Алы адæймаг дæр Ног азы æрцыдмæ иннæ бæрæгбонтимæ абаргæйæ уæлдай тынгдæр фенхъæлмæ кæсы. Йæ размæ сæвæры ног фæндтæ, ног хæстæ æмæ афæдзы дæргъы сæ сæххæст кæныныл фæархайы. Ивгъуыд азы тыххæй та скæны йæхицæн цавæрдæр хатдзæгтæ. Цы йын бантыст, цы скодта хорзæй, æви искæй зæрдæхудты бацыд…
Афтæмæй, ивгъуыд 2016 азы дæргъы йæ куысты чи фесгуыхт, ахæм адæймæгтæн арфæ ракæныны æмæ сæ Кады гæххæттытæй, æндæр хæрзиуджытæй схорзæхджын кæныны тыххæй нæ республикæйы Сæргълæууæг Битарты Вячеслав знон бабæрæг кодта Кировы æмæ Рахизфарсы районтæ. Дыууæ районы дæр уыцы æхсызгон цаутæм сæхи бацæттæ кодтой. Сфæлыстой назбæлæстæ, хорзæхджын кæй кодтой, уыдонæн æрæвæрдтой фынгтæ. «Уæ бон хорз уе ‘ппæтæн дæр. Æвæццæгæн, алы адæймагæн дæр æхсызгон вæййы, йæ куысты тыххæй йын хъæугæ аргъ куы скæнынц, уæд. Уымæ гæсгæ, Кировы æмæ Рахизфарсы районты разамындимæ бауынаффæ кодтам, цæмæй хуыздæрты хуыздæрты фæбæрæг кæнæм…» — загъта Битарты Вячеслав, районты цæрджытæн арфæ кæнгæйæ. Дарддæр Кировы районы фæллойгæнджыты схорзæхджын кодта ахæм кадджын хæрзиуджытæй: «РЦИ-Аланийы сгуыхт дохтыр»-ы кадджын ном райста Кировы районы центрон рынчындоны дохтыр Золойты Юлия; «РЦИ-Аланийы хъæууонхæдзарады сгуыхт кусæг»-ы ном райста хъæууонхæдзарадон кооператив «ДеГусто»-йы механизатор Чеджемты Эдуард; РЦИАланийы Кады грамотæйæ хорзæхджынгонд æрцыдысты: арендатор Рубайты Вячеслав, Змейкæйы хъæуы комплексон социалон æххуысы кусæг Мæргъиты Еленæ, Дунейы æртæ хатты чемпион паратхэквондойæ Гæззаты Спартак. Рахисфарсы районы та хорзæхджынгонд æрцыдысты: «РЦИ-Аланийы промышленносты сгуыхт кусæг»-ы номæй — организаци «Бесланспецсервис»-ы æндадзæг Анатолий Ситников; «РЦИАланийы цæрæнуæтты-коммуналон хæдзарады сгуыхт кусæг»-ы ном лæвæрд æрцыд «Экосервис» -ы тракторист Гуыбиаты Ахтарбегæн; «РЦИ-Аланийы хъæууонхæдзарады сгуыхт кусæг»-ы ном райста кооператив «Дон»-ы механизатор Виктор Кудре; РЦИ-Аланийы Кады грамотæтæй хорзæхджынгонд æрцыдысты: «Экосервис»-ы мæрзæг Наталья Дейнега; куыстуат «Водопроводноканализационное хозяйство»-йы слесырты бригадир Золойты Сергей æмæ Беслæныхъæуы 10-æм рæвдауæндоны кæстæр хъомылгæнæг Хъараты Езæ. Уымæй уæлдай ма фараст адæймаджы хорзæхджынгонд æрцыдысты республикæйы Сæргълæууæджы Кады грамотæтæй.
КАСАТЫ Аламир
