Стыр фыссæджы кадæн

0
3422

 

Хетæгкаты Къостайы номыл ирон литературæйы музейы уыд стыр ахуыргонд, литературæиртасæг, поэт, прозаик, тæлмацгæнæг Джусойты Нафийы мысæн изæр

Мадзал арæзт æрцыд музейы кусджыты хъæппæрисæй. Æрбахуыдтой йæм нæ республикæйы интеллигенцийы минæвæртты — УФ-йы нывгæнджыты цæдисы уæнгтæ Дзбойты Михал æмæ Гасынты Жоржы, æхсæнадон архайджытæ Гуылæрты Барис æмæ Таутиаты Минтæйы, журнал «Мах дуджы» сæйраг редактор Мамыкъаты Хъазыбеджы, ЦИПУ-йы ирон филологийы декан Хозиты Барисы, фыссæг, публицист Соттиты Риммæйы, нæ республикæйы адæмон артист Мамсыраты Тасолтаны, поэттæ Хадыхъаты Фатимæйы æмæ Хохойты Энверы, Нафийы хо Джусойты Клавæйы æмæ æндæрты…

Нафийы номыл иу минут æдзæмæй алæууыны фæстæ, изæр байгом кодта историон наукæты кандидат, нæ республикæйы сæйраг музейы кусæг Козаты Петр. Уый чысыл афæлгæст скодта Нафийы цард æмæ сфæлдыстадыл. Дарддæр алкæмæн дæр уыд Нафийы тыххæй йæ мысинæгтæ зæгъыны фадат.

Соттиты Риммæ йæ цæссыгтæ нал баурæдта, афтæмæй радзырдта, Нафи, Хуссар Ирыстоны хæст куы уыд, уæд йе ‘рвадæлты зæронд усы райгуырæн бонмæ кæмдæр къафетты къопп куыд самал кодта æмæ йын æй хæсты цæхæртæй нæ тæрсгæйæ куыд бахаста, уый.

Нафийы хо Клавæ та ахæм хабар радзырдта. Нафимæ, зæгъы, æрыгонæй иу цавæрдæр сылгоймаг фыстæджытæ фыста. Æвæццæгæн æй йемæ фембæлын фæндыд… Фæлæ Нафи æдзухдæр æнæвдæлон кæй уыд, уый тыххæй йын дзуапп радта: «Милая, извини, никак не могу встретиться. У меня очень много работы!».

Ахæм зæрдиаг мысинæгтæ фæдзырдтой изæрмæ æрбацæуæг уазджытæ, Нафийы хæлæрттæ суанг изæрдалынгтæм!..

КАСАТЫ Аслæнбег

ОСТАВЬТЕ ОТВЕТ

Please enter your comment!
Please enter your name here