Цæгат Ирыстоны паддзахадон медицинон академи стыр æргом здахы раззагдæр наукон куыстытæ æмæ медицинæйы æнтыстытæ нæ республикæмæ æрбаввахсдæр кæныныл æмæ уый тыххæй арæх аразы наукон-практикон конференцитæ ахсджиагдæр медицинон фарстаты фæдыл.
Медицинон академийы æмбырдтæ аразæн залы знон уыд радон наукон-практикон конференци ахæм темæйыл: «Нейрохирургийы раззагдæр технологитæ». Конференцийы уазджытæ уыдысты Тюмены Нейрохирургийы федералон центры сæйраг дохтыр, Мæскуыйы Сеченовы номыл фыццæгæм паддзахадон медицинон университеты нейрохирургийы кафедрæйы сæргълæууæг, Нейрохирургты дунеон академийы уæнг, профессор, медицинон наукæты доктор Альберт Суфианов æмæ Японы горæт Асакихавайы Япойнаг Сырх Дзуары госпиталы нейрохирургийы хайады сæргълæууæг, профессор Катсуми Такизава.
Кадджын уазджытæн зæрдиаг æгасцуай загътой республикæйы æнæниздзинад хъахъхъæнынады министр Михаил Ратманов æмæ медицинон академийы ректор Олег Ремизов. Альберт Суфияновы æмæ Катсуми Такизавайы Олег Ремизов рахуыдта нырыккон нейрохирургийы стъалытæ. Куыд загъта, афтæмæй сæ дыууæ дæр сæ дысныдзинадмæ æмæ се ‘нтыстытæм гæсгæ абоны нейрохирургийæ ацыдысты 30-40 азы размæ. «Нейрохирургийы центртæ æппæт дунейы дæр цалдæр йеддæмæ не сты, æмæ дзы дыууæ ис Уæрæсейы — Мæскуы æмæ Тюмены. Нæ республикæ гыццыл кæй у, уымæ гæсгæ Ирыстоны аккаг нейрохирургион центр саразынæн, кæй зæгъын æй хъæуы, гæнæнтæ нæй. Уæдæ ахæм рынчыны æндæр горæтмæ ласын куы бахъæуы, уæд уый дæр домы уæлдай фылдæр зонындзинæдтæ æмæ бæрзонддæр дæсныйад. Уымæ гæсгæ практикон æгъдауæй ацы конференцийæн ис стыр ахадындзинад. Уый куы ахицæн уа, уæддæр бастдзинæдтæ баззайдзысты, æмæ нæ дохтыртæн алкæддæр сæ бон уыдзæн бахъуаджы сахат дæсны амынддзинæдтæ райсын нейрохирургийы къабазы ацы дыууæ дæсныдæр æмæ хъуыстгонддæр ахуыргондæй», — загъта Олег Ремизов.
Конференцийы стыр доклад скодта нæ республикæйы Æнæниздзинад хъахъхъæнынады министрады сæйраг æнæштатон нейрохирург, Беслæны бирæкъабазджын медицинон центры нейрохирургийы хайады сæргълæууæг Дедегкаты Азæмæт. Уый радзырдта, Цæгат Ирыстоны нейрохирургийы къабазы цы лыггæнинаг фарстатæ ис, уыдоны тыххæй. Куыд загъта, афтæмæй республикæйы стыр æхсызгонæй хъæуынц, сæ дæсныдзинад æмæ сæ зонындзинæдтæ ноджы фылдæр кæмæн уой, ахæм дохтыртæ-нейрохирургтæ. Стæй ма, йæ ныхасмæ гæсгæ, республикæйы æнæмæнг саразын хъæуы, алцæмæй æххæст чи уа, сывæллæтты нейрохирургийы ахæм хайад. Презентацийы хуызы Дедегкаты Азæмæт равдыста, Беслæны медицинон центры нейрохирургион хайады цы операцитæ кæнынц, уыдонæй скъуыддзæгтæ.
Япойнаг профессор Катсуми Такизава скодта доклад ахæм темæйыл: «Хирургическое лечение аневризмы головного мозга». Уый фæстæ сарæзта мастер-класс конференцийы архайджытæн. Нейрохирургийы ахсджиагдæр фарстаты фæдыл ма докладтæ скодтой профессор Альберт Суфиянов æмæ Тюмены индустриалон университеты кибернетикон системæты кафедрæйы доцент, медицинон наукæты кандидат, дохтыр-невролог Алексей Кудряшов.
Конференцийы райдайæны уазджытæн цыбыр, фæлæ зæрдæмæдзæугæ концерт равдыста Цæгат Ирыстоны паддзахадон медицинон академийы адæмон кæфтыты ансамбль «Цард».
ДЕДЕГКАТЫ Зæлинæ Къамтæ систа ЦÆГÆРАТЫ Дауыт
