Æнæ ногдзинæдтæй размæ цæуæн нæй

0
875

Наукон-практикон конференци «МРТ — клиникон практикæйы» арæзт æрцыд Цæгат Ирыстоны медицинон академийы æмбырдтæаразæн залы.

Райдайыны размæ йæ архайджытæ æмæ уазджытæ, иу уысм æдзæмæй алæугæйæ, ссардтой Æгъуызарты Тамерланы рухс ном. Конференцийы архайджытæн зæрдиаг æгасцуай æмæ арфæйы ныхæстæ загъта нæ республикæйы æнæниздзинад хъахъхъæнынады министр Реуазты Таймураз. Йæхæдæг дæр у ацы уæлдæр ахуыргæнæндоны рауагъдон, æмæ, куыд бафиппайдта, афтæмæй конференци Цæгат Ирыстоны медицинон академийы кæй цæуы, уый дзурæг у, нæ уæлдæр ахуыргæнæндон наукон-иртасæн куыстыты фæсте кæй нæ зайы, фæлæ раззагдæртимæ уæвыныл кæй архайы, ууыл. Йæ ныхасмæ гæсгæ, æппæт медицинон къабазы размæ дæр æвæрд ис иунæг, фæлæ ахсджиаг хæс — лæвар медицинон лæггæдтæ нывылæй-нывылдæр кæнын. Ацы хъуыддаг къухы цæмæй бафта, уый тыххæй æнæ нырыккон медицинон технологитæй æмæ кусæнгæрзтæй архайæн нæй. Æнæ компьютерон кæнæ магнитон-резонансон томографæй рынчыны низ æххæстæй сбæлвырд кæнæн нæй, уымæ гæсгæ конференцийæн ис стыр ахадындзинад. Ууыл дзырдтой конференцийы архайджытæ дæр: Ростовы паддзахадон медицинон университеты тынкалгæ диагностикæйы æмæ магнитон-резонансон æмæ рентгены-компьютерон томографийы кафедрæйы сæргълæууæг, медицинон наукæты доктор, профессор Виктор Домбровский; Мæскуыйы æнæниздзинад хъахъхъæнынады департаменты 12-æм амбулаторон-поликлиникон тынкалгæ диагностикæйы хайады сæргълæууæг, медицинон наукæты доктор Дмитрий Буренчев; Æнæххæст бæрнондзинады æхсæнад «Клиника доктора Кудзаева»-йы генералон директор Кудзаты Хъазыбег; Цæгат Ирыстоны паддзахадон медицинон академийы клиникон рынчындоны дохтыр-эндоскопист Фæрниаты Тамерлан; ЦæгатКавказы бирæкъабазджын медицинон центры дохтыр-нейрохирург Дулаты Сослан. Медицинон лæггæдтæ хæрзхъæддæр кæнын, демографион уавæр банывыл кæнын — ахæм фыццаградон хæстæ медицинон кусджыты размæ æвæры нæ бæстæйы Президент, ацы нысан йæхицæн сæйрагдæрыл нымадта æмæ йæ зæрдиагæй æххæст кæнын райдыдта нæ республикæйы дзæнæты бадинаг Сæргълæууæг Æгъуызарты Тамерлан, фæлæ, стыр хъыгагæн, йæ зæрдæйы цы бирæ хорз фæндтæ уыд, уыдон кæронмæ ахæццæ кæнын æй хъысмæт нæ бауагъта. Министр куыд загъта, афтæмæй, Æгъуызарты Тамерланы фæрцы республикæйы æнæниздзинад хъахъхъæнынады къабазы цы хорз хъуыддагтæ фæзынд æмæ йæ къухы цы бафтыд саразын, уыдон æрдæгыл нæ баззайдзысты.

ДЕДЕГКАТЫ Зæлинæ

ОСТАВЬТЕ ОТВЕТ

Please enter your comment!
Please enter your name here