Цæгат Кавказы федералон зылды регионты стырдæр æргом аздахын хъæуы егъау инвестицион проекттæ æххæст кæныны хъуыддагмæ. Уыцы æмæ æндæр ахсджиаг фарстатыл ныхас цыд РЦИАланийы Хицауады Сæрдар ТУСКЪАТЫ Таймураз æмæ акционерон æхсæнад «Корпорация развития Северного Кавказа»-йы генералон директоры уынаффæгæнæг Нурали РЕЗВАНОВЫ фембæлды рæстæг.
Уый тыххæй фехъусын кодта РЦИ-Аланийы Хицауады пресс-службæ.
Ацы бонты паддзахадон корпорацийы бæрнон кусджытæ балцы уыдысты Цæгат Ирыстоны. Нурали Резванов æмæ корпорацийы иннæ бæрнон кусджытæн уыд, Цæгат Кавказы федералон зылды рæзты паддзахадон программæйы фæлгæты республикæ цы ахсджиаг объекттæ аразы, уыдон бабæрæг кæныны фадат.
Тускъаты Таймураз æмæ Нурали Резвановы фембæлды архайдтой республикон министрадтæ æмæ ведомствоты минæвæрттæ.
Республикæ инвестицион проекттæ æххæст кæныныл куыд кусы, стæй бынаты цавæр объекттæ бабæрæг кодта, уыдæттыл дзургæйæ, Нурали Резванов куыд фæнысан кодта, афтæмæй амалхъомады къабаз рæзты фæндагыл æрлæууыд. «Бизнесы райрæзтæн республикæ дæр æххуыс кæны», — фæнысан кодта уазæг. Йæ ныхасмæ гæсгæ, Цæгат Ирыстон бæрнонæй æххæст кæны федералон программæты уагæвæрдтæ дæр.
Сæрмагонд федералон программæты фæлгæты республикæйы цы куыст цæуы, ууыл дзургæйæ, Тускъаты Таймураз куыд загъта, афтæмæй æппæт арæзтадон объекттæм дæр ис иудадзыг цæстдард профилон министрадты разамонджыты ‘рдыгæй. Республикæйы Хицауады Сæрдары ныхасмæ гæсгæ, хæстæгдæр рæстæг бæлвырд куыст райдайдзæн егъау инвестицион проекттыл дæр.
Республикæ æмæ корпорацийы минæвæрттæ дарддæр бæстон æркастысты уыцы инвестицион проекттæ æххæст кæныны фæткмæ. Фембæлды рæстæг куыд загъдæуыд, афтæмæй егъаудæр проекттæ æххæст кæныны хъуыддагмæ лæмбынæг цæстдард ис Цæгат Кавказы хъуыддæгты фæдыл министрады ‘рдыгæй. Зæгъæм, ахæм ахсджиаг проекттæ æххæст кæнынæн министрад федералон зылды регионтæн æрвылаз радих кæны 500 милуан сомы бæрц.
Фембæлды архайджытæ куыд баныхас кодтой, афтæмæй инвестицион архайд рапарахат кæнынæн арæзт цæудзæн æндæр уæлæмхасæн мадзæлттæ дæр.
Нæ уацхæссæг
