Абайты Васойæн
«Язык так же древен, как и сознание» К.МАРКС
Æз райгуырдтæн ирон æвзаджы равзæрдæй,
Мæ уд дæ зæлтыл мин-мин аз фæцыд:
Æрцыдтæ мæм æрвон дунеты рагзæлтæй,
Куыд фæцæуы йæ фырты уынæг фыд.
Рæвдыдтай ды ирон удты дæ узæлдæй,
Хæцыдтæ сыл æрвон тыхæй æнгом:
Æрттывтай мæм æрвон рухсау нæ фыдæлтæй,
Дæуæй рæвдыд нæ адæмæн сæ ном.
Сæрыстыр дæн æз арвы бын мæ фыдæлтæй,
Зæххыл ныууагътой намысæн сæ ном:
Ныхасы фарн сæйрагдæр у лæджы зæлтæй,
Ариаг дзырдæй равзæрдис ирон!
Æз дæн ирон ирон ныхасы уаз зæлтæй,
Мæ уд сæ цинæй дунемæ æрцыд:
Æз райгуырдтæн ирон æвзаджы равзæрдæй,
Мæ размæ та — мæ мад æмæ мæ фыд!
Ирон дзырдтæн сæ равзæрд у æрвон зæлтæй,
Мæ хъуыдытæн мæ уды рухс — сæ цырт:
Æз равзæрдтæн мæ дард фыдæлты узæлдæй,
Куыд равзæры фыды узæлдæй фырт!
Æз барын цард ирон æвзаджы уаз зæлтæй,
Чындздзон чызгау мæнмæ уыдис сæ цыд:
Æз уарзын цард ирон ныхасы узæлдæй,
Куыд æй уарзтой мæ мад æмæ мæ фыд!
Æвзаджы фарн нын баззадис нæ фыдæлтæй,
Ирон æвзаг — мæ рагфыдæлты цырт:
Æвзаг дунетыл равзæрдис лæджы зæлтæй,
Куыд равзæрдис Къостайы удæй дзырд!..
Ирон æвзаг, мæ удвæндаг нæ фыдæлтæй,
Ирон дзыллæты иумæйаг мæсыг:
Ды мæ хæссыс дæ хъæбысы дæ узæлдæй,
Куыд мæ хастой мæ мад æмæ мæ фыд!
Æз демæ раджы райгуырдтæн дæ равзæрдæй
Мæ уд дæ зæлтыл рухсагур фæцыд:
Ды мæ уызтай мæ авдæны æрвон зæлтæй,
Дæ фæстæ та мæ мад æмæ мæ фыд!
…Цæры хæстонау Иры æвзаг мах фæрцы,
Хæцыд, хæцы йæ фæдонтыл æнгом:
Æнусты дæргъы не ‘взаг немæ размæ цыд,
Уый кодта мах уæздан æмæ уæндон!
