Уæрæсейы адæмон артисткæ ГЕРГИТЫ Ларисæйы хъæппæрисæй ацы азы 14 æмæ 17 июны Цæгат Ирыстоны Оперæ æмæ балеты национ паддзахадон театры — Петербурджы Марияйы театры филиалы сценæйыл уыдзæн Альфред Шниткейы, Мурат Кабардоков æмæ Абель Коженевскийы музыкæмæ гæсгæ æвæрд балет «Портрет Дориана Грея»-йы премьерæ.
Æнусон æвзонгдзинадыл тохы хабæрттæ æвдисæг балет сæвæрдта, нæ республикæйы драмон æмæ музыкалон спектакльтæ æвæрыныл разæнгардæй чи архайы, ГИТИС кастфæуæг æрыгон кафæг Суанты Валери. Балеты нывгæнæгæвæрæг у петербургаг Варварæ Евчук.
Дориан Грейы парти зардзæн Хуыгаты Алан. РЦИ- Аланийы Оперæ æмæ балеты национ паддзахадон театры балетон къорды солисттимæ спектаклы архайдзысты Дзæуджыхъæуы Гергиты Валерийы номыл аивæдты колледжы студенттæ дæр.
Оскар Уайльды зындгонд уацмыс «Портрет Дориана Грея»-мæ гæсгæ систой цалдæр кинонывы æмæ сæвæрдтой спектакльтæ. Æнæрхъуыды лæппуйæ знæт фыдгæнæг кæй рауад, уыцы темæ кæдфæнды дæр у ахсджиаг. Фаусты фæзмгæйæ, Дориан Грейы дæр фæнды æнусон æв- зонгдзинад æмæ фидауцæй хайджын уæвын. Ацы хъуыддагæн стыр аргъ бафидын кæй хъæуы, спектакль дæр уый æвдисы.
26-æм музыкалон фестиваль «Звезды белых ночей»-ы рæстæг петербургаг аивадуарзджытæн дæр уыдзæн Цæгат Ирыстоны Оперæ æмæ балеты национ паддзахадон театры фыццаг гастролон балцы рæстæг балет «Портрет Дориана Грея» феныны фадат. Спектакль равдисдзысты 10 июлы Петербурджы Марияйы театры концертон залы. 11 июлы та Марияйы театры сценæйыл равдисдзысты Плиты Христофоры оперæ «Коста». Ацы азы 26 æмæ 28 майы йын Дзæуджыхъæуы уыд æнтыстджын премьерæ.
