«Иры Стыр Ныхас»-ы сӕрдар КУЧИТЫ Руслан ӕмӕ йӕ хӕдивджытӕ ЕНАЛДЫТЫ Хъазыбег ӕмӕ ЗӔГЪОЙТЫ Вячеславы хъӕппӕрисӕй арӕзт ӕрцыд цӕлхӕмбырд республикӕйы ӕхсӕнадон змӕлдтытӕ ӕмӕ органи- зациты сӕргълӕуджытимӕ ахсджиаг фарстаты фӕдыл. Мадзалы сӕйраг нысан уыд кӕрӕдзимӕ ӕнгомдӕр ӕрбалӕууын ӕмӕ иумӕ, уӕхски-уӕхск бакусын нӕ фыдӕлты рӕсугъд ӕгъдӕуттӕ, ирон ӕвзаг, культурӕ ӕмӕ традицитӕ бахъахъхъӕныныл.
Ӕхсӕнадон змӕлдтыты минӕвӕрттӕ радзырдтой сӕ куысты нысантӕ ӕмӕ сыл, куыд кусынц, уый тыххӕй. Кучиты Руслан йӕ раныхасы загъта: — Ӕрмӕст Цӕгат Ирыстоны регистрацигонд ис 800 ӕхсӕнадон организацийӕ фылдӕр. Уыдонӕн сӕ размӕвӕрд нысантӕ сты республикӕйы экономикон-социалон рӕзтыл ахадын, Цӕгат Кавказы цӕрӕг адӕмыхӕттыты ‘хсӕн хӕлардзинад ӕмӕ сабырдзинад тауын. Уыдонӕй алы организаци дӕр ацы фарстатӕм, ӕнӕмӕнг, хӕссы йӕхи ӕвӕрӕн. Фӕлӕ нӕ хъарутӕ куы баиу кӕнӕм, уӕд нын фылдӕр бантысдзӕн. Сараздзыстӕм иумӕйаг программӕ нӕ дарддӕры куыстӕн. Иумӕ нӕ куыст дӕр уыдзӕн хъомысджындӕр, ӕмӕ не ‘хсӕн хӕлардзинады ахастдзинӕдтӕй рантысдзӕн ахсджиаг мадзӕлттӕ, кӕцытӕ хъуамӕ хорзӕрдӕм сахадой нӕ размӕвӕрд нысантыл. Ирон ӕвзаг ӕмӕ культурӕ бахъахъхъӕныл мах хъуамӕ бакусӕм лӕмбынӕг, фӕсарӕйнаг, уырыссаг ӕвзаг ӕмӕ культурӕ зонын дӕр куыд нӕ фӕцуда, афтӕ.
Фӕсивӕдимӕ куысты стыр ахъаз фӕуыдзӕн бинонты ‘хсӕн ахастдзинӕдты институт. Бӕлвырд куы у, Ирыстоны демографион уавӕр зӕрдӕхсайгӕ кӕй у, уый. Уымӕн та йӕ фыццаг аххосаг у нӕлгоймаг-фӕсивӕд бинонты хъуыддаг кӕй нӕ кӕнынц, сӕ цард сӕ чи баиу кӕны, уыдонӕй та бирӕтӕ цыбыр рӕстӕджы фӕстӕ кӕй ахицӕн вӕййынц, уый дӕр. Уый ууыл дзурӕг у ӕмӕ бинонты ‘хсӕн фаг нӕ цӕуы ныхас ӕмӕ куыст царды ахсджиаг хъуыддагмӕ сӕ бацӕттӕ кӕныныл.
Кӕронбӕттӕны ӕмбырды архайджытӕ иу организацийӕ фӕстӕмӕ сӕ къух бафыстой сӕ дарддӕры ӕмгуыстады разыйыл.
ХЕТӔГКАТЫ Оксанӕ
