Дзæуджыхъæуы администрацийы сæргълæууæг ÆЛБЕГАТЫ Барис радон хатт æрзылд горæты уынгтæ æмæ бирæфатерон хæдзæртты кæртытыл.
Арæзтады объекттæ бабæрæг кæнгæйæ, горæты хицау районты санитарон уавæры тыххæй хатдзæгтæ скодта. Æлбеджы-фыртæй фæстæмæ бынаты æмбырды архайдтой йæ хæдивджытæ Фæрниаты Тамерлан æмæ Таматы Майрæн, фæлгонцады управленийы хицау Бицъоты Сослан, стæй горæты префектурæты разамонджытæ.
Æппæтæй раздæр хицауиуæггæнæг адæймæгтæ бабæрæг кодтой Абайты Васойы уынджы 87-æм хæдзары кæрт. Ныртæккæ ам хæстæгдæр хæдзæртты цæрæг адæмæн аразынц чысыл фæлладуадзæн тæлм. Ныридæгæн дзы сæвæрдтой фæхсбандæттæ, рæхджы фæзындзæн сывæллæтты хъазæн фæз. Сабиты æдасдзинадæн тæлмы алыварс æрæхгæндзысты. «Удæнцой горæтаг уавæрты арæзтад»-мæ гæсгæ Къостайы проспекты 292-æм хæдзары кæрты цæуынц аивгæнæн куыстытæ. Ам сараздзысты сывæллæтты хъазæн фæз. Уымæй уæлдай, кæрты асфальт уæлцъар, бордюртæ æмæ рухсдæттæг цырæгътæ та ивд æрцæудзысты.
Мин адæймагæй фылдæр кæм цæры, ахæм цæрæн бынæтты территориты фæлгонцады проект Уæрæсейы Президенты бардзырдмæ гæсгæ æххæст кæнынц дыккаг аз.
Горæты администрацийы сæргълæууæг бабæрæг кодта Чапаевы уынджы хид дæр.
Нæ уацхæссæг
