Нæ бæстæйы Президенты грантты фонды æххуысæй арæзт цыдис сæрмагонд форум: «Северный Кавказ на стыке цивилизации: культурная политика как ресурс укрепления межнационального мира и межрелигиозного согласия».
Мадзал ацыд æртæ хайæ. Фыццаг — Мæскуыйы, дыккаг — Махачкалайы, æртыккаг та знон уыд Дзæуджыхъæуы, ЦИПУ-йы. Конференцийы архайдтой нæ республикæйы æмæ сыхаг регионты, федералон ведомствотæ æмæ кавказаг диаспорæты минæвæрттæ, эксперттæ Уæрæсе, Хуссар Ирыстон, Абхаз, Турк, Иран, Ирак æмæ Сомихæй.
Ныхас цыдис нациты ‘хсæн хæлар ахастдзинæдтæ фидардæр кæныныл, дины æмæ алы конфесситы архайдмæ биноныгдæр цæст дарыныл æмæ культурон мадзæлтты фæрцы алы адæмты æнгомдæр кæныны хъуыддæгтыл.
Æмбырд байгом кодта проекты разамонæг Михаил Чернов. Уый куыд радзырдта, афтæмæй скæсæйнаг хæст Уæрæсейы арæнтæм кæй æрбаввахс, уымæ гæсгæ архайын хъæуы Цæгат Кавказ æмæ скæсæйнаг бæстæты ‘хсæн хæлар ахастдзинæдтæ фидардæр кæныныл. — УФ-йы Президенты грантты фонд нæм æууæнчы цæстæй кæй ракаст, æмæ нын ацы вазыгджын хъуыддаг бабар кодта, уымæ гæсгæ йæ хъуамæ бæрнонæй бакæнæм. Цæмæй нæ куысты бæрæггæнæнтæй нæ зæрдæтæ барухс уой. Сæйрагдæр кæсдзыстæм культурæ, политикæ æмæ æдасдзинады фарстатæм. Абон Уæрæсе хæстæгдæр скæсæны бæстæтимæ хæлар æмæ æфсымæрдзинады бадзырдтæ аразы. Уыцы «бастдзинæдты фæндаг» та Цæгат Кавказыл, уæлдайдæр Цæгат Ирыстоныл цæуы. Уымæн æмæ ацы ран цæры, иннæ регионтимæ абаргæйæ, фылдæр адæмыхæттытæ æмæ уый хъуыдыйаг у ахæм хъуыддæгты, — загъта Михаил Чернов.
Конференцийы архайджытæн арфæйы ныхæстæ æмæ мадзалы ахадындзинады фæдыл сæ хъуыдытæ загътой: РЦИ-Аланийы национ ахастдзинæдты фарстаты фæдыл министр Цуциты Аслан, РЦИ-Аланийы Парламенты Сæрдары хæдивæг Гутнаты Аслæнбег æмæ истори æмæ кавказиртасæг, профессор Бзарты Руслан, дины кусджытæ: Гуæцæлты Хадзымурат æмæ Фыд Дмитри, политолог, Уæрæсейы экономикæйы уæлдæр скъолайы профессор Дмитрий Ефстафьев.
— Цæгат Кавказ скæсæйнаг бæстæтимæ уый тыххæй иу кæнæм, уымæн æмæ ацы дыууæ макрорегионы экономикон æмæ социалон модернизаци кæронмæ нæ фæци. Сты социалон-политикон институтты ныхмæгæнæг территоритæ, Советон Цæдисы фехæлды æмæ араббаг национализмы фæстиуджытæ, паддзахады æмæ этникон арæнты быцæудзинæдты ратæдзæн. Культурæйы фæрцы та ис аразæн æнтыстджын хъуыддæгтæ, æмæ архайдзыстæм культурæйы фæрæзтæй нæ нысан сæххæст кæныныл, — загъта Дмитрий Ефстафьев.
САУТÆТЫ Тамилæ Къамтæ систа КЪÆБЫСТЫ Харитон
