Зындгонд куыд у, афтӕмӕй Уӕрӕсейы Федерацийы Президенты Указмӕ гӕсгӕ ацы аз Уӕрӕсейы Гӕрзифтонг тыхты тагъд ӕмгъуыдмӕйы службӕмӕ фӕззыгон ӕрсидт райдыдта 1-ӕм октябрӕй. Нӕ республикӕ ӕдӕппӕт хъуамӕ ӕфсадмӕ арвита 700 сидтоны. Иннӕ хӕттытау та ныр дӕр Уӕрӕсейы ӕфсад салдӕтты ног фӕлтӕрӕй баххӕст кӕныны стырдӕр хӕс лӕууы Дзӕуджыхъӕуы ӕфсӕддон комиссарады размӕ — 250 адӕймаджы.
Горӕт Дзӕуджыхъӕуы ӕфсӕддон комиссар, дӕлбулкъон Беджызаты Роберт куыд загъта, афтӕмӕй сӕйраг ӕргом здахынц, машинӕ скъӕрыны дӕсныйад кӕмӕ ис, уӕлдайдӕр категори «С», уыдонмӕ. «Уымӕй уӕлдай ма мын мӕ комкоммӕ хицау, республикӕйы ӕфсӕддон комиссар, ӕрсидты райдайӕны размӕ ратты ахӕм хӕс, цӕмӕй иуӕй-иу сидтонтӕн лӕвӕрд ӕрцӕуа, сусӕг документтимӕ кусыны бар ын кӕй ис, уый тыххӕй документ. Мах ахӕмты равзарӕм сӕ характеристикӕтӕм гӕсгӕ. Кӕй зӕгъын ӕй хъӕуы, равзарӕм ӕппӕты аккагдӕрты ӕмӕ сӕ тыхы бӕлвырд скондты ӕххуысӕй барӕвдз кӕнӕм уыцы куыстмӕ».
— Уӕлейӕ цы наряд райсут, уый цавӕр барӕнтӕ домы? — афарстам ӕфсӕддон комиссары.
— Фыццаджыдӕр — ӕнӕниздзинад, дыккаджы та — ахуырады ӕмвӕзад, уый фӕстӕ та, машинӕ скъӕрыны тыххӕй ӕвдисӕндар ӕм ис ӕви нӕй, уый ӕмӕ ӕппӕты фӕстагмӕ — профессион-психологион ӕвзӕрстмӕ гӕсгӕ. Уыцы ӕвзӕрст уый амоны ӕмӕ сидтонтӕ уӕлдӕр ранымад ӕууӕлтӕм гӕсгӕ сты хицӕн командӕтӕм исгӕ. Алы командӕйӕн дӕр ис йӕхи домӕнтӕ ӕмӕ сидтонтӕй алчи нӕ вӕййы уыцы домӕнты аккаг. Ам уӕлдай стырдӕр ахадындзинад ис ӕнӕниздзинадӕн. Сидтонты уымӕ гӕсгӕ ӕвзарӕм командӕтӕм. Фӕлӕ хатгай сӕ ныййарджытӕ ныллӕууынц, цӕмӕй сын сӕ лӕппуйы арвитӕм сӕ сыхӕгты лӕппуимӕ кӕнӕ та, кӕимӕ ахуыр кодта, ахӕм лӕппуимӕ, науӕд, сидтон хӕларӕй кӕимӕ цӕры, ахӕмимӕ. Мах сын уавӕр бамбарын кӕнӕм ӕнӕ цъӕлхъӕртӕй, уӕзданӕй, ӕмӕ немӕ сразы вӕййынц.
— Цал командӕйы арвыстат ныронг?
— Æвдӕм ноябрьмӕ уал арвыстам 25 командӕйы. Рӕстӕмбис нымадӕй алы командӕйы дӕр уыдис фондз адӕймаджы. Афтӕмӕй уал ацы азы фӕззыгон ӕрсидты хӕсӕн сӕххӕст кодтам йӕ 50 проценты.
— Кӕдӕм ӕрвитут горӕтаг сидтонты службӕ кӕнынмӕ? — уыд нӕ ӕртыккаг фарст.
— Калининградӕй райдай ӕмӕ Дард Хурыскӕсӕнӕй фӕу, — загъта дӕлбулкъон Беджызы-фырт. — Мӕскуы, Санкт-Петербург, Ростов, Саратов, Дӕллаг Новгород…
Æфсӕддон зылды командӕгӕнӕджы домӕнмӕ гӕсгӕ мах бастдзинад дарӕм, сидтонты кӕдӕм арвитӕм, уыцы ӕфсӕддон хӕйтты командиртимӕ. Хъахъхъӕнынады министры домӕнмӕ гӕсгӕ мӕйы фӕстӕ ӕфсӕддон хӕйттӕй райсӕм характеристикӕтӕ, ӕфсадмӕ кӕй арвыстам, уыцы лӕппуты службӕйы тыххӕй. Стӕмтӕй фӕстӕмӕ горӕтаг лӕппутӕй барухс вӕййы зӕрдӕ. ӕфсӕддон хайы командиры курдиатмӕ гӕсгӕ сын ӕрбахонӕм сӕ ныййарджыты ӕмӕ сын арфӕ ракӕнӕм, Фыдыбӕстӕйӕн аккаг хъӕбул кӕй схъомыл кодтой, уый тыххӕй.
Вӕййы афтӕ дӕр, ӕмӕ иуӕй-иутӕ сӕхи фӕтылиф кӕнынц ӕфсӕддон службӕйӕ ӕмӕ сыл 27 азы куы сӕххӕст вӕййы, уӕд фӕзынынц комиссарадмӕ. Ахӕмтӕн сидтон къамисы уынаффӕмӕ гӕсгӕ ӕфсӕддон билеты бӕсты раттӕм справкӕ. Хицауады уынаффӕмӕ гӕсгӕ уыдон ист нӕ цӕуынц паддзахадон службӕйы куыстмӕ, муниципалон службӕмӕ, хъахъхъӕнынадон нысаниуӕг кӕмӕн ис, ахӕм куыстуӕттӕм, стӕй тыхы структурӕтӕм дӕс азы ӕмгъуыдмӕ.
Ис ахӕмтӕ, службӕ чи нӕ кодта, фӕлӕ сын ӕфсӕддон билет райсыны бар ис. Зӕгъӕм, сидтон къамис закъонмӕ гӕсгӕ кӕй ссӕрибар кодта службӕйӕ, ахӕмтӕн: уӕлдӕр скъоламӕ ахуыр кӕнынмӕ бацыд, бинонты хъуыддаг бакодта ӕмӕ йын фаззӕттӕ фӕзынд. Сидтон къамис ӕркӕсы, цы документтӕ бавдисы сидтон, уыдонмӕ ӕмӕ йын кӕд нывыл вӕййынц, уӕд ын ӕфсӕддон билет раттӕм.
Афтӕ дӕр вӕййы ӕмӕ адӕймаг уӕлдӕр скъолайы фӕстӕ ахуыр кӕнынмӕ бацӕуы аспирантурӕмӕ. Закъонмӕ гӕсгӕ ма йын ахуыры фӕстӕ ӕмбӕлы иу аз раттын кандидатон диссертаци бахъахъхъӕныны тыххӕй. Кандидаты къӕпхӕн бахъахъхъӕныны фӕстӕ ахуыргонд закъонмӕ гӕсгӕ сӕрибаргонд цӕуы ӕфсӕддон службӕйӕ, ӕмӕ йын закъоны бындурыл раттынц ӕфсӕддон билет.
Дзӕуджыхъӕуы ӕфсӕддон комиссар Беджызаты Роберт бӕлвырд дзуаппытӕ радта журналистты иннӕ фӕрстытӕн дӕр.
БАГАТЫ Аврам
