Æгас дунейы футболуарзджытæ æдзынæгæй кæсынц Уæрæсейы стадионты зæххы къорийы хуыздæр футболистты ерысмæ æмæ дзы, æвæдза, цæмæ кæсай, цæуыл дис кæнай, уый та фылдæрæй-фылдæр кæны.
Ивгъуыд къуыри сбæрæг сты, дунейы чемпионы ном рамбулыныл цы цыппар бæстæйы командæтæ тох кæндзысты, уыдон.
Футболуарзджытæ сæхи цæстæй федтой, чемпионаты æрдæгкæронбæттæнмæ бахауыныл цы ахъаззаг тох цыд, уый. 6-7-июлы чемпионаты 1/4 хайы цы цыппар хъазты федтам, уыдон уыдысты амæй-ай цымыдисагдæр æмæ хъазуатондæр. Æмæ куыннæ хъуамæ уыдаиккой, кæд æмæ дзы алы командæйы дæр уыди, æгас дунейы футболы стъалытыл кæй нымайынц, ахæм цалдæр футболисты!
Зæгъæм, Бразили æмæ Бельгийы командæтæ куы тох кодтой кæрæдзиимæ, уæд чи æнхъæл уыд æмæ, футболимæ райгуыргæ кæй хонынц, уыцы бразилиаг стыр дæснытæ: Марсело, Сильва, Фернандинью, Неймар, Коутиньо æмæ иннæты ныхмæ исчи фæлæууын бафæраздзæн. Фæлæ Бельгийы командæ ссардта ахæм æмбисонды футболистты ныхмæ фæлæууыны тых. Уый нæ, фæлæ ма ацы диссаджы рæсугъд æмæ цымыдисаг фембæлды Бельгийæн бантыст рамбулын дæр. Хъазт ахицæн 2:1 хыгъдæй Бельгийы пайдайæн æмæ дунейы 5 хатты чемпионтæ, Бразилийы футболисттæн æрдæгкæронбæттæнмæ сæ фæндаг лыггонд æрцыд.
Афтæ рауад иннæ Хуссар Америкæйы минæвар, Уругвайы командæйы турнирон хъысмæт дæр. Уругвайæгтæ фæхæрд сты Францы командæйæн 0:2 хыгъдæй.
Къаддæр цымыдисагдæр нæ уыдысты, 7 июлы чи хъазыд чемпионаты 1/4 хайы, уыцы командæты фембæлдтытæ дæр. Фыццаг Самарæйы стадионы фембæлдысты Швеци æмæ Англисы командæтæ. Сæ хъазуатон тох ахицæн Англисы командæйы пайдайæн 2:0 хыгъдæй.
Кæй зæгъын æй хъæуы, æгас Уæрæсе æмæ уыдонимæ Ирыстоны спортуарзджытæн дæр сæ хъуыдытæ фылдæр баст уыдысты, нæ бæстæйы иугонд командæ Хорватийы ныхмæ йæхи куыд равдисдзæн, уыимæ. Нæ футболисттæ уый размæ куыд хъазыдысты, уымæй стыр ныфс бауагътой сæ иузæрдион фарсхæцджыты зæрдæты. Уый нæ, фæлæ сыл раздæр гуырысхо чи кодта, уыдоны дæр ма бауырнын кодтой, Уæрæсемæ кæдæй-уæдæй цардхъом футболон командæ кæй ис, ууыл. Чемпионаты размæ нæ командæ æмæ йæ сæргълæууæг Черчесты Станиславыл былысчъилтæ чи кодта, æмæ алыхуызон æлхыскъ ныхæстæ дзыллон хабархæссæг фæрæзты чи дзырдта, уыдон дæр ныр æрсабыр сты.
Уæрæсе æмæ Хорватийы фембæлды хъуамæ сбæрæг уыдаид чемпионаты æрдæгкæронбæттæны Англисы ныхмæ чи рацæудзæн фæзмæ, уыцы командæ.
Хорватийы командæ тынг хъомысджын кæй у, уый равдыста йæ раздæры хъæзтыты. Хорватаг футболисттæ сæ дæлкъорды фæуæлахиз сты: Аргентинæйы (3:0), Исландийы (2:1) æмæ Нигерийы (2:0) командæтыл. Уый фæстæ чемпионаты 1/8 хайы хъазуатон тохы рамбылдтой Данийы командæйæ (1:1 æмæ 11-метронтæ цæвгæйæ 3:2 хыгъдæй). Хорватаг командæйы фæлгæты хъазынц зындгонд футболисттæ. Зæгъæм, йæ капитан Лука Модрич нымад у Мадриды «Реал»-ы æппæты зынаргъдæр футболисттæй иуыл. Стыр аргъ ис дуаргæс Даниел Субашичæн («Монако», Франц), Деян Лавренæн («Ливерпуль», Англис), Шиме Врсалькойæн («Атлетико», Испани), Марио Манджукичæн («Ювентус», Итали), Андре Крамарич (“Хоффенхайм», Герман) æмæ иннæтæн.
Ахæм фæлтæрдджын æмæ хъомысджын командæимæ хъазгæйæ, равдисын хъæуы стыр арæхстдзинад æмæ фæразондзинад. Афтæ зæгъæн ис, æмæ Уæрæсейы командæ уыцы миниуджытæ равдыста сæ ацы фембæлды.
Нæ лæппутæй иуæй дæр афтæ зæгъæн нæй, æмæ йæ хъарутыл ауæрста. Дыууæ командæйы дæр, кæй зæгъын æй хъæуы, тырныдтой уæлахизмæ æмæ сæ хъарутыл нæ ауæрдгæйæ хъазæн фæзы алы къуымы дæр пурти байсыныл цыди ахъаззаг тох. Уыимæ, ахæм тырнындзинад хъазты рæсугъддзинад дæлдæр нæ кодта.
Ныббырстыты уылæнтæ кæрæдзи ивтой куы иу, куы иннæ иварон фæзы ‘рдæм.
Хъазты хыгъд байгом 31- æм минутыл. Уæрæсейæгтæ хорватаг футболистты ныббырст куы фæсыкк кодтой, уæд сæхæдæг æвиппайды абырстой размæ æмæ Денис Черышев иу 23- 24 метры дæрддзæфæй ахæм дæсны цæф ныккодта æмæ йæ кулдуар бахъахъхъæнын Даниел Субашичы бон дæр нал баци. 1:0 — Уæрæсе размæ рацыд. Хъазт та ногæй йæ тæмæны бацыд æмæ 42-æм минутыл хорватæгты ныббырстæн стъæлф сæвæрдта Андрей Крамарич. Уый 7 метры дæрддзæфæй йæ сæрæй пурти Игорь Акинфеевы хызы фæмидæг кодта æмæ хыгъд ссис 1:1.
Хъазты дыккаг хайы дæр ацы хыгъд æнæ ивдæй куы баззад, уæд командæтæн лæвæрд æрцыд уæлæмхасæн 30 минуты. Диссаг дæр у, кæцæй ма баззад дыууæ командæты футболисттæм уыйбæрц хъарутæ, фæлæ сæ архайд нæ фæсыкк.
Уæрæсейæгтæ тыхджын ныббырстæй бæргæ райдыдтой уæлæмхасæн рæстæджы хъазт, фæлæ хорватæгты иварон фæзы сæ фæстаг цæф нал фæрæстмæ. 101-æм минутыл хорватаг футболистты ныббырсты сæ хъазæг Домагей Видайы цæфы фæстæ хыгъд ссис 1:2 — Хорватийы пайдайæн.
Хъазты кæронмæ ма баззад 20 минуты æмæ уæд Черчесты Станислав фæзмæ рауагъта Зæгъойты Аланы. Уый баивта, ацы чемпионаты йæхи иттæг хорзæй чи равдыста, уыцы хъазæг Александр Головины. 115-æм минуты уæрæсейæгты ныббырст уромгæйæ, хорватæгтæ сæ иварон фæзмæ бацæуæнмæ хæстæг хъазты фæтк фехæлдтой, æмæ сæ тæрхонгæнæг фæивар кодта. 22- 24-метры дæрддзæфæй Алан дæсны лæвæрд æрбакодта пурти æмæ йæм къаддæр дæсны нæ фæцырд Мариу Фернандес. Уый йæ сæрæй пурти фæмидæг кодта Хорватийы командæйы кулдуары æмæ та хыгъд ссис æмхуызон 2:2. Уæрæсейæгтæ хæстæг уыдысты уæлахизмæ 119- æм минутыл, фæлæ Роман Зобнины цæфы фæстæ хорватаг дуаргæс Субашич пурти ацахста.
Хъазты хъысмæт бæрæггонд æрцыд 11-метрон цæфтæй. Ацы хатт Уæлахизы бардуаг йе ‘ргом нæ командæмæ нал раздæхта. Бæргæ хорз акъуырдта Игорь Акинфеев пурти Ковачичы цæфы фæстæ, фæлæ Федор Смолов æмæ Мариу Фернандесы цæфтæ кæй нæ фæрæстмæ сты, уый аххосæй Хорвати фæуæлахиз 4:3 хыгъдæй. Уæрæсейæгтæй пуртитæ бакъуырдтой Зæгъойты Алан, Сергей Игнашевич æмæ Далер Кузяев.
Нæ командæ кæд æрдæгкæронбæттæнмæ нал бахæццæ, уæддæр йæхи равдыста тынг хъомысджынæй. Уымæн æвдисæн уыдысты æгас дунейы футболуарзджытæ дæр. Нæ командæйæ сæрыстыр сты Уæрæсейы адæм. Уый махæн, ирыстойнæгтæн, уæлдай æхсызгондæр у, уымæн æмæ ацы хъуыддаджы стыр куыст бакодта Черчесты Станислав. Кæд æй алырдыгæй æлхыскъгæнджытæ гыццыл нæ уыд, уæддæр уый фидарæй цыди йæхи фæндагыл æмæ Уæрæсейы командæйы схизын кодта дунейы тыхджындæрты æмрæнхъмæ. Афтæ бæрзонд нæ бæстæйы командæ схызти фыццаг хатт!
Дунейы чемпионаты кæронмæ ма баззад цыппар хъазты. Абон æмæ райсом сбæрæг уыдзысты, фыццаг æмæ æртыккаг бынæттыл чи тох кæндзæн, уыцы командæтæ.
Абон, 10 июлы Санкт-Петербурджы 21 сахатыл фембæлдзысты Франц æмæ Бельгийы командæтæ, райсом та уыцы рæстæг Мæскуыйы стадион «Лужники»- йы фæзмæ рацæудзысты Англис æмæ Хорватийы футболисттæ.
БАСКАТЫ Уырызмæг
