Редакцимæ нæм æфсæрмытæ кæнгæ æрбацыд иу асгомау сылгоймаг. Йæхи бацамыдта: «Æз дæн джызæйлаг Солтанты Земфирæ, Беккуызарты чындз. Райгуырдтæн Фыдыбæстæйы Стыр хæсты размæ. Мæ фыд Васили æмæ мæ мад Надеждæйæн уыдыстæм аст сывæллоны: цыппар лæппуйы æмæ цыппар чызджы. Лæппутæй дыууæ Андрей æмæ Муради уыдысты хæстхъом æмæ хæцыдысты фашистон æрдонгты ныхмæ. Андрейы хæстон фæндæгты тыххæй фыста газет «Рæстдзинад». Уый сæрæгасæй æрыздæхт уыцы тугкалæн хæстæй. Муради æбæрæгæй фесæфт 1943 азы. Баззадысты ма нын йæ фыстæджытæ æмæ, кæмыты хæцыд, уыдон тыххæй бæрæггæнæнтæ. Мурадийы хæстон бынæттæм бирæ хæттыты фæфыстам, фæлæ бæлвырд дзуапп никæцæй райстам. Цæмæ уæм æрбацыдтæн? Йæ кой газетты никуы уыд, æмæ мæ фæнды «Рæстдзинад»-ы йæ хæстон къам уæддæр куы рацæуид».
Солтанты Мурадийы æфсадмæ акодтой 1939 азы. Хæст æй æрæййæфта Сырх Æфсады службæ кæнгæйæ. Сæрмагонд ахуырты фæстæ райста лейтенанты цин æмæ йæ хæстон хæстæ æххæст кодта æфсæддон хайы штабы. Фæлæ хæст хæст у æмæ-иу схæцын куы бахъуыд, уæд-иу карз тохы дæр бацыд. Уым цы хъæбатырдзинæдтæ æвдыста, уыдоны тыххæй иста хæрзиуджытæ. 1943 азы январы та йын саккаг кодтой Сырх Стъалыйы орден. Ацы хæрзиуæг ын дæттыны тыххæй гæххæтты фыст ис: «За время боевых действий тов. Солтанов проявил мужество и отвагу в р-не Урыва, Бондарева, Острогожена. Он самоотверженно дрался с немецкими оккупантами во время наступательных боев, в районе Урыва он уничтожил 2 пушки ПТО с расчетами, 3 пулеметных гнезда с расчетами, 25 солдат и 2 офицера. В районе Острогожена он ворвался в колонну противника с обозом, где разбил 8 повозок с грузом, 15 солдат. Захватил трофеи 1 мотоцикл и 1 автомашину». Муради сæ бинонтæм цы фыстæджытæ фервыста, уыдон абон дæр ма цæстыгагуыйау хъахъхъæнынц. Сæ уæлæ фыст «п/п 2462-75» «п/п 48958-А», п/п 07225-В» п/п 22100″, фылдæрыл та — «п/п 06661». Йæ алы фыстæджы дæр сæ биноныг фæрсы сæ царды хабæрттæй, стæй фыссы йæхи тыххæй. Æмæ сæ куры, арæхдæр æм цæмæй фыссой. Фыстæджытæ та тынг зынтæй хæццæ кодтой хæсты быдырмæ. Йæ фыстæджытæ фыст сты иронау æмæ уырыссагау. Иуы дзы хъынцъым кæны ныр цыппар-фондз азы дæргъы ирон ныхас кæй нал фехъуыста, æмæ йын иронау фыссын кæй фæзын. Йæ фыстæджытæ кæд уырыссагау райдайы, уæддæр дзы æнæмæнг фæкæны ирон хъуыдыйæдтæ, дзырдтæ. Йæ мад Надеждæмæ иу фыстæг та фæфæуы афтæ: «Кæд æгас уæм хæсты фæстæ, уæд Гагка (йæ мады афтæ хуыдта) дыууæ (йе ‘фсымæр Андреимæ) чындзаджы агур, только осетинок. С приветом, твой сын. 15.11.43 г.» Йæ фыстæджыты тыхсы, мæт кæны, йе ‘фсымæр Андрей хæсты быдыры цы уавæры ис, ууыл. Дунямæ йæ иу фыстæджы фыссы: «Напиши какие новости от Андрюши. Я нахожусь на передовой, занимаюсь штатными делами и пока все в порядке. Жизнь сейчас веселая, фрицев гоним на запад, трофеями хоть завались… Вообщем пока писать заканчиваю, но если встретимся, то расскажу с начала до конца. Твой брат капитан (йæ къухфыст)» Фембæлынмæ бæргæ фыста Солтанты Василийы хæстон фырт Муради, фæлæ йын уыцы хъомыс нал радта йæ хъысмæт. Нал æрыздæхт Ирыстонмæ, Белоруссийы зæххы æнусмæ хуысгæйæ баззад. Кæм ныгæд æрцыд, уый йæ бинонтæ рагæй агурынц, фæлæ сæ къухы ницы бафтыд. Горæт Гомелы фарсмæ хъæу Ломоносовы астæуккаг скъолайы ахуырдзаутæ йæ 14 æфсымæрон ингæнты фæцагуырдтой æмæ дзы æрмæст иуы ис, йæ мыггаг æмæ ном бæлвырд кæмæн не сты, ахæм капитан. Уымæй хуыздæр дзуапп никæцæй ма райстой. Хъæбатыртæ нæ мæлынц. Адæмы зæрдæты цæрынц. Йæ ном, йæ намыс цæры Солтанты Мурадийæн дæр.
ЦГЪОЙТЫ Хазби
