сæмбæла!
ГАСАНТЫ Валери
