Раст зæгъын хъæуы — ницæмæн. Фæлæ, зæгъæм, Швейцари кæнæ Италийы къофийæ нæ цух кæнынц суанг гыццыл сывæллæтты дæр. Кæм ис æцæгдзинад, фæрсынц газеткæсджытæ.
Уæрæсейы Хæлцады наукон-иртасæн институты ахуыргæндтæ куыд зæгъынц, афтæмæй къофи сывæллоны æппындæр ницæмæн хъæуы. Нæ хъæуы дæр нæ, фæлæ йæ сывæллон нуаза, уымæн гæнæн æппындæр нæй, уымæн æмæ сывæллонæн йæ нервыты системæ нырма нæма сфидар æххæстæй, къофи та йæ кæны знæт, æмæ сывæллон фæллайы, мæллæг кæны. Уымæй уæлдай, къофи организмæй æддæмæ суры, æнæуи дæр фаг чи нæ кæны, уыцы хъæугæ микроэлемент — кальций, стæй æгæр стыр уаргъ æвæры зæрдæйы куыстыл. Къофийæ уæлдай, сывæллонæн нуазынмæ нæ бæззынц: энергетикон нозт — кофеинæй уæлдай ма уыдоны ис æндæр карз стимулятортæ — таурин æмæ æндæртæ; сывæллон сыл тагъд ацахуыр вæййы; уыдонæй пайда кæнын æркæны зæрдæ æмæ дадзинты системæйы хæлдмæ æмæ неврологион ивддзинæдтæм; адджын дæттæ — «кола», пакетты сок, газ кæм ис, ахæм дæттæ — се ‘ппæты дæр ис бирæ калоритæ, тынг бирæ сæкæр; уыдон уæлдай уаргъ æвæрынц ахсæныбын рæзынæгыл, расайынц аллерги, халынц дæндæгтæ; газ халы тъæнгты куыст, гæнæн ис, æмæ расайа гастрит; карз нозт — уым цы маргхъæстæ буаргъæдтæ ис, уыдон, кæй зæгъын æй хъæуы, сывæллоны æппындæр нæ хъæуынц. Ныр та, сывæллонæн нуазынмæ чи бæззы, уыдон: æхсыр — æхсыры иу агуывзæ æххæст кæны, сывæллоны организмы чи хъæуы, æппæт уыцы макро æмæ микроэлементтæ; гранаты сок кæнæ туацъы нæмыджы фыхдон — сæ дыууæйы дæр ис тынг бирæ пайдайаг витаминтæ æмæ минералтæ; туаг æхсырæй конд нуазинæгтæ (къæпы æмæ æндæртæ) — нывыл кæнынц тъæнгты куыст æмæ сæ микрофлорæ, æххæст кæнынц, дæндæгты æмæ стджыты рæзтæн афтæ ахсджиагæй чи хъæуы, кальцийы уыцы æвæрæнтæ организмы.
