Кусгæ чи нал кæны, æмæ йæ пенси фæцæрынæн æппынкъаддæр æхцайы бæрцмæ кæмæн нæ хæццæ кæны, уыцы пенсиисджытæн æмбæлы уæлæмхасæн социалон фиддон. Ахæм федералон социалон фиддоны бæрц ныртæккæ у 2 мин сомæй чысыл фылдæр.
Уый тыххæй фехъусын кодта Уæрæсейы Пенсион фонды РЦИ-Аланийы хайады пресс-службæ.
Пресс-службæйы минæвары ныхасмæ гæсгæ, нæ республикæйы пенсиисджытæй ныртæккæ ахæм уæлæмхасæн фиддон исынц 30 мин адæймагæй фылдæр.
Пенсион фонды специалисттæ куыд зæгъынц, афтæмæй ахæм социалон фиддон исыны тыххæй бадæттын хъæуы курдиат. Уыимæ, уыдон адæмы зæрдыл лæууын кæнынц, ахæм фиддон, кусгæ чи нæуал кæны, æрмæстдæр уыцы пенсиисджытæн кæй æмбæлы, уый. Зæгъæм, уæлæмхасæн социалон фиддон исæг адæймаг ногæй кусын куы райдайа, уæд уый тыххæй æмбæлы Пенсион фонды дæлхайадмæ фехъусын кæнын. Пенсиисæг уыцы æууæлы тыххæй афойнадыл куы нæ фехъусын кæна Пенсион фондмæ, уæддæр æй фæстæдæр æнæзакъонæй ист æхца бахъæудзæн фæстæмæ паддзахадæн раттын.
