Горæт Дзæуджыхъæуы бынæттон хиуынаффæйады администрацийы сæргълæууæг ÆЛБЕГАТЫ Барис, ахуырады управленийы разамонæг ГОЗЫМТЫ Раман, арæзтады управленийы хицау БЕСЛЕХЪОТЫ Зауырбег æмæ горæты Минæвæртты æмбырды депутат БЫГЪДАТЫ Ацæмæз бабæрæг кодтой 26-æм скъолайы гом урок. Ахуырдзаутимæ аныхас кæныны фæстæ скъолайы бæстыхайы æххæстгонд цалцæггæнæн куыстыты хæрзхъæддзинад сбæрæг кодтой.
Уазджытæ архайдтой 4-æм къласы урочы. 26 ахуырдзауы бацæттæ кодтой горæты зæрдылдарæн бынæтты тыххæй докладтæ. Докладгæнджытæ уæлдай фылдæр æргом аздæхтой Советон Цæдисы Хъæбатыр Мамсыраты Хаджумармæ, скъолайы къулыл нывгонд ис йæ сурæт. Уымæй уæлдай, скъоладзаутæ радзырдтой Дзæуджыхъæуæй рацæуæг зындгонд спортсменты æмæ ирон æгъдæутты тыххæй, стæй бакастысты горæтыл фыст æмдзæвгæтæ, æвзонг автоинспектортæ та сæ зонындзинæдтæ равдыстой фæндагыл æдасæй цæуыны къабазы.
Скъоладзаутæ Æлбегаты Барисæй куырдтой, цæмæй афæдз цалдæр хатты горæты зоопарчы «гом дуæртты бонтæ» арæзт цæуа. Уыимæ, кæй бафæнда, уыцы фæсивæдæн зоопаркмæ лæвар бацæуыны фадат куыд уа, афтæ. Горæты хицау ацы курдиатыл сразы.
Æлбегаты Барис рабæрæг кодта скъолайы хæрæндоны цалцæггæнæн куыстыты хæрзхъæддзинад (горæты администраци скъолаты æмæ рæвдауæндæтты хæлцы фарстамæ здахы уæлдай фылдæр æргом). Хæрæндоны ифтонггæрзтæ кусынц æнаиппæй.
Ивгъуыд азы кæрон зынгсирвæзты аххосæй хъыгдард чи баййæфта, уыцы кусæнуат æмæ лаборатори ногæй куыд аразынц, горæты хицау уый дæр инспекцион уагæй сбæлвырд кодта. Кæронмæ кæй сцалцæг кодтой, уыцы лабораториимæ æмкъул кълас дæр рæхджы банывыл кæндзысты.
Нæ уацхæссæг
