Ацы азы сæрды Дзæуджыхъæуы сырддоны сырдты дарыны уавæртæ фæхуыздæр сты. Сырддон бабæрæг кодта Дзæуджыхъæуы бынæттон хиуынаффæйады администрацийы сæргълæууæг ÆЛБЕГАТЫ Барис, федта цалдæр мæймæ æххæстгонд куыстыты хæрзхъæддзинад.
Ацы азы уалдзæджы 9-аздзыд Аринæ Исакова Æлбеджы-фыртмæ æрбарвыста фыстæг. Уым куырдта горæты сырддон банывыл кæнын. Фæстæдæр гыццыл чызг æмæ йæ ныййарджытæ фембæлдысты горæты администрацийы сæргълæууæгимæ. Фембæлды фæстæ хаст æрцыд сырддон рацаразыны уынаффæ.
— Сывæллæтты фæлладуагъды бынат куыд цалцæг кæндзысты, уымæ иумæ цæст дардзыстæм, — загъта Æлбеджы-фырт чызгæн.
Куыд баныхас кодтой, афтæ æрæджы горæты хицау сабиимæ иумæ æркастысты сырддон цалцæггæнæн куыстытæм. Кусæндоны разамындимæ ныхас цыд дарддæры рацарæзты проектыл дæр.
Ныридæгæн баххæст кодтой стыр куыст: маргъдарæн бынаты фæзуат фæуæрæх кодтой, сырдтæн сарæзтой ног къалати, енотæн та — ног хатæн. Сырдтæ дарæн бынæттæ нывгæнджытæ саив кодтой. Ног хатæнтæ аразынц стай æмæ маймулитæн. — Сырддоны æрцыдысты хорзæрдæм ивддзинæдтæ. Сырдтæ дарæн уавæртæ кæй фæхуыздæр сты, уымæй райгонд дæн. Сырддон дарддæр дæр нывылгонд кæй цæудзæн, ууыл зæрдæ дарын, — загъта скъоладзау-чызг.
— Фæлладуадзæн бынат дарддæр дæр нывыл кæндзыстæм. Æхцайы фæрæзтæ нæм фаг кæй нæй, уый аххосæй сырддон нывыл кæныны куыстытæ иттæг рæвдз кæд нæ цæуынц, уæддæр куыдфæстæмæ ацы объект раззагдæртæй иуыл нымад цæмæй æрцæуа, ууыл бацархайдзыстæм, — загъта Æлбеджы-фырт.
Дзæуджыхъæуы бынæттон хиуынаффæйады администрацийы пресс-службæ
