Кад — уарзон фыссæгæн

0
696

Ивгъуыд майрæмбоны РЦИ-Аланийы Национ наукон чиныгдоны кадджын уавæры сбæрæг кодтой Ирыстоны адæмон фыссæг, Уæрæсейы культурæйы сгуыхт кусæг, Хетæгкаты Къостайы номыл Паддзахадон премийы лауреат, сывæллæтты журнал «Ногдзау»-ы сæйраг редактор ДЗАСОХТЫ Музаферы æстай азы юбилей. Юбилярæн раарфæ кæнынмæ æрбацыдысты фысджытæ, поэттæ, республикæйы уæлдæр хицауад æмæ æхсæнады минæвæрттæ.

Дзасохты Музафер ирон литературæйы райрæзтмæ цы стыр æвæрæн бахаста, уый тыххæй йæ раныхасы загъта нæ республикæйы Сæргълæууæг Битарты Вячеслав æмæ йæ схорзæхджын кодта майдан «Ирыстоны Намыс»-æй. Юбиляры цард æмæ поэтикон сфæлдыстады тыххæй радзырдта Ирыстоны фысджыты æмсæрдар Ходы Камал. Ацы зæрдæмæдзæугæ æмæ зæрдылдаргæ изæр цы чиныгдоны кусджытæ бацæттæ кодтой, уыды номæй юбилярæн раарфæ кодта на республикæйы адæмон поэт Гуырдзыбеты Иринæ. Фæбæрæггæнинаг у уый дæр, æмæ Дзасохты Музаферæн стыр кад скодтой йæ уарзон Æрыдоны районы цæрджытæ сæ сæргълæууæг Тотраты Владиславимæ. «Дзасохты Музафер стыр æвæрæн бахаста айдагъ ирон литературæмæ нæ, фæлæ нæ районы райрæзтмæ дæр», — загъта Тотраты Владислав. Изæр се сфæлдыстад æмæ аив зардæй барæсугъд кодтой нæ республикæйы хъуыстгонд æмæ бирæтæн уарзон артисттæ — Дауыраты Эдуард, Гæджынаты Руслан, Дзуццаты Сослан, Илурты Риммæ, Будайчиты Сухраб, Цæгат Ирыстоны паддзахадон филармонийы зарæггæнджыты хор, сæ аивадон разамонæг æмæ дирижер Дзанайты Ольгæ. Музаферы æмдзæвгæтæ бакастысты йæ райгуырæн хъæу Бæрæгъуыны скъолайы ахуырдзаутæ. Кæронбæттæны юбиляр æппæт æрбацæуджытæн арфæ ракодта, ахæм стыр кад ын кæй скодтой, уый фæдыл. Се ‘ппæтæн дæр загъта зæрдиаг бузныг. Музафер, юбилейтæ хорз сты. Уымæй хуыздæр та у, адæм дын кад куы кæной, уæд. Адæм дын стыр кад кæнынц æмæ сæ фарнæй хайджын у. Адæмы фарн та бирæ у. Æмæ дæ развæлгъау хатыр курын, дæ 90 азы юбилеймæ мын нæ бантысдзæн фæзынын: хъуыддаджы фæдыл Ирыстонæй дард уыдзынæн. Фæлæ дын ныхас дæттын, дæ 100 азы юбилей куы бæрæг кæнай, уæд уым, æнæмæнг, сæмбæлдзынæн!

КАСАТЫ Аламир

ОСТАВЬТЕ ОТВЕТ

Please enter your comment!
Please enter your name here