Электрон тыхӕн, газӕн, хъарм ӕмӕ уазал донӕн — ацы ӕмӕ ӕндӕр лӕггӕдты фиддонтӕ афойнадыл ӕмӕ ӕххӕстӕй чи фиды, уыдонӕй бирӕтӕ къуырцдзӕвӕнмӕ бахауынц. Нымайӕн прибортӕ куыд амонынц, ӕмӕ ресурстӕй ифтонггӕнӕн организацитӕ цы ӕргътӕ сӕвӕрынц, уыдон алкӕд иухуызон нӕ вӕййынц, закъонмӕ гӕсгӕ нымад не ‘рцӕуынц, ӕмӕ уӕд хъуыддаг хатгай ӕвзарын бахъӕуы тӕрхондоны.
Ахӕм уавӕр цӕмӕн сӕвзӕры, чи у дзуапдӕттӕг, цы арӕзт цӕуы адӕмы удӕнцойдзинадӕн? Ацы ӕмӕ ӕндӕр фарстытӕн дзыллон хабархӕссӕг фӕрӕзты минӕвӕрттӕн дзуаппытӕ лӕвӕрдтой бӕрнон адӕймӕгтӕ.
Баситы Чермен —
РЦИ-Аланийы Цӕрӕнуӕтты-коммуналон хӕдзарады, артаг ӕмӕ энергетикӕйы министрады минӕвар:
— Фӕстаг рӕстӕг нӕм арӕх ӕрбацӕуы хъӕстытӕ адӕмӕй, сӕ коммуналон фиддонтӕ сын раст нӕ банымайынц, ӕнӕзакъонӕй алыг кӕнынц хӕдзармӕ цӕуӕг электрон тыхы телтӕ. Уымӕ гӕсгӕ министрады скодтам кусӕг къамис. Нӕ архайдӕй ныридӕгӕн нӕ бон хатдзӕгтӕ скӕнын у, ӕцӕгӕйдӕр ӕнаххос адӕм ӕфхӕрд ӕрцыдысты. Цӕттӕ стӕм фембӕлынмӕ, уавӕр равзарынмӕ.
Къуымӕриттаты Алан —
РЦИ-Аланийы тарифты регионалон службӕйы разамонӕг:
— Нӕ республикӕйы Хицауады уынаффӕйӕ 2016 азы фидаргонд ӕрцыд службӕйы фӕткӕвӕрд. Цы бартӕ ӕмӕ ныл хӕстӕ сӕвӕрдтой, уымӕ гӕсгӕ цӕст дарӕм, фӕрӕзтӕй ифтонггӕнӕг куыстуӕттӕ цы тарифты ӕргътӕй пайда кӕнынц, уыдонмӕ.
Куыд контролгӕнӕн куыстуат, афтӕ махӕн нӕ хӕс у ӕппӕт куырдиӕттӕм, хъӕстытӕм ӕркӕсын, ныхмӕлӕуджытӕй алкӕимӕ дӕр ӕрныхас кӕнын, раст ӕмӕ бӕлвырд уынаффӕтӕ рахӕссын. Нӕ дуӕрттӕ ӕхгӕд никӕмӕн сты, ӕрбадзурӕн нӕм ис ахӕм телефонӕй: 54-09-47 кӕнӕ та ныффыссын сӕрмагонд сайтмӕ, — зӕгъы Алан. — Йӕ куырдиат нӕм чи ӕрбахӕсса, уый ма ӕвдисӕйнагӕн сӕвӕрӕд ӕппӕт квитанцӕтӕ дӕр.
Рӕмонаты Руслан —
Цӕгат Ирыстоны хӕдзӕртты хицӕутты ӕмбалады (ТСЖ) ассоциацийы разамонӕг:
— Мах, ацы ран ӕхсӕны лӕгтӕ стӕм фӕрӕзтӕй ифтонггӕнӕг организациты ӕмӕ цӕрджыты ‘хсӕн. Арӕх ӕнӕмбӕрстгонд хъуыддӕгтӕ рауайы се ‘хсӕн. Адӕм масты хай бавӕййынц, ӕнӕнхъӕлӕджы сӕ фиддонтӕ ӕгӕр бирӕ рауайынц. Сарӕзтам сӕрмагонд къамис, министрад нӕ фарсмӕ ӕрбалӕууыд. Бӕрӕг кӕнӕм, бирӕфатерон хӕдзӕртты электрон тых куыд ӕмӕ цас хардзгонд цӕуы, уый. Ныридӕгӕн нӕм ис фиппаинӕгтӕ, уайдзӕфтӕ. Аххосӕгтӕ дӕр алыхуызон сты. Зӕгъӕм, нымайӕн прибор раст ӕвӕрд не ‘рцыд, хӕдзары хицӕуттӕ бынаты не сты ӕмӕ ӕндӕртӕ.
Гугкаты Жаннӕ
