Знон радон хатт сидтон 17 лæппуйы цыдысты Уæрæсейы æфсады рæнхъытæм, æмæ уый фæдыл кадджын мадзал арæзт æрцыд Æнусон арты цур. Ардæм лæппуты афæндараст кæныны тыххæй æрцыдысты Дзæуджыхъæуы æфсæддон комиссарады кусджытæ, сидтонты ныййарджытæ, хионтæ, къабæзтæ, стæй Фæсивæды æфсæддон-патриотон хъомылады республикон центры минæвæрттæ æмæ Дзæуджыхъæуы 26-æм скъолайы æвзонг æфсæддонтæ, сидтон лæппутæ та хъарм зымæгон æфсæддон уæлæдарæсы лæууыдысты аив рæнхъæй.
Мадзалы амонæг Хъуыссæты Михалы цыбыр разныхасы фæстæ æфсады рæнхъытæм цæуæг лæппутæн фæндараст загътой РЦИ-Аланийы æфсæддон комиссары æххуысгæнæг Рубен Петросян, Дзæуджыхъæуы æфсæддон комиссар Беджысты Роберт, ДОСААФ-ы регионалон хайады сæрдар Хъантемыраты Барис, Уæрæсейы Хъæбатыры мад Татьянæ Днепровская æмæ иннæтæ. Æппæтæйдæр сын фæдзæхстой, цæмæй сæм уа æгъдау, сæ командиртæм хъусой, æмæ уæд сæ службæ дæр æнтыстджынæй ахицæн кæндзысты.
Сидтон лæппутæ дидинджытæ сæвæрдтой Советон Цæдисы Хъæбатыр Василий Маргеловы цыртдзæвæныл æмæ æмхуызонæй сæ хуыз систой йæ цуры.
Кадджын мадзал куы фæцис, уæд æз бафарстон сидтон, æрыдойнаг лæппу Хъуылаты Зауры: — Цæттæ дæ æфсады рæнхыты службæ кæнынмæ?
— Цæттæ! — дзуапп радта уый. — Омскмæ нæ æрвитынц, æмæ æппæт хъарутæй дæр архайдзынæн Ирыстоны кад дæлæмæ не ‘руадзыныл.
Ахæм разæнгардæй æмæ ныфсджынæй нæ лæппутæ цыдысты æфсады рæнхъытæм æмæ фæндараст фæуæнт.
ТОХСЫРТЫ Къоста
Къамтæ систа ЦÆГÆРАТЫ Дауыт
