Цæгат Ирыстоны зынаргъ цæрджытæ! Зынаргъ хæлæрттæ!
Арфæ уын кæнын нæ бæстæйы историйы зæрдылдарæн цау — фæскомцæдисы 100 азы фæдыл!
Уæрæсейæгты цалдæр фæлтæры рацыдысты ацы æппæты дзыллондæр æхсæнадон организацийы скъола, æмæ уыдонæй алкæмæн дæр йæ æвзонгад ссис æппæты ирддæр сыф царды, æппæт бæстæйы биографийы та — стыр æмæ ахсджиаг къæпхæн.
Æмæ историйы абоны теоретиктæ нырыккон царды æууæлты ивгъуыд цауты тыххæй цыфæнды дæр куы дзурой, уæддæр ФÆЛКЦ хуымæтæджы цæдис нæ уыдис, фæлæ хорздзинады, рæстдзинады хъуыддæгтæ хæссæг, æнгомдзинады, æмбалдзинады, кæрæдзийæн æххуыс кæныны æмæ хæлардзинады нысан.
Фæскомцæдисонтæ — бархионтæ арæзтой фыццаг колхозтæ, фæллой кодтой 30-æм азты арæзтæдты, тох кодтой Испанийы йæ сæр сдарæг фашизмы ныхмæ, хæцыдысты Фыдыбæстæйы Стыр хæсты фронтты. Фæлдæхтой зæрæстон зæххытæ, арæзтой Байкалы-Амуры фæндаг æмæ æдзухдæр уыдысты разæй.
Уый уыдис иумæйагдзинады, хъæугæдзинады, æнæмæнгдзинады цавæрдæр æнкъарæн, æмæ, кæд ды фæскомцæдисон дæ, уæд дæ бон бауыдзæн кæцыфæнды зын хъуыддаг дæр алыг кæнын, кæцыфæнды æхсæнадон ахсджиаг мадзалы дæр архайын, зын кæмæн у, уыдоны фарсмæ лæууын.
Патриотизм, райгуырæн бæстæ уарзын, йæ хъысмæтыл бæрнон уæвыныл дæр ахуыр кодта фæскомцæдис. Уæвгæ ахуыр дæр нæ кодта, фæлæ æрвыста хъуыды кæнынмæ æмæ афтæ архайын, цæмæй дæ алы ми дæр уыдаид пайдайаг райгуырæн зæхх æмæ æппæт бæстæйæн.
Ныры фæсивæд зæгъдзæн, уыдæттæ иууылдæр рæсугъд ныхæстæ сты, зæгъгæ, фæлæ абон йæхи дæр хъæуы ахæм хъомысджын, иугæнæг тых, мах, хистæртæ, та сæрыстыр стæм, нæ хъысмæты фæскомцæдис кæй уыдис, уымæй.
Уæдæ уадз æмæ ФÆЛКЦ-йы 100 азы нæ республикæйы хистæр фæлтæры минæвæрттæн хорз æфсон фæуæд се ‘взонгдзинад æрымысынæн, ногæй сæхи æрыгонæй æмæ хъаруджынæй банкъарынæн, абоны æвзонгтæн та уымæй уырнинагдæр æфсон фæуæд, йæ царды ацы намысджын фæсивæдон Цæдис кæмæн уыдис, уыдонмæ бахæлæг кæнынæн.
Бæрæгбоны хорзæх уæ уæд, Цæгат Ирыстоны фæскомцæдисонтæ! Арфæ уын кæнын ФÆЛКЦ-йы æнусон юбилейы фæдыл!
БИТАРТЫ Вячеслав, Республикæ Цæгат Ирыстон-Аланийы Сæргълæууæг
Нæ зынаргъ Ирыстоны цæрджытæ, фæскомцæдисон змæлды ветерантæ!
Арфæ уын кæнын уæ цытджын бæрæгбоны фæдыл — фæскомцæдисыл 100 азы кæй сæххæст, уыцы кадджын боны фæдыл.
Фæскомцæдис у фæсивæды иудзинады æмæ Фыдыбæстæйæн балæггад кæныны нысан. Фæскомцæдисимæ махæн баст сты, разæнгарддзинадæй, хъаруйæ æмæ царды алы къабæзты — фæллойы, культурæйы, наукæйы, спорты — райгуырæн бæстæйæн кад скæныны фæндтæй йе ‘дзаг чи уыд, нæ уыцы æрыгон бонтæ.
Бирæ фæлтæртæн фæсивæды Ленинон коммунистон цæдис ссис царды æцæг скъола, рæстдзинад æмæ хорздзинады идеалтыл, стæй, чысыл æмæ стыр Райгуырæн бæстæйы хъысмæтыл бæрнон уæвыныл кæм хъомыл кодтой, ахæм скъола. Уæззау хæстон рæстæджыты Райгуырæн бæстæ чи бахъахъхъæдта, ног горæттæ æмæ хъæутæ чи арæзта, зæрæстон зæххытыл чи куыста, хъæууон хæдзарад рæзын чи кодта æмæ фæсивæдон патриотон змæлдтæн разæнгарддзинады хос чи уыд, уыдонæн сæ раззæгдæрты ‘хсæн уыдысты фæскомцæдисонтæ. Уыдæттæн рохгæнæн нæй. Уыцы цытджын æмæ кадджын хъуыддæгтæй мах сæрыстыр стæм абон дæр.
Фæскомцæдис канд нæ ивгъуыд нæу, уый у хорз цæвиттон абоны фæлтæртæн дæр, уымæн æмæ абоны æрыгæттыл æвæрд ис æппæт бæстæйы, уыимæ нæ республикæйы фидæныл дзуапп дæттыны хæс. Æмæ у тынг ахсджиаг, цæмæй нæ кæстæртæ æмбарой, цы у патриотизм, интернационализм, Ирыстоны бирæнацион адæмы фарн æмæ традицитæн аргъ кæныны хъуыддаг.
Ацы бон фæскомцæдисыл æххæст кæны 100 азы, æмæ мæн уæлдай арфæ ракæнын фæнды йæ ветерантæн, нæ республикæйы рæзтмæ стыр бавæрæн чи бахаста, уыдонæн. Сæ фæлтæр алкæддæр хицæн дардтой се стыр бæрнондзинадæй, æмгардзинад æмæ граждайнаг разæнгарддзинадæй.
Зæрдиаг арфæ кæнын фæскомцæдисонты æппæт фæлтæртæн æмæ нæ республикæйы цæрджытæн ацы диссаджы бæрæгбоны фæдыл! Мæ зæрдæ уын зæгъы æнæниздзинад, амонд æмæ стыр æнтыстытæ Уæрæсе æмæ Ирыстоны сæраппонд!
Алексей МАЧНЕВ, Республикæ Цæгат Ирыстон-Аланийы Парламенты Сæрдар
