УФ-йы Президенты премитæ

0
570

Зындгонд куыд у, афтæмæй ацы бонты нæ республикæйы цыд æвзонг иртасджыты 14-æм регионалон конкурс «Наукæмæ къахдзæф». Цы фæсивæд дзы архайдта, уыдон сæ зонындзинæдтæ æвдыстой бæлвырд темæйыл фыст, сæ рефераттæ æмæ докладтæ хъахъхъæдтой наукæйы алы къабазæй. Конкурсы алы архайæг дæр зæрдиагæй бацархайдта, цы фарстайы фæдыл фыста йæ иртасæн куыст, уый уæрæхæй раргом кæныныл, йæ доклады æмæ рефераты ахадындзинад æмæ нысан цæй мидæг ис, уый равдисыныл.

Æрыгон иртасджыты куыстытæм кастысты нæ республикæйы уæлдæр ахуырады скъолаты ахуыргæндтæ, наукæты кандидаттæ, доктортæ, профессортæ. Знон Сывæллæтты сфæлдыстады республикон галуаны уыд æрыгон иртасджыты 14-æм регионалон конкурс «Наукæмæ къæпхæн»-ы уæлахиздзаутæн æмæ Национ проект «Ахуырады фæлгæты Уæрæсейы Федерацийы Президенты премийы аккаг фæсивæд»-æн кадгæнæн изæр. Ирыстоны курдиатджын, ахуырмæ тырнæг фæсивæдæн арфæ кæнынмæ æрбацыдысты РЦИ-Аланийы Хицауады Сæрдар Тускъаты Таймураз, ахуырады æмæ наукæйы министры хæстæ рæстæгмæ æххæстгæнæг Иринæ Азимова, Ахуырады кусджыты республикон профцæдисты, Дзæуджыхъæуы бынæттон хиуынаффæйады администрацийы, фæсивæды хъуыддæгты республикон комитеты бæрнон кусджытæ. Кадджын æмбырды райдайæны фæсивæдæн йæ арфæйы ныхасы Тускъаты Таймураз загъта: — Абон мах кад кæнæм, нæ бæстæйы æмæ Ирыстоны фидæн кæмæ æнхъæлмæ кæсы, уыцы фæсивæдæн. Ныфс мæ ис, кæй сæ рауайдзæн сомбон хорз дохтыртæ, ахуыргæнджытæ, аразджытæ, наукæйы, аивады æмæ царды æндæр къабæзты минæвæрттæ. Хорз специалисттæ кæй суыдзысты, уый ныртæккæ дæр бæрæг у. Бузныг мæ зæгъын фæнды, фæсивæды зонадон бæрзæндтæм чи хоны, иртасæн куыстмæ сæ разæнгард чи кæны, уыцы ахуыргæнджытæн. Æнтыстджын уæд сæ рухстауæн куысты. Уый фæстæ Тускъайыфырт кадджын уавæры радта УФ-йы Президенты премийы æвдисæндартæ. Уыдон сты скъоладзаутæ, студенттæ æмæ аивады фыццаг, фæлæ æнтыстджын къахдзæфтæ чи кæны, ахæмтæ. Æдæппæт сты æртындæс лæппу æмæ чызджы. Цыппæрдæсæм регионалон конкурс «Наукæмæ къæпхæн»-ы уæлахиздзаутæн (сты 100 фылдæр) зæрдиаг арфæтæ ракодта æмæ дипломтæ радта Иринæ Азимова. Ацы конкурс арæзт æрцæуы Ахуырад æмæ наукæйы министрады, ЦИПУ-йы, Ахуыргæнджыты зонындзинæдтæ фылдæргæнæн республикон институты æмæ Сывæллæтты сфæлдыстады республикон галуаны иумæйаг хъæппæрисæй. Æхсызгон ма уый у, æмæ азæй-азмæ конкурсы архайджыты нымæц кæй рæзы, сæ зонадон куыстыты мидис та кæны хъæздыгдæр. Конкурсы уæлахиздзауты сæрмагонд лæвæрттæй бабуц кодта ахуырады кусджыты республикон профцæдисты разамынд дæр. Кадджын æмбырды сæ курдиат равдыстой Сывæллæтты сфæлдыстады республикон галуаны аивадон къордты артисттæ.

ГАСАНТЫ Валери
Къамтæ систа КЪÆБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here