Премьер-министр Тускъаты Таймураз дзы сӕрдариуӕг кодта, афтӕмӕй знон уыд ӕнӕнхъӕлӕджы цаутӕ ма ‘руадзын ӕмӕ сӕрмагонд уавӕрты фӕстиуджытӕ иуварс кӕныны хъӕстыты фӕдыл Хицауадон къамисы радон ӕмбырд.
Къамисы уӕнгтӕ ӕрныхас кодтой, скъолатӕ ӕмӕ скъолайы агъоммӕ хъомылады кусӕндӕттӕ ног ахуыры азы райдайӕнмӕ куыд цӕттӕ сты, стӕй ацы, ӕмӕ иннӕ социалон объектты зынгсирвӕзтӕй ӕдасдзинады мадзӕлттӕ куыд ӕххӕстгонд цӕуынц, ууыл.
Ӕмбырды архайджытӕ куыд фӕнысан кодтой, афтӕмӕй ацы бонты сӕрмагонд къордтӕ райдыдтой бӕрӕг кӕнын ахуырадон кусӕндӕтты цӕттӕдзинад. Цӕстдарӕг оргӕнты минӕвӕрттӕ бӕстон иртасынц техникон ифтонгдзинады, зынгсирвӕзт ӕмӕ террористон фӕзындтытӕй ӕдасдзинады домӕнтӕ ӕххӕст кӕныны къӕпхӕн.
Республикӕйы цы ахуырадон кусӕндӕттӕ ис, уыдонӕй 489 ныридӕгӕн нӕма райстой цӕттӕдзинады паспорттӕ. Уый тыххӕй фехъусын кодта ахуырад ӕмӕ наукӕйы министр Людмилӕ Башарина. Йӕ ныхасмӕ гӕсгӕ, ног ахуыры азмӕ цӕттӕгӕнӕн мадзӕлттӕн дихгонд ӕрцыд 92 милуан сомы бӕрц. Уыцы фӕрӕзтӕй 17 милуаны комкоммӕ схардз кодтой зынгсирвӕзтӕй ӕдасдзинады ифтонггӕрзтыл.
Ацы фарсты фӕдыл раныхас кодта УФ-йы ӕнӕнхъӕлӕджы уавӕрты министрады РЦИ-Аланийы Сӕйраг управленийы хицауы хӕдивӕг Дзанайты Павел дӕр. Куыд фехъусын кодта, афтӕмӕй цӕстдарӕн куыст цӕуы иудадзыгдӕр. Зӕгъӕм, азы райдайӕнӕй нырмӕ ныридӕгӕн управленийы специалисттӕ бабӕрӕг кодтой 126 алыхуызон организацийы. Уыцы рейдты рӕстӕг цы 811 ӕгъдаухӕлды рабӕрӕг кодтой, уыдонӕй абоны онг иуварсгонд ӕрцыд 182, иннӕтыл куыст цӕуы дарддӕр. Административон ӕфхӕрд баййӕфтой 83 адӕймаджы.
Къамисы ӕмбырдӕн хатдзӕгтӕ кӕнгӕйӕ, Тускъайы-фырт куыд фӕнысан кодта, афтӕмӕй хӕстӕгдӕр рӕстӕг ӕппӕт хъарутӕй дӕр бацархайын хъӕуы, цӕмӕй ӕппӕт аиппытӕ дӕр иуварсгонд ӕрцӕуой.
РЦИ-Аланийы Сӕргълӕууӕджы
ӕмӕ Хицауады пресс-службӕ
