Абон республикæйы йæ куыст райдайдзæн хихъæппæрисадон сфæлдыстадон къордты I æркаст «Иры фарн». Арæзт цæуы РЦИ-Аланийы Сæргълæууæг БИТАРТЫ Вячеславы хъæппæрисæй. Æххæст æй кæны РЦИ-Аланийы Культурæйы министрад, Республикæйы адæмон сфæлдыстады хæдзар æмæ районты бынæттон хиуынаффæйады администрацийы культурæйы хайадты разамонджытæ.
Æркасты нысан у Ирыстоны аивадон къордты архайд рапарахат кæнын, саразын мадзæлттæ сæ бахъахъхъæнын æмæ дарддæры рæзтæн; культурон æмæ монон традицитæ дывæр кæнын, цæрджытæн скæнын фадат сæхи аивады фæлварынæн; хæдахуыр кафджытæ, зарæггæнджыты æмæ сфæлдыстадон къордты арæхстдзинад аивады хуызты сбæлвырд кæнын æмæ бирæнацион традицион культурæ æхсæнады ‘хсæнмæ хæссын; цæстуарзонæй кæрæдзи фæлтæрддзинады æнтыстытыл хи фæлтæрын, хорздзинæдтæ дзы райсын æмæ сæ хъуыддаджы спайда кæнын; кæрæдзи зонын æмæ бастдзинæдтæ фидардæр кæнын.
Æркæстытæ уыдзысты 30 октябрæй 12 ноябрмæ. Къамисы сæрдар у Республикæйы адæмон сфæлдыстады хæдзары директор, РЦИ-Аланийы адæмон артист Цæриаты Валери.
Ацы ахсджиаг æркаст йæ архайд райдайдзæн абон
16.00 сахатыл Дыгуры районæй.
31 октябры 15.00 сахатыл сæ арæхстдзинад равдисдзысты Рахизфарсы районы цæрджытæ,
2 ноябры 13.00 сахатыл — Горæтгæрон район,
6 ноябры 15.00 сахатыл — Кировы район,
7 ноябры 17.00 сахатыл — Алагиры район,
8 ноябры 15.00 сахатыл — Æрыдоны район,
9 ноябры 17.00 сахатыл — Æрæфы район,
11 ноябры 15.00 сахатыл — Мæздæджы район.
Кæронбæттæны концерт уыдзæн Цæгат Ирыстоны Тæбæхсæуты Балойы номыл паддзахадон Ирон академион театры 1 декабры 15.00 сахатыл. Уым сбæрæг уыдзысты æмæ хорзæхджынгонд æрцæудзысты æркасты уæлахиздзаутæ. Æркасты лæвæртты фонд у 3 000 000 сомы. Хорзæхджынгонд дзы æрцæудзысты хуыздæр къордтæ, хицæн сфæлдыстадон архайджытæ, разамонджытæ, районтæ.
— Ахæм æркастытæ Ирыстоны 60-æм азтæй фæстæмæ, хъыгагæн, нал уыд. Уый хорзæрдæм нæ фæзынд районты хъæуты Культурæйы хæдзæртты куыстыл дæр, — загъта Цæриаты Валери. — Республикæйы Сæргълæууæг йе ‘ргом ацы фарстамæ кæй аздæхта, уый у арфæйаг хъуыддаг. Сног сты бирæ сфæлдыстадон къордтæ, байгом театралон, инструменталон, зарæггæнджыты, кафджыты ног къордтæ. Нæ курдиатджын фæсивæды æмæ хистæр кары цæрджытæй дæр бирæты фæнды архайын æмæ сæм хъæуы фæкæсын, æмбæлгæ уавæртæ сын саразын. Æркаст арæзт цæуы æнæбюджетон фæрæзтæй, комкоммæ Сæргълæууæджы æххуысæй. Къамисы хатдзæгтæм гæсгæ сын кæронбæттæны лæвæрд æрцæудзæн сертификаттæ сценикон костюмтæ, уадынгæрзтæ, декорацитæ æмæ æндæр хъæугæ дзаумæттæ балхæнынæн.
ХЕТÆГКАТЫ Оксанæ
