Алы аз дæр Цæгат Ирыстоны Хетæгкаты Къостайы номыл паддзахадон университеты студенттæ уæлдай цины æмæ цардбæллон æнкъарæнтимæ сбæрæг кæнынц ахуырдзау фæсивæды бæрæгбон — Студентты дунеон бон. Сбæрæг æй кодтой ацы хатт дæр.
Паддзахадон университеты кæрты цы бирæ студенттæ æрбамбырд, уыдонæн сæ бæрæгбоны фæдыл, фыццаджыдæр, арфæ ракодта Цæгат Ирыстоны паддзахадон университеты президент Мæхæмæтты Ахуырбег:
— Абон фæлладуадзæн бон кæд нæу, уæддæр у стыр бæрæгбон. Студентты дунеон бон у æвзонгдзинады бон, размæ чи тырны, фидæнмæ рæсугъд нысантæ чи æвæры, уыдоны бон. Нæ университетæн бирæ ис, нæ сæр абон бæрзæндты кæмæй хæссæм, абоны студенттæн та рæсугъд дæнцæгæн чи бæззы, ахæм рауагъдонтæ, æмæ мæ фæнды, цæмæй уыдон уой ноджы фылдæр, стæй, афтæ кæй уыдзæн, уый мæ фидарæй уырны. Мæ зæрдæ уын зæгъы, царды рæсугъд фæндæгтыл цæугæйæ, уæ къухы стыр æнтыстытæ куыд бафта.
— Студенттæ сты æрыгон фæлтæрæн сæ хуыздæр хай. Ууыл дзурæг у, нæ университеты КВН-ы командæ хæрзæрæджы кæй рацыд, Уæрæсейы КВН-ы премьер-лигæмæ. Ахæм стыр æнтыст республикæйы фæсивæдæн фæстаг цалдæр азы дæр нал уыд. Арфæ уын кæнын Студентты дунеон боны фæдыл. Уæ зæрдæты зынг макуы ахуыссæд, цардбæллон æмæ амондджын ут алкæддæр, — студенттæн арфæ кæнгæйæ, загъта университеты ректор Огъуаты Алан.
Студенттæн ма арфæ ракодтой республикæйы ахуырад æмæ наукæйы министры хæдивæг Алыккаты Алан, Дзæуджыхъæуы бынæттон хиуынаффæйады администрацийы сæргълæууæджы хæдивæг, университеты раздæры рауагъдон Бæройты Хасан æмæ республикæйы Парламенты депутат Токаты Людмилæ.
Бæрæгбоны фæлгæты студенттæн хъазæн хуызы арæзт æрцыд сесси. «Фæлварæнтæ» хуыздæр чи радта, уыдонæн уыд лæвæрттæ, уыимæ, бæрæггæнæн цас хуыздæр уыд, уыйбæрц лæвар — зынаргъдæр. Хъазæн хуызы фæлварæнтæ дæттынæн университеты кæрты арæзт æрцыд 14 фæзы. Сæрмагондæй дзы уыд хæрæндон дæр. Саходæн дзы уыд ирон чъиритæй æмæ алыхуызон хæринæгтæй. Ахæм «адджын лæвар» студенттæн скодта компани «Бавари».
Сæ арæхстдзинад æмæ сфæлдыстадон курдиат студенттæ æвдыстой кафынæй æмæ зарынæй.
З.АГЕЕВА Къамтæ систа КЪÆБЫСТЫ Харитон
