«Барадхъахъхъæнæг оргæнты куыстæн аргъ хъуамæ митингты фæрцы ма кæной. О, адæммæ ис хи хъуыдытæ, хатдзæгтæ, фæлæ барадхъахъхъæнджыты куыстæн æрмæстдæр прокуратурæ хъуамæ кæна аргъ. Ныртæккæ нын республикæйы прокуроры хæдивæг цы хабæрттæ радзырдта, æз уыдонæй разы нæ дæн. æцæгдæр нырма уголовон хъуыддаг цæуы æвзæрст æмæ бирæ фæзилæнты тыххæй æргомæй дзурæн нæй. Фæлæ уæддæр фæрстытæ къаддæр нæ кæнынц», — знон РЦИ-Аланийы Парламенты Сæрдары фыццаг хæдивæг Къесаты Станислав, прокуроры хæдивæг Камиль Гусейновы раныхасмæ байхъусгæйæ, йæ хъуыдытæ загъта дзыллон-хабархæссæг фæрæзты кусджытæн.
Ивгъуыд къуырийы советы уæнгтæ бауынаффæ кодтой, æрæджы республикæйы цы æвирхъау цау æрцыд, уый тыххæй прокуроры æрфæрсын. Уымæ гæсгæ, знон советы æмбырд райдыдта Камиль Гусейновы раныхасæй. Советы æмбырд амыдта Парламенты Сæрдар Алексей Мачнев. Прокуратурæйы минæвар радзырдта, Цъыккаты лæппуимæ баст хъуыддаг куыд райдыдта æмæ цæмæ æрцыд, уый тыххæй. Ныронг зындгонд цы у, уымæй уæлдай, ногæй ницы загъта, «цалынмæ хъуыддаг æвзарынц, уæдмæ закъон нæ уадзы», зæгъгæ. Уый фæстæ дзуапп радта советы уæнгты фæрстытæн.
æмбырды фæстæ Къесаты Станислав уацхæсджытæн куыд загъта, афтæмæй «…бæрæг нæу, уæддæр кæм æмæ кæд, цæй тыххæй райдыдта Цъыккаты æмæ Плиты лæппуты ‘хсæн быцæу. Кæм фембæлдысты, кæд фембæлдысты, уæд? Плийы-фырт у «ОМОН»-ы уæнг, фæлæ уыцы рæстæг йæ куыстадон хæстæ не ‘ххæст кодта, куыд хуымæтæг адæймаг, афтæ дзы уыдис æмæ афтæ дарддæр. Банхъæлмæ кæсдзыстæм тæрхонадон-медицинон экспертизæйы бæрæггæнæнтæм дæр. 2012 азæй фæстæмæ Парламент Мидхъуыддæгты министрады тыххæй рахæссы уынаффæтæ, бафæдзæхсæм сын, цæмæй се ‘ргом аздахой сæ архайдмæ, цæмæй сын кæддæриддæр закъоныл æнцайа, кадрты фарстмæ, æмæ къабазы цы уаг, цы психологон ахаст ис, уыдæттæм. Абон дæр мæ фарст Уæрæсейы Мидхъуыддæгты министрады разамындмæ ис йæ тыхы, уымæн, æмæ нырма нæ Мидхъуыддæгты ведомство сæ кусджыты архайдæн аргъ нæма скодтой, сæ хъуыдытæ, сæ ахаст нæ равдыстой», — загъта Къесайы-фырт.
Парламенты сæрдары фыццаг хæдивæджы хъуыдымæ гæсгæ, кæд Цъыккаты лæппуйы хæстæджытæ уынгтæм рацыдысты, уæд уыдоны бамбарæн ис, фæлæ мидхъуыддæгты кусджыты кæй баурæдтой, уый тыххæй митингтæ кæнын раст нæу.
«Ис адвокаттæ, ис фадат, цы уыдис, уый рæстудæй зæгъынæн, ничи сæ нæмдзæн, тыхмитæ сын ничи бакæндзæн», — загъта Къесаты Станислав æмæ зæрдæ бавæрдта, фæстæдæр та ногæй прокуратурæйы бæрнон кусджытæм байхъусынæй.
Закъонæвæрынады, закъонад æмæ бынæттон хиуынаффæйады комитет советмæ цы закъонадон акттæ рахаста, уыдоны ‘хсæн уыдис нæ республикæйы Парламенты сидт Паддзахадон Думæйы Сæрдар Сергей Нарышкинмæ. Нæ депутаттæ курынц, цæмæй наркотикивæн æндæр хостæ парахат кæныны ныхмæ федералон закъонæвæрынады мадзæлттæ фæкарздæр уой, уый. Наркотикты æнæзакъон зилдухадмæ цæстдарджытæ куыд рабæрæг кодтой, афтæмæй, наркотикты азары бахауæг адæм пайда кæнынц наркотикивæн хостæй. Уыдон балхæнæн ис æнцонæй, уымæн æмæ фармацевтон базарады раз закъонадон цæлхдуртæ нæй. Уымæ гæсгæ «Дзæбæхгæнæн фæрæзты тыххæй» федералон закъонмæ, æндæр барадон акттæм хицæнæй хъæуы бахæссын ацы наркотикивæн хостæ. Хъуамæ сæ уæй кæной сæрмагонд фæткмæ гæсгæ. Уымæй дарддæр ма сидты амынд цæуынц, фармакологон базарады æнæ рецептæй ахæм хостæ чи уæй кæны, уыдоны ныхмæ æфхæрæн мадзæлттæ дæр.
Бюджеты, хъалонты, исбонад æмæ кредитон организациты комитеты Сæрдар Хæдарцаты Аслæнбег советы уæнгты æргом аздæхта «Паддзахадон æмæ муниципалон исбонад приватизаци кæныны тыххæй» федералон закъонмæ ивддзинæдтæ бахæссыны тыххæй» федералон закъон. Уыдон хаст цæуынц, цæмæй ацы къабазы приватизаци суа æргом, æмæ паддзахадæн пайда хæсса. Хæдарцы-фырт куыд бамбарын кодта, афтæмæй паддзахадон æмæ муниципалон исбон капеччытыл кæй уæй кæнынц, æмæ æппындæр бюджетæн пайда кæй нæ хæссынц, уый тыххæй 2014 азы ноябры æрдзырдтой æппæтуæрæсеон адæмон фронты æмбырды. Уæд Владимир Путин бабар кодта хъуыддаг бындуронæй равзарын.
Ныр дæр ма ис тынг бирæ ахæм цаутæ, уымæн æмæ исбон уæй кæнынмæ равæрынц, йæ аргъ ын не схъæр кæнгæйæ, уыимæ, æлхæнæг вæййы иунæг. Закъоны проект цы ивддзинæдтæ хæссы, уыдонмæ гæсгæ æппæт хъуыддæгтæ конд цæудзысты æндæр фæткыл, суанг — электронон хуызы дæр. Уый фæрцы архайджыты нымæц уыдзæн фылдæр, сæ бон уыдзæн ерыс кæнын, коррупцион хъуыддæгтæн дзы бынат нал уыдзæн. Ацы, æмæ комитеты иннæ закъоны проекттæ фидаргонд æрцыдысты.
Аграрон æмæ зæххы политикæйы, экологи æмæ æрдзон фæрæзты комитеты Сæрдар Темыраты Виктор цы закъонадон хъæппæристæ æмæ закъоны проекттыл æрдзырдта, уыдонимæ уыдис «Сæрмагондæй хъахъхъæд цы æрдзон бынæттæ цæуынц, уыдоны тыххæй» федералон закъонмæ ивддзинæдтæ бахæссыны тыххæй» федералон закъоны проект. Уый баст у паддзахадон æрдзон фæдзæхст бынæтты барадон уагæвæрдтæ фæбæлвырд кæнынимæ æмæ æрдзæй пайда кæныны экологион закъонæвæрынад фæхуыздæр кæнынимæ. Советы æмбырды ма байхъуыстой Суанты Вадиммæ, Бæззаты Виталимæ, Козаты Сосланмæ, Андиаты Сосланмæ, равзæрстой ахсджиаг закъонадон документтæ.
Бутаты Эльзæ
