Партитæ бирæ сты, сæ нысан та иу — тыхджын Ирыстон

0
884

Битарты Вячеслав арфæ ракодта парламентон фракциты депутаттæн, республикæйы Сæргълæууæджы бынатмæ йæ равзарыны фæндоны фарс кæй рахæцыдысты æмæ йыл кæй æууæндынц, уый тыххæй, стæй бæстон æрдзырдта 2017 азмæ Цæгат Ирыстоны райрæзты иумæйаг пъланыл æмæ, республикæйы Сæргълæууæджы хæстæ цы авд мæйы дæргъы æххæст кодта, уыцы рæстæгмæ къухы цы саразын бафтыд, уый тыххæй. Куыд загъта, афтæмæй уыцы рæстæгмæ республикæйы паддзахадон хæс фæфылдæр 20 процентæй, фæлæ уый уымæн афтæ рауад, æмæ федералон социалон программæтæ æххæст кæнынæн республикæ афæдзы райдайæны хæс кæй дардта æмæ адæмы раз уыцы социалон хæс сæххæст кæнынæн цыбырæмгъуыдмæйы кредиттæн æнæисгæ кæй нæ уыд, уый тыххæй. Фæлæ уыдон дæр фыст æрцыдысты, æмæ ныр, сентябрæй фæстæмæ, ахæм кредиттæ исыны сæр нал бахъæудзæн. 2017 азмæ республикæ хъуамæ бакъахдзæф кæна, хæстæ нæ даргæйæ, æмæ, Битары-фырты ныхасмæ гæсгæ, хъуамæ афтæ бацархайæм, цæмæй дарддæр дæр республикæ цæра æнæ хæстæ исгæйæ. Битарты Вячеслав куыд загъта, афтæмæй Парламентмæ бавдисынмæ цæттæ сты республикон бюджетмæ бахæссинаг ивддзинæдтæ, æмæ сæ депутаттæ куы сфидар кæной, уæд республикæйы паддзахадон хæс ноджы фæкъаддæр уыдзæн. Республикæйы разамонæг ма куыд бафиппайдта, афтæмæй фæстауæрцы мадзæлтты фæрцы бантыст республикæ экономикон къуырцдзæвæнæй ракæнын. Фидæны пълантыл дзургæйæ, Битарты Вячеслав загъта, фыццаджыдæр, кæронмæ ахæццæ кæнын кæй хъæуы, раздæры азты кæй райдыдтой, уыцы куыстытæ æмæ арæзтæдтæ, се ‘хсæн — скъолатæ, фæндæгтæ æмæ а.д. Йæ хъуыдымæ гæсгæ, республикæйы фидæны Сæргълæууæг йе ‘ргом хъуамæ аздаха, карз нозт уадзæг куыстуæттæ æфтиæгтæ бюджетмæ куыд хæссынц, уыцы фарстамæ. Карз нозт уадзæг куыстуæттæ цæсгомджынæй куы кусой, уæд сæ бон у бюджетмæ афæдзмæ хæссын æппынкъаддæр 3-4 миллиард сомы, стæй уымæй дæр фылдæр. Битарты Вячеслав фæсидт депутаттæм, цæмæй разæнгарддæрæй архайой республикæйы бюджет аразыны хъуыддаджы. «Хъуамæ нæм уа нæ республикæйы райрæзты пълан, стæй экономикæйы алы къабазы дæр райрæзты программæ», — загъта Битары-фырт. Йæ нысантыл дарддæр дзургæйæ, загъта, стыр куыст кæй цæудзæн промышленность, хъæууон хæдзарад, хомаггуыстгæнæг промышленность рацаразыныл æмæ сын алывæрсыг æххуыс кæныныл. Дарддæр æмгуыст цæудзæн Уæрæсейы «Ростех»-имæ, цæмæй нæ республикæйы æфсæддон æмæ хъахъхъæнынадон комплексы заводтæ ногæй скусой, уый тыххæй. Куыст цæудзæн инвесторты æргом нæ республикæмæ æрбаздахыныл дæр. Уыцы нысанимæ Битарты Вячеславæн уыд фембæлдтытæ Уæрæсейы Æфснайæн банчы правленийы сæрдар Герман Грефимæ æмæ зындгонд экономист, «Граждайнаг хъæппæристы комитет»-ы сæрдар Алексей Кудринимæ. Куыд баныхас кодтой, уымæ гæсгæ уыдон аргъ скæндзысты нæ республикæйы экономикон уавæрæн æмæ бацамондзысты къуырцдзæвæнæй йæ ракæныны мадзæлттæ. Уымæй уæлдай Битарты Вячеслав ма депутаттæн радзырдта, нæ республикæйы Хицауад авд мæйы дæргъы цы куыст бакодта, уый тыххæй дæр. Куыд загъта, афтæмæй Хицауады уæнгтæ бацæттæ кодтой, ныридæгæн экспертизæ чи ацыд æмæ бæлвырдæй федералон программæты чи архайдзæн, 90 ахæм проекты. Ныртæккæ ма куыст цæуы 50 æндæр проектыл, æмæ уыдон дæр се ‘ппæт кæд нæ, уæддæр дзы кæцыдæртæ хаст æрцæудзысты федералон программæтæм. «Нæ республикæйы экономикæ йæ къæхтыл слæууыны къахдзæфтæ уадз æмæ уой гыццыл, фæлæ бæлвырд æмæ æцæг», — загъта Битарты Вячеслав. Дарддæр Битарты Вячеслав дзуапп радта, дыууæ партийы минæвæртты фæрстытæн дæр. Уыдон Битарты Вячеславæн зæрдæ бавæрдтой, республикæйы æмæ йæ адæмы хорздзинадæн нырмæ куыд цæсгомджынæй æмæ хиуыл нæ ауæрдгæйæ куыста, дарддæр дæр афтæ куы куса æмæ фидар къахдзæфтæ куы кæна, уæд йæ фарсмæ кæй уыдзысты æмæ алы фарста дæр иумæ лыг кæй кæндзысты, иумæ кæй кусдзысты, уымæй. Уымæн æмæ партитæ бирæ сты, Ирыстон та у иу.

ДЕДЕГКАТЫ Зæлинæ

ОСТАВЬТЕ ОТВЕТ

Please enter your comment!
Please enter your name here