РЦИ-Аланийы хъӕууон хӕдзарад ӕмӕ хойраджы министр Уазиты Хъазыбег кусӕг балцы уыд Дыгуры районы. Йемӕ уыдысты министры фыццаг хӕдивӕг Мӕрзойты Хъазыбег, министры хӕдивӕг Рубайты Ибрагим, Хъӕууонхӕдзарадон банчы генералон директор Георгий Ходаковский, РЦИ-Аланийы Россельхознадзоры управленийы филиалы разамонӕг Белыккаты Верӕ, республикӕйы сӕйраг ветеринарон дохтыр Николай Еремеев. Уазджытыл ӕхсызгонӕй сӕмбӕлдысты Дыгуры районы сӕргълӕууӕг Таболты Алыксандр,районы хъӕууонхӕдзарадон управленийы хицау Бадриты Маринӕ ӕмӕ иннӕтӕ. Дыгуры районы зӕхкусджытӕ ӕмӕ фосдарджытимӕ фембӕлды рӕстӕг ныхас цыд бирӕ вазыгджын фарстатыл, уыимӕ паддзахадон ӕххуысы тыххӕй дӕр».
— Хъыгагӕн, абон махӕн ӕмбӕлгӕ ӕмгуыстад нӕй хъӕууонхӕдзарадон продукци уадзджытимӕ. Уыцы аххосӕй уыдон нӕ зонынц, паддзахадӕй цавӕр ӕххуыс ис райсӕн, кӕнӕ та банкӕй кредит райсыны мадзӕлттӕ. Къабазы райрӕзтӕн ахъаз чи уыдзӕн, ахӕм цымыдисаг ӕмӕ пайдайаг программӕты уӕ бон архайын кӕй у, уыцы информаци сымахмӕ фӕхӕццӕ кӕнын, кӕрӕдзимӕ байхъусын у нӕ ӕрцыды сӕйраг нысан, – загъта министр.
Фидӕны республикӕ стыр ныфс кӕмӕй ӕвӕры, ахӕм ӕнтыстджын хӕдзарӕдтӕ бирӕ ис районы, уыдонӕй иу — хъӕууонхӕдзарадон кооператив «Век». Кӕнынц дзидзайы куыст, дарынц фыстӕ. Ныртӕккӕ хӕдзарады ис 700 сӕры стурвос, фӕнды сӕ ӕхсыры куыст райдайын дӕр. Йӕ фидӕны пълантӕ ӕмӕ бӕллицты тыххӕй радзырдта кооперативы сӕрдар Хӕтӕгты Артур.
-10 милуан сомы грант райсыны тыххӕй ӕппӕт хъӕугӕ документтӕ балӕвӕрдтам. Хъуыддаг куы сырӕза, уӕд ӕхсыры фермӕ саразынӕн балхӕндзыстӕм хӕрзмыггаг дыгӕрдгуытӕ,сӕ бынӕттӕ та нын цӕттӕ сты.
Цыппар азы размӕ хъӕууонхӕдзарадон кооператив «Хадати» кодта йӕ фыццаг къахдзӕфтӕ. Абон хӕдзарад у раззагдӕртимӕ нымад, сӕ быдырты ӕрзайын кӕнынц хоры хъӕздыг тыллӕг, дарынц стурвос. Хорӕфснайӕн ӕмӕ хорхусгӕнӕн сарӕзтой. Тагъд рӕстӕджы скусдзӕн, 560 сӕры кӕм уыдзӕн, ахӕм фермӕ. Куыстуаты хицау Хадаты Георги куыд зӕгъы, афтӕмӕй аргъ кӕнынц алы капеккӕн дӕр, зындзинӕдты сӕрты хизгӕйӕ ӕнӕ паддзахады ӕххуысӕй ӕнтыстджын нӕ уыдаиккой. Ивгъуыд аз лизингы фӕрцы райстой трактор «Кировец» 7,5 милуан сомы аргъӕй. Федералон субсидиты ӕххуысӕй йын йӕ иу хай бафыстой.
— Абон республикӕйы нӕхимӕ уагъд ӕхсыры продукттӕ нӕ фаг кӕны, ног фермӕ куы ӕркуса, уӕд уадздзыстӕм экологон ӕгъдауӕй сыгъдӕг продукции. Нӕхи хъарутӕ фаг не сты. Йӕ саразынӕн нӕ бахъӕудзӕн 100 милуан сомы. Льготон кредитӕй нын зӕрдӕ бавӕрдта банчы минӕвар, — загъта Георги.
Ирыстоны дыргъдӕтты куыст райрӕзын кӕнын куыд ахсджиаг у, ууыл Уазиты Хъазыбег дзырдта фермерон хӕдзарад «Езеев» бабӕрӕг кӕнгӕйӕ. 32 гектары фӕзуатыл сагъд ис фӕткъуыйы хуызтӕ, талатӕ дӕр сӕрӕн фермер йӕхи питомничы зайын кӕны.
– Республикӕйы сӕргълӕууӕджы уынаффӕмӕ гӕсгӕ арӕзт ӕрцыд Хъӕууон хӕдзарады райрӕзты комплексон программӕ, уым сӕйрагдӕртӕй иу у дыргъдӕтты райрӕзт. Раппӕлинаг у Езеейы-фырт йӕхӕдӕг талатӕ кӕй цӕттӕ кӕны,уый. Абоны домӕнтӕн дзуапп чи дӕтты, ахӕм 2-4 питомничы нӕ саразын хъӕуы, нырыккон технологитӕй пайда кӕнгӕйӕ, уый ахъаз уыдзӕн къабазы райрӕзтӕн, — фӕнысан кодта министр.
Кусӕг балцы рӕстӕг фермертӕ радзырдтой министрӕн, сӕ куысты цы къуылымпыдзинӕдтӕ ӕййафынц, уыдоны тыххӕй. Алы фарстамӕ дӕр лӕмбынӕг каст кӕй ӕрцӕудзӕн, уымӕй сын Уазиты Хъазыбег ныфс бавӕрдта .
Гагиаты Айна
