Знон Сывæллæтты сфæлдыстады республикон галуаны уыдис хæрзаудæн акци «Здоровье детей — на контроле у взрослых!» Уый арæзт æрцыд Уыргты дунеон боны фæлгæты. Бацæттæ йæ кодтой Æхсæнадон совет æмæ Регионты ‘хсæн нефрологион пациентты æхсæнадон организаци «Нефро-Лига»-йы цæгатирыстойнаг хайад. Акцийы архайдтой куыд ныййарджытæ, афтæ сывæллæттæ дæр. Паддзахадон гимн ацæгъдыны фæстæ йæ байгом кодта Регионты ‘хсæн нефрологион пациентты æхсæнадон организаци «НефроЛига»-йы цæгатирыстойнаг хайады сæрдар КАЛОТЫ Хъазыбег.
Дарддæр акцийы архайджыты раз раныхас кодта РЦИ-Аланийы Хицауады Сæрдары хæдивæджы хæстæ рæстæгмæ æххæстгæнæг Александр Реутов. Уый бацамыдта, акцийы арæзт пайдайаг хъуыддаг кæй у, йæ нысан та у уыргты низтæ профилактикæ æмæ дзæбæх кæнын. Стæй акцийы архайджытæ байхъуыстой РЦИ-Аланийы Æнæниздзинад хъахъхъæнынады сæйраг нефролог, медицинон наукæты доктор, профессор Дзгойты Фатимæйы раныхасмæ. Куыд загъта, афтæмæй уыргты низтæ фæстаг рæстæг сарæх сты куыд Уæрæсейы, афтæ Европæйаг Цæдисы бæстæты. Ацы низты профилактикæйы тыххæй афæдз иу хатт кæнын хъæуы ультрамырон иртасæнтæ. Уыргты низтæ та фæзынынц æвзæр хæлцады, карз нозты æмæ æндæр æууæлты азарæй. Медицинон наукæты кандидат Еленæ Темуридийы доклад уыдис ахæм темæйыл: «Распространенность и структура заболевания мочевой системы у детей по данным эпидемиологического обследования в РСО-Алания» æмæ йæм акцийы архайджытæ зæрдиагæй байхъуыстой. Хæрзаудæн акцийы фæстæ Сывæллæтты сфæлдыстады галуаны æмæ Сывæллæтты фыццæгæм музыкалон скъолайы хъомылгæнинæгтæ концерт равдыстой акцийы архайджытæн.
Т.КОСТИН
