Мæскуыйы областы горæт Роменскоейы ивгъуыд къуыри цыди Уæрæсейы чемпионат армспортæй. Ирыстоны фæсивæд та дзы 42 командæйы ‘хсæн бацахстой фыццаг бынат. Нæ цæнгдых чызджытæ æмæ лæппутæ Ирыстонмæ сыздæхтысты хъæздыг хуынимæ.
Дыууæ къухæй хæцгæйæ сыгъзæрин майдантæ рамбылдтой: Мæхъиты Алан (90 кг уæзы), Хуыбаты Георги (70 кг), Хуыбаты Ирбег (65 кг), Церекаты Раман (60 кг), Мæхъиты Иринæ (80 кг) æмæ Гæбуты Луизæ (60 кг). Нæ æмбисонды спортсменкæ Мæхъиты Иринæ сыгъзæрин майдантæ рамбылдта дыууæ къухæй дæр. Иринæйы бафæзмыдта Церекаты Раман. Уымæн дæр бантыст дыууæ къухæй дæр фыццаг бынæттæ рамбулын. Галиу къухæй 1-аг бынæттæм Иринæ æмæ Раманæй уæлдай рацыдысты: Хуыбаты Ирбег (65 кг) æмæ йе ‘фсымæр Георги (70 кг), Уыртаты Ацæмæз (80 кг) æмæ Хъараты Мухарбег (90 кг). Рахиз къухæй та сыгъзæрин майдантæй хорзæхджынгонд систы Гæбуты Луизæ (60 кг), Мæхъиты Иринæ (80 кг), Церекаты Раман (60 кг), Дзытиаты Хетæг (70 кг), Золойты Спартак (85 кг), Золойты Хадзымурат (90 кг), Цæрикъаты Алан (100 кг). Æвзист майдантæй хорзæхджынгонд систы Джыккайты Кристинæ (55 кг — галиу къухæй), Томайты Руслан (60 кг — рахиз æмæ галиу къухтæй), Тогойты Игорь (70 кг — галиу къухæй), Уалыты Георги (75 кг — галиу къухæй), Хъариаты Мурат (55 кг — галиу къухæй), Муриты Вячеслав (100 кг — галиу къухæй), Хуыбаты Дианæ (50 кг — рахиз къухæй), Оксанæ Горбач (55 кг — рахиз къухæй), Томайты Руслан (60 кг — рахиз къухæй, Мæхъиты Алан (90 кг — рахиз къухæй). Бронзæ майдантæ галиу къухæй хæцгæйæ рамбылдтой Гæбуты Луизæ (60 кг) æмæ Мæхъиты Алан (90 кг). Рахиз къухæй 3-аг бынæттæ бацахстой Гæцойты Кристинæ (65 кг) æмæ Хуыбаты Георги (70 кг). Ерысты бæрæггæнæнтæм гæсгæ æвзæрст æрцæудзысты, Европæйы æмæ дунеон чемпионатты Уæрæсейы спортивон кад чи хъахъхъæндзæн, уыдоны нæмттæ. Нæ фæсивæды ерыстæм бацæттæ кодтой тренертæ Золойты Хъазыбег, Лелаты Тотрадз, Аркъауты Оксанæ, Мæхъиты Иринæ, Цъæхилты Таймураз, Гусалты Альбинæ, Светланæ Якимова, Хуыгаты Аслан, Хуыбылты Бондо, Болататы Владимир, Челдыты Анатоли, Скъодтаты Анатоли æмæ Еналдыты Регинæ. Армспорты Цæгат Ирыстоны федерацийы сæрдар Цъæхилты Таймураз æмæ нæ республикæйы иугонд командæйы сæйраг тренер Золойты Мæирбег арфæ кæнынц, ерыстæм ацæуынмæ сын чи баххуыс кодта, уыдонæн: РЦИ-Аланийы физкультурæ æмæ спорты министрад, Мæскуыйы цæрæг амалхъом адæймаг Маирбек Рогуль æмæ Алагиры районы сæргълæууæг Бутаты Арсенæн. Уыдон абоны тыхст рæстæг спортсментæн, сæ къух куыд амоны, афтæ фæкастысты æмæ сын мах зæгъæм бузныг. А фæстаг рæстæг искуыдæм командæ ерыстæм аласынæн фæрæзтæ ссарын ссис тынг зын. Зонут æй, Ирыстоны армæй хæцджытæ Уæрæсейы иугонд командæйæн йæ астæуымагъз сты. Фæлæ уæддæр ерыстæм фæсарæнтæм дæр нæхи хардзæй цæуын фæхъæуы. Мæнæ та ныр дæр нæ фæсивæд иуæндæсæй конд æрцыдысты Уæрæсейы иугонд командæмæ æмæ архайдзысты Европæйы чемпионаты Румыны. Цæмæй уырдæм ацæуæм, уыцы фарстатæ лыг кæнын дæр та нæхимæ хаудзæн. Фæлæ уæддæр нæ къухтæ дæлæмæ нæ уадзæм, агурдзыстæм мадзæлттæ, — загъта Цъæхилты Таймураз. Ирыстоны цæнгдых фæсивæдæн æгас дунейы дæр стыр кад кæй ис, уымæн бирæ æвдисæнтæ ис. Мæнæ та ныр дæр дард бразилиаг горæт Рио-деЖанеройæ сæрмагондæй хонынц нæ таурæгъон, дунейы 17 хатты чемпионкæ Мæхъиты Иринæйы. Уым цæудзæн спорты цалдæр хуызæй лæгæй-лæгмæ тохтæй профессионалон дунеон турнир «Арнольдклассик». Йæ аразæг у Арнольд Шварценеггер æмæ уый бафæндыд, цæмæй Мæхъиты Иринæ рахæца армспорты турниры. Цымыдисаг уыдзæн Иринæ æмæ зындгонд бразилиаг спортсменкæ, дунейы чемпионкæ Габриэла Васконселасы ныхмæлæуд. Иринæ Бразилимæ абалц кодта абон, 29 мартъийы æмæ рæствæндаг фæуæд!
БАСКАТЫ Уырызмæг
