Куыд нысангонд цӕуы, афтӕмӕй республикон стадион «Спартачы» рацарӕзты куыстытӕ райдайдзысты 2020 азы ӕмӕ цӕудзысты дыууӕ азы бӕрц. Уый тыххӕй журналисттӕн фехъусын кодта Цӕгат Ирыстоны арӕзтад ӕмӕ архитектурӕйы министр Касаты Таймураз.
«Нӕ зӕрдӕ дарӕм, стадионы рацарӕзт 2020 азы кӕй райдайдзӕн ӕмӕ проект дыууӕ азмӕ ӕххӕстгонд кӕй ӕрцӕудзӕн, ууыл», — фӕнысан кодта Касайы-фырт.
Министры ныхасмӕ гӕсгӕ, «Спартачы» цалцӕджы фӕдыл куырдиат республикӕ балӕвӕрдта федералон центрмӕ. Специалисттӕ куыд зӕгъынц, афтӕмӕй стадионы рацарӕзтӕн бахъӕудзӕн 1,1 миллиард сомы бӕрц. Зындгонд куыд у, афтӕмӕй Цӕгат Ирыстоны Сӕргълӕууӕг Битарты Вячеслав ацы спортивон объекты рацарӕзты фарст сӕвӕрдта федералон хицауады раз. Уӕд хаст ӕрцыд стадионы бындурон цалцӕджы фӕдыл хъӕугӕ проектон-сметон документаци бацӕттӕ кӕныны уынаффӕ.
Стадион «Спартак» арӕзт ӕрцыд 1962 азы, ис дзы 32 мин бадӕн бынатӕй фылдӕр. Ног проектмӕ гӕсгӕ рацарӕзты фӕстӕ стадионы уыдзӕн 15-17 мин бынаты.
