Дæс азы рацыд, гуырдзиаг лæгсырдтæ радон хатт Хуссар Ирмæ куы æрбалæбурдтой, сабырцæрæг адæмы сæ райгуырæн зæххæй фæсурын куы бафæлвæрдтой, уыцы цаутыл. Фæлæ Уæрæсейы Федерацийы æххуысæй ирон адæм бахъахъхъæдтой сæ фыдыуæзæг, ныхкъуырд радтой дыкъахыг бирæгътæн…
Уыцы цаутæ никуы ферох уыдзысты, куыд Хуссары, афтæ Цæгат Иры дæр. Августы хæсты цаутæ зæрдылдарæн сты, ацы бонты Хуссар Ирыстоны цы номарæн мадзæлттæ цæуынц, уыдон дæр. Æмæ æрмæст Цхинвалы нæ, фæлæ Дзæуджыхъæуы, стæй Уæрæсейы æндæр горæтты цæрджытæ дæр æрымысдзысты 2008 азы цаутæ.
Фæлæ уæддæр, кæй зæгъын æй хъæуы, номарæн мадзæлтты сæйрагдæртæ цæуынц, хæст кæй басыгъта, фæлæ йæ æнусон хъомыс кæмæн нæ асаст, уыцы зæххыл — Республикæ Хуссар Ирыстоны.
Августы хæсты цауты дæс азы боны агъоммæ Цхинвалмæ сæмбæлдысты бирæ уазджытæ. Уыдоны нымæцы — «Российская газета»-йы редакцийы минæвæрттæ дæр. Уæрæсейаг журналисттæ 2008 азы цауты зæрдылдарынæн бацæттæ кодтой къамты сæрмагонд равдыст «Свет нашей памяти». Уыцы равдыст знон Цхинвалы кадджын уавæры байгом кодтой. Мадзалмæ æрбацæуæг адæмы цæстытыл ногæй ауадысты августы цаутæ: уæззау хæстон техникæ Цхинвалы уынгты, судзгæ хæдзæрттæ, тыхст адæм, гæрзифтонг бархионтæ, уæрæсейаг æфсæддонтæ…
Знон цхинвайлæгтæ æмæ республикæйы уазджытæ архайдтой æндæр номарæн акциты дæр. Абон та республикæйы цæрджытæ дидинджытæ сæвæрдзысты Цхинвал хъахъхъæнджыты мемориалтыл. Горæты арæзт æрцæудзæн æндæр мысæн мадзæлттæ дæр.
Хуссар Ирыстоны Информаци æмæ мыхуыры комитеты куыд фехъусын кодтой, афтæмæй ацы бонты Цхинвалмæ ссыдысты бирæ уæрæсейаг æмæ фæсарæйнаг дзыллон информацийы фæрæзты минæвæрттæ. Америкаг, англисаг, францаг, гермайнаг æмæ æндæр бæстæты журналисттæ цымыдисдзинад равдыстой, куыд 2008 азы цаутæ, афтæ республикæйы абоны цардмæ дæр.
Англисаг телекомпани «Би-би-си»-йы уацхæсджытæ интервью райстой Хуссар Ирыстоны Президент Бибылты Анатолийæ дæр. Президент уазджытæн радзырдта Хуссар Ирыстоны мидбæстон æмæ æддагон политикæйы, республикæйы социалон-экономикон рæзты нысанты тыххæй. Журналисттæ Бибылы-фырты бафарстой, Хуссар Ирыстон Уæрæсеимæ баиу уæвынвæнд кæны, æви нæ, уымæй дæр. «Абон уа, райсом уа, уæддæр Хуссар Ирыстон суыдзæн Уæрæсейы иу хай. Мах уымæ цæттæ стæм», — загъта Президент. Йæ ныхасмæ гæсгæ, уый канд йæхи фæндон нæу, фæлæ у æппæт ирон адæмы тырнындзинад иу паддзахады арæнты цæрынмæ.
СЛАНТЫ Аслан
