Дзæуджыхъæуы футболон командæ «Алани» Уæрæсейы профессионалон футболон клубты чемпионатæй иппæрд кæй æрцыд, уый Ирыстоны спортуарзджытæн уыд зæрдæнизау уæззау хабар.
Абон кæд 2-аг лигæйы нæ ног командæ «Спартак» хъазы, уæддæр футболуарзджыты фæнды, цæмæй йæ фарсмæ Уæрæсейы профессионалон клубты ‘хсæн хъуыса «Алани»-йы ном дæр. Уыцы зондæй нæ зындгонд футболисттæ Джиоты Инал, Пагæты Артур, Олег Корниенко æмæ се ‘ххуысгæнджыты хъæппæрисæй «Алани»-йы номимæ арæзт æрцыд ног командæ. Кæй зæгъын æй хъæуы, уымæн нырма нæй профессионалон клубы ном, фæлæ йæ саразджыты ныфс ис, куыдфæстæмæ сæ къæхтыл кæй слæудзысты, æмæ та «Алани» нæ бæстæйы чемпионаты фидар бынат кæй æрцахсдзæн. Цæмæй ахæм фæндтæ сæххæст уой, уый тыххæй хъæуы æмбæлгæ уавæртæ саразын, æмæ сын уымæй нæ республикæйы Сæргълæууæджы хæстæ рæстæгмæ æххæстгæнæг Битарты Вячеславы фæндмæ гæсгæ, зæрдæ æвæрынц Уæрæсейы Паддзахадон Думæйы депутат Мæхъиты Зураб, Олимпаг хъæзтыты 3 хатты уæлахиздзау Таймазты Артур æмæ ма цалдæр амалхъом адæймаджы. Нырма уал ног «Алани» хъазы Уæрæсейы Хуссайраг зонæйы 3-аг лигæйы командæты чемпионаты. Нæ командæйæ уæлдай ма ам хъазынц: Ростов-Доны «Ростсельмаш», Мæхъæлы республикæйы командæ «Магас», Налцыччы «Спартак-2», Астраханы «Волгарь-2», Дагестаны дыууæ командæйы «УОР-Каспийск» æмæ «Анжи-Академия». Нæ командæйы хъазынц футболон скъолатæ «Юность» æмæ «Спартачы» хъомылгæнинæгтæ. Сæ фылдæр сты 17-19-аздзыд лæппутæ, фæлæ сæ фарсмæ сты, фылдæр фæлтæрддзинад кæмæ ис, ахæм цалдæр футболисты: Мæхъиты Валери, Мæргъиты Руслан, Талмæсты Олег, Гæззаты Азæмæт. «Алани»-йы дыккаг тренер Мерденты Руслан куыд зæгъы, афтæмæй фæсивæд тынг зæрдиагæй кусынц сæхиуыл. «Пагæты Артуры разамындæй нæ æрыгон лæппутæ цыбыр рæстæгмæ зынгæ фæмидисджындæр кодтой сæ хъазт. Кæй зæгъын æй хъæуы, нырма нæ бирæ кусын бахъæудзæн, цæмæй нæ размæ æвæрд хæс сæххæст кæнæм, уый тыххæй, фæлæ нæ ныфс ис, зонæйы 3-аг бынатæй дæлдæр кæй нæ уыдзыстæм, уымæй. Афтæ куы рауайа, уæд иннæ аз нæ бон уыдзæн 2-аг къорды чемпионатмæ рацæуын», — зæгъы Мерденты Руслан. Мердены-фырт куыд зæгъы, афтæ куы рауайа, уæд нæ республикæйы номæй Уæрæсейы 2-аг къорды чемпионаты хъаздзæн дыууæ командæйы: «Спартак» æмæ «Алани». Ахæм уавæры нæ æрыгон футболисттæн фылдæр гæнæнтæ фæуыдзæн сæ дæсныдзинад бæрзонддæр кæнынæн. Уый та пайда уыдзæн куыдфæстæмæ нæ кæддæры футболон командæ «Спартак-Алани»-йы кад сног кæнынæн. Нырма уал ног «Алани» акодта æртæ хъазты æмæ йæ къухы бафтыд æрмæстдæр иу очко рамбулын, фæлæ нæ æрыгон футболистты стыр фыдæбон дзæгъæлы кæй нæ уыдзæн, уый бæлвырд у. «Алани» 23 æмæ 25 августы йæхи фæзыл, стадион «Юность»-ы, акæндзæн йæ радон дыууæ хъазты. 23 августы нæ командæйы уазæг уыдзæн «УОР-Каспийск», 25 августы та — «Анжи-Академия». Дыууæ хъазты дæр райдайдзысты 17.00 сахатыл. Нæ æрыгон футболистты ныртæккæ тынг хъæуы футболуарзджыты узæлд, æмæ мах хъуамæ зивæг ма кæнæм нæ лæппуты нæ къухæмдзæгъдæй разæнгард кæнынмæ. Нæ абоны сæйраг командæ «Спартак» знон, 19 августы, йæ радон хъазт акодта Ростов-Доны командæ «СКА»-имæ. Хъазт ахицæн, нæ газеты номыр мыхуырмæ лæвæрд куы ‘рцыд, уæд, æмæ уый тыххæй бæлвырддæр бакæсдзыстут нæ иннæ номыры.
БАСКАТЫ Уырызмæг
