Сæкæрнизæй рынчынтæн сæ зæрдæтæ куыд хъахъхъæнын хъæуы? Стæй адæймаджы буары иумæйаг æнæниздзинад фидардæр кæнынæн цавæр мадзæлттæ уыдзысты пайдайаг? Ацы æмæ æндæр ахсджиаг медицинон фарстытыл ивгъуыд сабаты æрныхас кодтой, Цæгат Ирыстоны паддзахадон медицинон академийы цы наукон-практикон конференци уыд, уый архайджытæ.
Пресс-службæйы минæвары ныхасмæ гæсгæ, боны фæткы фарстыты фæдыл докладтæ скодтой æмæ специалистты фарстытæн дзуаппытæ радтой конференцийы кадджын уазæг — Эндокринологийы федералон центры дæлбар кусæг, Диабеты институты директоры хæстæ æххæстгæнæг, профессор, медицинон наукæты доктор Гагик Галстян æмæ Медицинон академийы кафедрæйы сæргълæууæг, медицинон наукæты кандидат Туаты Ирмæ.
Конференцийы архайджытæ се ‘ргом аздæхтой, диабетæй рынчынты дзæбæх кæныны хъуыддаджы раззагдæр уæрæсейаг æмæ фæсарæйнаг специалистты къухы цы фæлтæрддзинад бафтыд, уымæ. Куыд загътой, афтæмæй ирыстойнаг дохтыртæн сæ архайды пайдайаг уыдзысты Диабеты институты специалистты амынддзинæдтæ.
