Бетъырбухы япойнаг лæгæй-лæгмæ тохты хуыз джиу-джитсуйæ цæуынц Уæрæсейы фыццаг бынат бацахсыныл ерыстæ æрыгæттæ æмæ хистæр спортсменты ‘хсæн.
Æрыгæтты ерысты фесгуыхт Дзитойты Артуры хъомылгæнинаг Хъараты Таймураз. 18-аздзыдты карæн спортсменты ерысты Таймураз (55 кг) фæуæлахиз йæ цыппар ныхмæлæууæгыл æмæ бацахста 1-аг бынат.
Хистæр спортсменты ерысты хорз рахæцыд Мæхъиты Кристинæ (+70 кг). Æппæты уæззаудæр уæзы Кристинæ фæуæлахиз йе ‘ртæ ныхмæлæууæгыл æмæ ссис Уæрæсейы чемпионаты уæлахиздзау. Кристинæйы дæр ерыстæм бацæттæ кодта Дзитойты Артур.
Нæ уæлахиздзаутæй уæлдай ма ирыстойнаг спортсментæ рамбылдтой цыппар хæрзиуæджы.
Æвзист майдантæй хорзæхджынгонд æрцыдысты Кокойты Беллæ (æрыгæтты ‘хсæн) æмæ Анастасия Васькова.
Æртыккаг бынæттæ хистæрты ‘хсæн (21 азы онг) бацахстой Фæрниаты Сослан (50 кг) æмæ Гусаты Таймураз (62 кг). Нæ республикæйы иугонд командæйы сæйраг тренер Дзитойты Артур нæ фæсивæды архайд банымадта æнтыстджыныл: — Нæ хъомылгæнинæгтæ ахæм стыр ерысты (архайдтой дзы 850 спортсменæй фылдæр) æхсæз хæрзиуæджы кæй рамбылдтой, уый, æцæгæйдæр, у хорз æнтыстдзинад. Хистæр спортсменты ерысы Мæхъиты Кристинæ сыгъзæрин майдан кæй рамбылдта, уый у уæлдай æхсызгондæр, уымæн æмæ ахæм стыр уæлахизтæ амæй размæ нæ спортсменты къухы бафтыд æрмæстдæр дыууæ хатты. Уæдæ нæ иннæ лæппутæ æмæ чызджытæ дæр сæхи сæрæнæй кæй равдыстой, уый тыххæй конд æрцыдысты Уæрæсейы фæсивæды иугонд командæмæ, æмæ сæхи цæттæ кæндзысты дунеон чемпионатмæ», — загъта Дзитойты Артур.
Футбол. «Спартак» йæхи цæттæ кæны чемпионатмæ
Дзæуджыхъæуы футболон командæ «Спартак» ацы бонты йæхи чемпионатмæ цæттæ кæны Кисловодскы. Æрвылбоны ахуыртæй уæлдай ма спартаковонтæ акодтой цалдæр фæлварæн хъазты Кисловодск æмæ, йæ алфамбылайы горæтты ацы рæстæг йæхи чи цæттæ кæны, уыцы командæтимæ.
Ивгъуыд къуыри дзæуджыхъæуккæгтæ фыццаг уал фембæлдысты Пятигорскы «Машук»-имæ. Командæтæ рауадысты æмдых, хъазт ахицæн 2:2 хыгъдæй. «Спартак»-ы хъазджытæй иу гол бакодта Кобесты Давид, иннæ та «Машук»-ы хызы смидæг ис, спартаковонтæ къуымонæй куы æрбалæвæрдтой пурти, уæд пятигорскаг хъазæгæй фесхъиугæйæ.
«Спартачы» дыккаг ныхмæлæууæг уыди Махачкалайы «Анжи». Кæд «Анжи» абон Уæрæсейы уæлдæр къорды командæты чемпионаты хъазы, уæддæр ацы фембæлды «Спартак» ницæмæй цауддæр уыд. Уый нæ, фæлæ ма спартаковонтæ хъазты райдайæны махачкалайæгты сæ иварон фæзмæ ссонын дæр райдыдтой. Сæ радон бабырстытæй иуæн кæронбæттæн скодта Хуасдзауты Дзамболат. Уый фæцырд, æмæ йæ дæсны цæфы фæстæ пурти «Анжи»-йы хызы стыбар-тыбур кодта. Ахæм уавæримæ махачкалайаг футболисттæ разы нæ уыдысты æмæ сæ архайд фæтыхджындæр кодтой.
Хъазты фыццаг æмбисæн йæ кæронмæ ‘ввахс «Анжи»-йæн бантыст пурти «Спартачы» кулдуары бакъуырын, æмæ командæтæ улæфынмæ ацыдысты 1:1 хыгъдæй. Хъазтæн йæ дыккаг хай рауад ноджы цымыдисагдæр. Дыууæ командæйы дæр архайдтой пурти фылдæр сæхимæ дарыныл æмæ кæрæдзи иварон фæзты агуырдтой фæрæзтæ пурти кулдуа- ры фæмидæг кæнынæн. Иу ахæм ныббырсты фæстæ махачкалайæгтæн бантыст сæ фæнд сæххæст кæнын, æмæ хыгъд ссис 2:1 «Ан- жи»-йы пайдайæн. Спартаковонтæ фæхæрд уæвыныл разы нæ уыдысты æмæ ноджы хъазуатондæрæй бырсын райдыдтой размæ. Махачкалайæгтæ цасдæр рæстæг къæрцхъусæй хъахъхъæдтой сæ кулдуармæ бацæуæнтæ, фæлæ ма хъазты кæронмæ æртæ минуты куы баззад, уæд сæ бон нал баци Кучиты Георгийы цæфæй сæхи бахъахъхъæнын, æмæ пурти «Анжи»-йы кулдуары фæмидæг ис. Хъазт ахицæн 2:2 хыгъдæй.
Кæй зæгъын æй хъæуы, чемпионатмæ цæттæ кæнгæйæ, сæйрагдæр у сбæлвырд кæнын, командæйы хъазджытæй чи цы у, цы пайда æрхæсдзæн, цы бынаты хъаздзæн, уый æмæ æндæртæ. Уæдæ иннæ фарста та вæййы, тренеры амындтытæ футболисттæ куыд æмба- рынц æмæ сæ куыд æххæст кæнынц, уый. Æппæт уыцы футболон хицæндзинæдтыл кусынц нæ командæйы хъазджытæ, сæйраг тренер Гогниты Спартачы разамындæй. Уый йе ‘ххуысгæнджытимæ лæмбынæг æвзарынц, командæйæн пайда чи æрхæсдзæн, уыцы фарстытæ. Уыдонæй иу у, чемпионаты райдайæнмæ командæйы футболистты номхыгъдмæ чи бахаудзæн, уыдон сбæлвырд кæнын. Хъуыддаг ма уый мидæг ис, æмæ чемпионатмæ цæттæгæнæн рæстæг командæимæ сæхи æвдыстой æрыгон футболисттæ. Уыдонæй цалдæр ныридæгæн хаст æрцыдысты «Спартачы» номхыгъдмæ. Зæгъæм, футболуарзджытæ нæ командæйы ранхъыты фендзысты: Багаты Аланы, Бибылты Шотайы, Æрситы Сосланы, Черчесты Иналы, Саулохты Давиды…
Командæйæ ацыдысты: Плиты Никæ, Антон Григорьев æмæ Гæззаты Руслан. «Спартак» ног азы дыккаг къорды командæты чемпионаты йæ фыццаг хъазт акæндзæн 16 мар- тъийы йæхи фæзыл. Нæ командæйы уазæг уы- дзæн «Биолог-Новокубанск».
Уырдæм ма цы рæстæг ис, уым та нæ футболисттæ сæхи цæттæ кæндзысты Кисловодскы æмæ Краснодары крайы поселок Витязевойы.
БАСКАТЫ Уырызмæг
