Ацы бонты Уæрæсейы Федерацийы горæтхъæбатырты æмæ Хæстон намысы горæтты арæзт цæуынц Фыдыбæстæйы Хъæбатырты ном æрæмысыны, кад сын скæныны фæдыл бæрæгбæттæ.
Знон хъæбатыртæн кадгæнæн мадзæлттæ арæзт æрцыд Хæстон намысы горæт Дзæуджыхъæуы дæр. Бæрæгбонон сæйраг мадзал РЦИ-Аланийы Национ музей æмæ Ветеранты советы хъæппæрисæй уыдис Национ музейы равдыстытæ аразæн залы Дзæуджыхъæуы, Горькийы уынджы 8-æм бæстыхайы. Ардæм æрбацыдысты Фыдыбæстæйы Стыр хæсты архайджытæ æмæ ветерантæ, горæты 1æм, 38-æм, 46-æм, 14-æм, 7-æм, 29-æм, 18-æм æмæ æндæр скъолаты ахуырдзаутæ æмæ ахуыргæнджытæ, гимназтæ «Диалог» æмæ 16-æм, стæй скъола «Эрудит»-ы, Ираныхъæу æмæ Змейкæйы станицæйы дыккæгæм скъолайы ахуыргæнинæгтæ, Колыты Аксойы номыл чырыстон скъолайы хъомылгæнинæгтæ, Фæсивæды æфсæддон-патриотон хъомылады центр, тохы быдыры хъæбатырæй чи фæмард ирыстойнаг уыцы Хъæбатырты хæстæджытæ, æхсæнады минæвæрттæ. Мадзал амонæг, артист Кокойты Андрей, фыццаг ныхасы бар радта РЦИ-Аланийы Ветеранты советы сæрдар, авиацийы инæлармайор Къаболаты Солтанæн. Уый лæмбынæг радзырдта Уæрæсейы Федерацийы æппæты æрыгондæр бæрæгбон — Фыдыбæстæйы Хъæбатырты боны историйы тыххæй. Залы уæвæг рæзгæ фæсивæдæн — Райгуырæн бæстæйы фидæны патриоттæн — бæрæгбоны фæдыл арфæ ракодта Фыдыбæстæйы Стыр хæсты архайæг, хæсты æмæ фæллойы вентеран, республикæйы Ветеранты советы уæнг, Сталинграды хæсты архайæг Магкаты Исрафил. Уыцы бон скъоладзау чысыл лæппутæ æмæ чызджытæй бирæтæ бацыдысты Уæрæсейы сывæллæтты æхсæнадон организаци «Скъоладзауты уæрæсейаг змæлд»-ы рæнхъытæм, сæ организацийы ард бахæргæйæ. Хæсты æмæ фæллойы ветерантæ сын сæ хъуырыл бабастой галстуктæ, стæй семæ систой зæрдылдарæн къам. Бæрæгбонон мадзалы уыдис концертон программæ дæр. Залы азæлыдысты ивгъуыд рæстæджыты хъæбатырты тыххæй, «Журавли», «Поклонимся великим тем годам» æмæ æндæр зындгонд зарджытæ. Азарыдысты сæ республикæйы Мидхъуыддæгты министрады зарæггæнджыты ансамбль, РЦИ-Аланийы адæмон артист Дауыраты Эдуард, зындгонд зарæггæнджытæ Дзахойты Зæлинæ, Езеты Игорь æмæ иннæтæ. Ахуырдзаутæ кастысты патриотон æмдзæвгæтæ, зарыдысты. Амонæг Уæрæсейы ирыстойнаг цыппæрдæс Хъæбатырæй алкæй тыххæй дæр æрдзырдта, разæй æвæрд экраныл-иу сæ портреттæ куы фæзындысты, уæд. Фæстагмæ та дзы разынд «Свеча на ладони». Мадзалы чи уыд, уыдон минут æдзæмæй алæууынæй ссардтой æдзард хъæбатырты ном. ххх Знон Фыдыбæстæйы Хъæбатырты бон махмæ, Ирыстоны, райдыдта Советон Цæдисы дыууæ хатты Хъæбатыр, Манголы Алæмон Республикæйы Хъæбатыр, æфсады инæлар Плиты Иссæйы цыртдзæвæны разæй. Ардæм æрбацыдысты Дзæуджыхъæуы администрацийы кусджытæ, 21æм астæуккаг скъолайы коллектив, дзыллон-хабархæссæг фæрæзты кусджытæ… Раныхас дзы кодтой Дзæуджыхъæуы бынæттон хиуынаффæйады администрацийы сæргълæууæджы хæдивæг Гозымты Раман, Уæрæсейы Хъæбатыр Андрей Днепровскийы мад Татьянæ Днепровская, Уæрæсейы Хъæбатыр дæлбулкъон Джафаров. Скъоладзаутæ азарыдысты патриотон зарæг æмæ сатæг уæлдæфы суагътой дæсгай уæлдæфон тымбылæгтæ.
БАГАТЫ Аврам
