Цæгат Ирыстоны паддзахадон медицинон академийы уыд денталон имплантологийы XVIII æппæтуæрæсеон конгресс.
Нæ бæстæйы хуыздæр æмæ хъуыстгонддæр стоматологтæ æрæмбырд сты Дзæуджыхъæуы, цæмæй æрныхас кæной, стоматологийы къабазы абон цы ногдзинæдтæ фæзынд, уыдоныл, алчидæр сæ цæмæй радзура, йæ къухы цы æнтыстытæ бафтыд, уый тыххæй, стæй, сæ фæлтæрддзинадæй цæмæй фæхай кæной æрыгон дохтыртæ æмæ хистæр курсыты студенттæн. Конгрессы архайджытæн зæрдиаг æгасцуай загъта æмæ, сæ куыст æнтыстджын æмæ цымыдисаг куыд рауайа, уыцы арфæ сын ракодта Цæгат Ирыстоны паддзахадон медицинон академийы ректор Олег Ремизов. Конгрессыы архайджытæ уыдысты Уæрæсейы раззагдæр медицинон институтты минæвæрттæ: Стоматологон имплантологийы уæрæсейаг ассоциацийы президент, Бурназяны номыл федералон медицинон биофизикон центры стоматологийы кафедрæйы сæргълæууæг, медицинон наукæты доктор, профессор Валентинæ Олесова; Владимирскийы номыл Мæскуыйы облæсты наукон-иртасæн клиникон институты дохтырты зонындзинæдтæ фылдæр кæныны факультеты профессор, клиникæ «Мегастом»-ы сæйраг дохтыр Алексей Шарин, стæй ацы наукон-иртасæн клиникон институты дохтырты зонындзинæдтæ фылдæр кæныны имплантологи æмæ хирургион стоматологийы кафедрæйы сæргълæууæг, медицинон наукæты доктор Малкан Ахмадова; Адæмты Хæлардзинады Уæрæсейы университеты (РУДН) медицинон институты хирургион стоматологи æмæ цæсгомы хирургийы кафедрæйы профессор, медицинон наукæты доктор Святослав Сысолятин; Сеченовы номыл фыццаг паддзахадон медицинон университеты хирургион стоматологийы кафедрæйы сæргълæууæг, профессор, медицинон наукæты доктор Светланæ Тарасенко; Налцыччы Стомато- логийы, пластикон хирурги æмæ цæсгомы хирургийы наукон-практикон центры сæйраг дохтыр, профессор, медицинон наукæты доктор Магомет Мустафаев; Уæрæсейы Федералон медицинон-биологион агентады зонындзинæдтæ фылдæр кæныны институты æнæниздзинад хъахъхъæнынады къабазы маркетинг æмæ эконо- микæйы кафедрæйы профессор, экономикон наукæты доктор Артемий Олесов; Уæрæсейы наукæты академийы уæнгуацхæссæг, медицинон наукæты доктор, профессор Сергей Иванов æмæ иннæтæ.
Алчидæр сæ бакаст лекци, дæндæгтæ æвæрыны къабазы фæстаг рæстæг цы раззагдæр гæнæнтæ фæзынд, уыдонæй хуыздæр куыд пайда кæнын хъæуы, цæмæй сæ рынчынæн финансон æгъдауæй сæ бон уа разæнгарддæрæй пайда кæнын, æппæт уыдæтты фæдыл.
Конгрессы куысты фæдыл ныхас кæнгæйæ, медицинон академийы ректор Олег Ремизов загъта:
— Денталон имплантологийы ахæм конгресс арæзт цæуы 18 азы дæргъы, æмæ фылдæр хатт вæййы фæсарæйнаг бæстæты, уыимæ арæх дæр нæ вæййы — фондз азмæ иунæг хатт. Стоматологийы ацы къабазы дæсныдæр æмæ хъуыстгонддæр дохтыртæ æмæ ахуыргæндтæ æрбамбырд вæййынц æмæ æрныхас кæнынц денталон имплантологийы ахсджиагдæр фарстатыл, стæй дзы цы ногдзинæдтæ базонынц, уыдонæй царды пайда кæнын райдайынц. Уымæ гæсгæ ацы хатт ахæм егъау форум Дзæуджыхъæуы арæзт кæй цæуы, уый махæн у стыр æнтыст. Стоматологтæ Ирыстоны ис бирæ, æмæ сæ зонындзинæдтæ фылдæр кæныны хъуыддаджы ахæм конгрессæн ис стыр ахадындзинад. Уымæ гæсгæ Уæрæсейы имплантологты ассоциацийæ мах бар ракуырдтам, цæмæй ацы хатт арæзт æрцæуа Цæгат Ирыстоны, нæ медицинон академийы. Æрцыдысты нæм стоматологийы ацы къабазы архайæг хъуыстгонддæр æмæ тæккæ хуыздæр дохтыртæ, куыд профессортæ, хистæр кары специалисттæ, афтæ æрыгæттæ дæр — Мæскуыйæ, Налцыккæй, Дагестанæй, Стъараполæй, Краснодары край æмæ Волгограды облæстæй. Уыдон сты ортопедтæ, хирургтæ, цæсгомы хирургтæ æмæ имплантологтæ. Конгрессы архайджытæ сæ куысты фæдыл цы резолюцитæ æмæ амынддзинæдтæ рахæссой, уыдон мыхуыргонд æрцæудзысты, Денталон имплантологиты ассоциаци, «Вестник дентальной имплантологии», зæгъгæ, цы журнал уадзы, уым, цæмæй уыцы амынддзинæдтæй пайда кæнын сæ бон уа æппæт дохтыртæн дæр.
Стоматологийы ацы къабазы сусæгдзинæдтæ базоныныл ныридæгæн нырма чи архайы, уыцы студенттæн ахæм мадзæлттæ цы пайда сты, зæгъгæ, ацы фарстæн дзуапп дæтгæйæ, Олег Ремизов загъта:
— Стоматологийы факультеты студенттæн ис, дæсныдæр дохтырты ‘хсæн конгрессы фæлгæты цы профессионалон чемпионат арæзт æрцæудзæн, уымæ лæвар бакæсыны бар æмæ бæлвырд клиникон дæнцæгтыл фенын, стоматологийы къабазы цы нырыккондæр æнтыстытæ фæзынд, уыдон. Иу ныхасæй, стоматологийы къабазы лæггæдтæ ноджы фæхуыздæр кæнын æмæ сæ адæммæ фæхæстæгдæр кæныны фарста лыг кæныныл архайаг ахæм егъау конгресс ирыстойнаг дохтыртæ-стоматологтæ æмæ имплантологтæн сæ куысты стыр пайда кæй уыдзæн, уый у бæлвырд.
ДЕДЕГКАТЫ Зæлинæ
