Ног ахуыры азы райдайӕнмӕ, Зонындзинӕдты бонмӕ, зӕрдиагӕй фенхъӕлмӕ кӕсынц скъоладзаутӕ, ахуыргӕнджытӕ, ныййарджытӕ. Уӕлдай ӕнӕрхъӕц вӕййынц, знон дӕр ма ӕнӕмӕтӕй чи хъазыд, ӕмӕ фыццаг къласмӕ чи бацӕудзӕн, уыцы цӕхӕры хуызӕн лӕппутӕ ӕмӕ чызджытӕ. ӕмӕ куыннӕ! Уыдон, скъолайы фарны къӕсӕртыл бахизгӕйӕ, сӕхицӕн байгом кӕндзысты ног дуне — зонындзинӕдты дуне. Уӕдӕ куыннӕ скӕндзысты сӕхицӕн ног лымӕнтӕ, ног хӕлӕрттӕ, фӕлӕ сӕ хуыздӕр хӕлар ӕмӕ ахуыры фӕндагыл ӕмбӕлццон уыдзӕн чиныг, зӕрдӕйы ӕмӕ зонды рухс кӕцӕй исдзысты, уыцы диссӕгты диссаг.
Сывӕллон сывӕллон у, йӕ зӕрдӕ нырма хъазынмӕ ӕхсайдзӕн, фӕлӕ сӕ царды ног къӕпхӕнмӕ кӕй бахиздзысты ӕмӕ сӕ сӕ ахаст аивын кӕй хъӕудзӕн, уый сын хъуамӕ сӕ зонды ныффидар кӕной сӕ ахуыргӕнджытӕ, ныййарджытӕ. Уый та хъуамӕ сӕ бон бауа, уымӕн ӕмӕ, дам, сывӕллон сыгъдӕг фыссӕн гӕххӕттӕй уӕлдай нӕу, цы йыл ныффыссай, уый уыдзӕн.
Цӕгат Ирыстоны ног ахуыры аз партӕтыл ӕрбаддзысты 86 мин скъоладзауӕй фылдӕр. Фаронимӕ абаргӕйӕ, фыццагкъласонты нымӕц фӕфылдӕр. Скъолаты къӕсӕртӕй ӕдӕппӕтӕй бахиздзысты 9 мин фыццагкъласоны. Фарон ацы нымӕц уыд 8808 сывӕллоны.
«Республикӕйы фыццагкъласонты нымӕц фылдӕрӕй-фылдӕр кӕй кӕны, уый ӕхсызгон хъуыддаг у. Нырма кӕронбӕттӕн нымӕцтыл дзурын раджы у, уымӕн ӕмӕ ма сӕ исдзысты 5 сентябрмӕ», — радзырдта Цӕгат Ирыстоны ахуырад ӕмӕ наукӕйы министр Людмилӕ Башарина.
Министр куыд загъта, афтӕмӕй республикӕйы хорз бацӕттӕ кодтой ног ахуыры азмӕ.
«Ацы аз ног ахуыры азмӕ бацӕттӕ кӕныны тыххӕй дихгонд ӕрцыд 92 милуан сомӕй фылдӕр. Уымӕй уӕлдай, скъолатӕ райстой ног ахуыргӕнӕн чингуытӕ. Ахуыргӕнӕндӕтты фӕндӕттӕ ӕххӕстгонд ӕрцыдысты 100 процентӕй», — фӕнысан кодта ахуырады министр.
Цӕгат Ирыстоны скъолаты Зонындзинӕдты боны фӕдыл бӕрӕгбоны линейкӕтӕ уыдзысты 4 сентябры. Зонындзинӕдты бон ӕмӕ ног ахуыры азы райдайӕн уӕдмӕ ахӕссын уыдис Беслӕны фыдбӕллӕхы амӕттӕгты хиуӕттӕ ӕмӕ хӕстӕджыты, ӕхсӕнадон организациты, республикӕйы цӕрджыты фӕндонӕй.
Абайты Эдуард
Къам систа КЪӕБЫСТЫ Харитон
