Ныййарæджы капиталæй æрвылмæй æхца исыны фадатæй спайда кодтой 65 цæгатирыстойнаг бинонтæ. Æрвылмæй мын 9372 сомы æхца фидут, зæгъгæ, Пенсион фондмæ ахæм курдиат чи барвыста, æмæ ацы аз дыккаг сывæллон кæмæн райгуырд, Цæгат Ирыстоны цæрынц 65 ахæм бинонтæ — ныййарæджы капиталы хицæуттæ. Ныридæгæн ацы бинонтæй фæндзай исынц амынд æхца, иннæ бинонтæн та, сæ курдиæттæ сын куыддæр равзарой, афтæ æхца барвитдзысты. Ныронг ацы хъуыддагæн радих кодтой 2,6 милуан сомæй фылдæр
Куыд зонæм, афтæмæй ацы аз архайы ныййарæджы капитал хардзкæнынад ног къабаз — чысыл æфтиæгтимæ бинонтæн æрвылмæйон фиддон. Субъекты кæй сæвæрдтой, кусынхъом адæймагæн фæцæрынæн хъæугæ тæккæ къаддæр уыцы бæрцы 1,5 хаттон бæрцæй (Цæгат Ирыстоны — 14 867 сомы) бинойнагмæ хауæг æфтиаг фылдæр кæм нæу, амынд къордмæ хауынц ахæм бинонтæ (цот æмæ сæ ныййарджытæ).
Бинонты иумæйаг æфтиаг хынцгæйæ, нымайынц мыздтæ, премитæ, пенситæ, социалон фиддонтæ, стипендитæ, алыхуызон компенсацитæ, алименттæ æмæ æндæртæ. Пенсион фондæй ист фиддонтæй фæстæмæ Пенсион фондмæ бахатыны рæстæг амынд фиддонты бæрцытæн бавдисын хъæуы æмбæлгæ гæххæттытæ.
Адæймагмæ ис дыккаг сывæллоны райгуырды боны фæстæ 1,5 азы æрвылмæйон фиддон сæвæрыны фæдыл курдиат цыфæнды афон барвитыны бар. Курдиат фыццаг æхсæз мæйы кæд барвитат, уæд æхца фиддзысты сывæллоны райгуырды бонæй фæстæмæ (ома, курдиат цы мæйты нæ барвыстат, уыцы мæйтæн дæр æхца бафиддзысты). Курдиат æхсæз мæйы фæстæ кæд барвитат, уæд æхца фиддзысты курдиат барвитыны бонæй фæстæмæ.
Æрвылмæйон фиддон сæвæрыны тыххæй курдиат барвитæн ис бæстæйы Пенсион фонды клиентон службæмæ, кæнæ къорд МФЦ-йы фæрцы. Закъон Пенсион фондæн курдиатыл æрныхас кæнынæн æмæ ныййарæджы капиталы сертификат раттынæн дæтты мæйы, стæй фæрæзтæ барвитынæн ноджыдæр ма дæс кусгæ боны æмгъуыд. Адæймагæн бæстæйы æфстаудæттæг кусæндоны чи ис, æхца барвитдзысты ахæм хыгъдмæ. Ныййарæджы капиталы хицауы фæндонмæ гæсгæ æхца фидыны фæткæн цыфæнды афон дæр кæрон сæвæрæн ис. Хабæрттæ бæлвырддæр базонæн ис УФ-йы Пенсион фонды цæгатирыстойнаг хайады, 51-80-92; 40-97-10, кæнæ 40-97-07 телефонтæм фæдзургæйæ.
