Хæдтулгæскъæрджытæ сæ транспортон фæрæзтæ, кæм не ‘мбæлы, уыцы рæтты æвæрынц æви нæ, уый рабæрæг кæнынæн Дзæуджыхъæуы Галиуфарсы префектурæйы кусджытæн уыд радон рейд.
Амæй размæ инспекцион балцы рæстæг Цæгат Ирыстоны Сæргълæууæг Битарты Вячеслав Дзæуджыхъæуы административон-техникон инспекцийы æмæ автоинспекцийы кусджытæн бафæдзæхста хæдтулгæтæ æнæмбæлгæ рæтты æвæрыны цаутæн кæрон скæнын.
«Административон барадхæлдтыты тыххæй» федералон кодекс æмæ 43-æм республикон закъонмæ гæсгæ, хæдтулгæ кæм не ‘мбæлы, ахæм ран сæвæрыны тыххæй адæймаджы фæивар кæнæн ис 2-5 мин сомæй. Хæдтулгæ газоныл æвæрын кæй не ‘мбæлы, уый тыххæй фыст ис «Адæмы санитарон-эпидемиологион фæрныгады тыххæй» æмæ «Алфамбылай æрдз хъахъхъæнынады тыххæй» федералон закъонты дæр, фæлæ цыфæндыйæдæр транспорт æнæмбæлгæ рæтты (уыимæ — газонтыл дæр) чи сæвæрдта, рейды рæстæг хæдтулгæты цалдæр ахæм хицауы æргомгонд æмæ иваргонд æрцыдысты.
— Адæммæ ис, кæм не ‘мбæлы, ахæм ран æвæрд транспортон фæрæзты хицæуттыл мидхъуыддæгты хайадмæ кæнæ цæрæн бынаты администрацимæ бахъаст кæныны бар. Республикæйы разамынд транспорт æнæмбæлгæ рæтты æвæрыны фарстамæ здахы стыр æргом. Уавæр банывыл кæнынæн дарддæр дæр рейдтæ араздзыстæм. Стыр ивар бафидын кæй нæ фæнды, уыдонæн фæдзæхсын закъон ма халын, — зæгъы Галиуфарсы администрацийы префекты хæдивæг София Гусева.
Фиппаинаг: горæты кæм не ‘мбæлы, уыцы рæтты æвæрд транспортон фæрæзтæ аласынц эвакуаторæй.
Нæ уацхæссæг
