Знон Ирыстонмæ ссыд йæ уарзондæр хъæбултæй иу — ГЕРГИТЫ Валери Санкт-Петербурджы Марияйы театры симфонион оркестримæ. Дзæуджыхъæуы æфсæнвæндаджы вагзалы фæзы йын йæ фыдæлты зæххыл æгасцæуат загътой нæ республикæйы Сæргълæууæджы хæстæ рæстæгмæ æххæстгæнæг БИТАРТЫ Вячеслав, Хицауады Сæрдары хæдивæджы хæстæ рæстæгмæ æххæстгæнæг ОГЪУАТЫ Алан, РЦИ-Аланийы культурæйы министры хæстæ рæстæгмæ æххæстгæнæг АТАЙТЫ Мæдинæ, культурæйы министры хæдивджытæ МАМСЫРАТЫ Сослан æмæ КЪУБАЛТЫ Эльбрус, нæ республикæйы Оперæ æмæ балеты паддзахадон театры директор ГЕРГИТЫ Ларисæ, йæ хæдивæг ГÆЛÆУТЫ Анатоли, республикæйы интеллигенци æмæ дзыллон хабархæссæг фæрæзты минæвæрттæ.
Ирон æгъдау куыд амоны, афтæ йын йæ размæ рахастой æртæ уæливыхы, уæхстыл физонæг æмæ ирон бæгæны. Хистæры ракуывды фæстæ маэстро ацахуыста æмæ арфæ ракодта йæ уарзон адæмæн. Нæ республикæйы Гергиты Валерийы номыл аивæдты колледжы кафджыты къорд, сывæллæтты ансамбль «Чысыл джигит» æмæ трио «Амран» сæ аив фæндырдзагъд æмæ ирон кæфтытæй барухс кодтой Валерийы, йемæ æрцæуæг уазджытæ æмæ фысымты зæрдæтæ. Фæстæдæр РЦИ-Аланийы Сæргълæууæджы хæстæ рæстæгмæ æххæстгæнæг Битарты Вячеслав Хицауады хæдзары фембæлд Гергиты Валериимæ. Битары-фырт йæ раныхасы загъта, Валери канд концерттæ раттынмæ кæй не ссыд, фæлæ ма республикæйы разамындæн дæр тынг æхсызгон цы у, ахæм фæндтимæ. Уый загъта: — Фыццаджыдæр мах, Ирыстоны цæрджытæ иууылдæр, сæрыстыр стæм дæуæй, дæ ном, дæ кадæй. Дæ фыдыуæзæгмæ куыдфæндыйы цæстæй кæй нæ кæсыс, уый дæр зонæм. Мах не ‘ппæт дæр де сфæлдыстадон цардмæ æмæ фæндагмæ æдзухдæр нæ хъус дарæм, æмæ нын æхсызгон вæййы дæ алы æнтыстдзинад дæр. Æрæджы дæр кастыстæм, Пальмирæйы, Сирийы хæдбардзинадыл тохгæнджыты кадæн цы концерт радтай, уымæ. Бузныг дын зæгъын, филармони дæр кæй бабæрæг кодтай æмæ нын йæ цалцæджы куыстыты цæстуарзон амындтытæ кæй бакодтай, уый тыххæй дæр. Гергиты Валери йæ цины тæлмæнтæ нæ баурæдта, вагзалы чысыл джигиттæ йæ размæ куы рацыдысты æмæ сæ къахфындзтæ куы æрсагътой, уыцы кафты фæдыл. Стæй радзырдта, цы фæндтæ æмæ нысантимæ æрцыд йæ фыдыуæзæгмæ, уыдæтты тыххæй. — Мæхи зæххыл, мæхи хæдзары дæн æмæ мæ зæрдæ цинæй байдзаг. Кæд бирæ азты ардæм æрцæуын мæ къухы нæ бафтыд куысты аххосæй, уæд ныр мæ рæдыд сраст кæндзынæн æмæ алы аз дæр дыууæ хатты цæудзынæн Ирыстонмæ. Сывæллæтты кафт куы федтон, уæд мæхицæн загътон, ирон кафты традицийæн стыр æмæ фидар бындур кæй ис, нæй йын фесæфæн, куыд нæй фесæфæн иннæ æгъдæуттæн дæр, афтæ. Сфæнд кодтон Марияйы театримæ Ирыстоны музыкалон цард сбæттын æмæ мæ хоимæ иумæ архайын Ирыстоны рæсугъд аивады фидæнæн, — дзырдта Гергиты Валери. — Не ‘ххуысы хай хæсдзыстæм республикæйы культурон цардмæ дæр. Дисы бацыдтæн, Дыгурон театры сценæйы спектакль «Дон Жуан» сæвæрдтой, зæгъгæ, куы фехъуыстон, уæд. Ахæм труппæ ис Ирыстоны, уый æнхъæл нæ уыдтæн, уымæн æмæ ацы уацмыс сæвæрын æнцон куыст нæу. Æз фæхондзынæн Санкт-Петербургмæ ацы труппæ æмæ равдисдзысты спектакль Марияйы театры сценæйыл дæр. Уадз æмæ нæ бæстæйы стыр сахарты зоной, Ирыстон аивады куырдадз кæй у. Уый нæ программæйы чысылдæр хай уыдзæн. Разæй нæм бирæ иумæйаг хъуыддæгтæ æнхъæлмæ кæсы æмæ архайдзыстæм. Нæ бæстæйы æппæт концертон залтæ цалцæг кæнын, театртæ аразын — ахæм хæс мæхимæ райстон æмæ Ирыстоны дæр ацы фарстатæ сæххæст кæндзынæн. Уыцы бон маэстро Гергиты Валери Марияйы театры оркестримæ Дзæуджыхъæуы Оперæ æмæ балеты паддзахадон театры залы радта дыууæ концерты Мæскуыйы Куадзæны XV фестивалы программæмæ гæсгæ. Уыдонæй иу уыд хæрзаудæн концерт скъоладзаутæн, уæлдæр аивадон æмæ культурон ахуыргæнæндæтты студенттæн æмæ культурæйы минæвæрттæн. Концертты къух бакæнæн дæр нæ уыд. Залы бынат кæмæ не ‘рхауд, уыдон концерты комкоммæ трансляцимæ бакастысты, театры фæзы цы стыр экран сæвæрдтой, уым. Фестивалæн ис стыр нысан æмæ ахадындзинад. Бындур ын сæвæрдта Валери йæхæдæг фынддæс азы размæ, æмæ уæдæй фæстæмæ ссис æрвылазон. Æххæстгонд цæуы Мæскуыйы Хицауады, УФ-йы Культурæйы министрад æмæ Уæрæсейы Чырыстон дины патриарх Кириллы аудындзинадæй. Дæс азы дæргъы йæ фарсмæ æмдзу кæны, æмæ фестивалæн æххуыс кæны ВТБ банк. Ацы аз Куадзæны фестиваль арæзт цæуы Сергей Прокофьевы райгуырды 125 азы юбилейы номыл. «Мæн тынг фæнды, цæмæй Прокофьевы хурæфсæст музыкæ фæхæццæ уа алы хæдзармæ дæр», — загъта Валери, Мæскуыйы ацы фестиваль гом кæнгæйæ йæ пресс-конференцийы. Прокофьев йæ царды фæстаг аст азы Мæскуымæ хæстæг цы зæхбын хæдзары арвыста, уый Гергиты Валерийы зæрды ис тагъд рæстæджы бацалцæг кæнын. Фестивалы программæмæ гæсгæ ныридæгæн оркестр концерттæ радта Мæскуыйы, Америчы Иугонд Штатты, Чилийы, Мексикæйы, Кубæйы, Хъазаны, Владивостокы, Воткинскы, Ижевскы, Нижний Новгороды, Ивановойы, Сочийы, Краснодары æмæ ма сæм дарддæр дæр æнхъæлмæ кæсынц æндæр горæттæ. Æдæппæтæй Прокофьевы музыкалон уацмыстæ фехъусдзысты Уæрæсейы 52 регионы æмæ дунейы 22 бæстæйы цæрджытæ. Мингай километртæ æфсæнвæндагыл Куадзæны фестивалы поезды вагоны цæугæйæ, сæдæгай концерттæ, хæдтæхæгыл Чилийæ Мæскуымæ ссæдз сахаты уæлдæфы тæхгæйæ, аэропортæй пресс-конференцимæ, уырдыгæй спектакльмæ æмæ афтæ дарддæр — æгæрон аивадонкультурон, сфæлдыстадонхæрзаудæн дугъы æрвиты йæ цард Гергиты Валери. Æмæ уымæй у амондджын ирон лæджы фарн кадимæ хæссæг!
ХЕТÆГКАТЫ-УАНИТЫ Оксанæ,
САУТÆТЫ Тамилæ
