Дзæуджыхъæуы уынгтæй иу банывыл кæндзысты парти «Иугонд Уæрæсе»-йæ депутаты хъæппæрисæй.
Бирæ азты дæргъы кæй нæ цалцæг кодтой, Дзæуджыхъæуы Колыйы-фырты уыцы уынджы цæрæг адæм горæты Минæвæртты æмбырды депутат Джыбылаты Хъазыбегæн куырдтой амынд уынг банывыл кæнын. Уынджы асфальт уæлцъар дзыхъхъытæ æмæ къуыппытæй байдзаг, бирæ рæтты баихсыд, транспорт æмæ фистæг бæлццæттæ фæндагыл цæуынц зынтæй. — Адæм Колыйы-фырты уынджы уавæрæй рагæй кæй хъаст кæнынц, уымæ гæсгæ ацы азæн горæты бюджет цæттæ кæныны рæстæг æм æмбæлгæ ивддзинæдтæ бахастам. Ацы аз уынджы 700 метры дæргъæн хай бындуронæй сцалцæг кæндзыстæм. Бюджет ацы куыстытæн рахай кодта 5,5 милуан сомы, — загъта Джыбылаты Хъазыбег. Ныридæгæн фæндагаразджытæ зæронд бордюртæ халынц, фæстæдæр та фæндаджы зæронд асфальт уæлцъар исын райдайдзысты. Арæзтадон кусæндоны минæвары ныхасмæ гæсгæ, мæймæ уынг цалцæггонд æрцæудзæн.
