Тъӕнгты хӕцгӕ низтӕ улӕфӕн оргӕнты низты фӕстӕ дыккаг бынаты сты сывӕллӕттӕ цӕмӕй ӕрбарынчын вӕййынц, ӕппӕт уыцы хӕцгӕ низты ӕхсӕн. Ныртӕккӕ адон сты, тынг парахат кӕмдӕриддӕр. ӕппӕт кары адӕмтӕй та уӕлдай арӕхдӕр рынчын кӕнынц, раздӕр ма тъӕнгты хӕцгӕ низтӕ кӕуыл уыдис, ахӕм сывӕллӕттӕ, ӕмӕ схӕццӕ вӕййынц ӕппӕт цауты 60 процентӕй 65 проценты онг.
Ӕнӕниздзинады дунеон организацийы ӕрмӕджытӕм гӕсгӕ, сӕ кар фондз азӕй уӕлӕмӕ кӕмӕн нӕ вӕййы, ахӕм сывӕллӕтты рынчын кӕныны цаутӕ вӕййынц 1 миллиарды бӕрц. Ома, алы сывӕллон дӕр афӕдзмӕ гуыбыннизӕй фӕрынчын вӕййы 3-4 хатты. Уавӕр уымӕн тӕссаг у, ӕмӕ алы аз дӕр ацы низӕй амӕлы 3 милуан сывӕллоны бӕрц. Сӕ 80 процентыл та дыууӕ азы дӕр нӕ сӕххӕст вӕййы.
Фыццаг миниуджытӕ
Фылдӕр хатт тъӕнгты хӕцгӕ низтӕ сӕ куыст кӕнын райдайынц, гуыбын 30 минуты бӕрц куы фӕриссы, уымӕй. Ахӕм рӕстӕг рынчыны зӕрдӕ хӕссын райдайы, йӕ тӕвд уӕлӕмӕ схизы, ӕрлӕмӕгъ вӕййы, омын ӕм фӕцӕуы. Тъӕнгты хӕцгӕ низты рӕстӕг, уӕлдайдӕр чысыл организмтӕ — сальмонеллезтӕ куы сбирӕ вӕййынц, уӕд гуыбын дон фесты, суткӕ йӕ ӕддӕмӕ цӕуын бахъӕуы 15 хатты бӕрц.
Ӕмӕ рынчынтӕ равдӕлон вӕййынц донхуыз, цъӕх-цъӕхид ӕддӕмӕдзӕуӕнтӕй. Сальмонеллезы рӕстӕг гуыбынниз ахӕссы 5-8 боны, ӕмӕ уый ӕркӕны тъӕнгты хӕцгӕ низтӕм. Гуыбын ӕппӕтӕй дӕр тынг фӕриссы.
Рынчынмӕ ахӕм миниуджытӕ куы фӕзыной, уӕд ӕй ӕвӕстиатӕй фӕхӕццӕ кӕнын хъӕуы клиникон рынчындонмӕ, цӕмӕй йӕ тъӕнгты хӕцгӕ низтӕй сдзӕбӕх кӕной. Сальмонеллез у сывӕллӕтты тӕссаг хӕцгӕ низ. Йӕ аххосӕй кӕд сывӕллон арӕх ӕддӕмӕ цӕуы, йӕ тӕвд бӕрзонд у, уӕд ӕй фенын кӕнын фӕхъӕуы дохтырӕн.
Тъӕнгты низтӕ профилактикӕ кӕнын
Тъӕнгты низтӕ хауынц тӕссаг низты къордмӕ. Сӕ не ‘руадзын бирӕ аразгӕ у санитарон культурӕйӕ. ӕххӕст кӕнын хъӕуы хи гигиенӕйы тӕккӕ хуымӕтӕгдӕр домӕнтӕ.
Уӕ зӕрдыл уын сӕ лӕууын кӕнӕм:
Фыццаг ӕгъдау: хӕринаг кӕныны размӕ уӕ къухтӕ хӕрзӕхсад кӕнут, стӕй хӕрыны размӕ ӕмӕ уазӕгдонмӕ ацӕуыны фӕстӕ дӕр.
Дыккаг ӕгъдау: хӕрыны размӕ халсартӕ, гагадыргътӕ, дыргътӕ ӕхсын хъӕуы кӕлгӕ донӕй, ӕмӕ сыл уый фӕстӕ рауадзын фӕхъӕуы тӕвд дон.
Ӕртыккаг ӕгъдау: рагагъоммӕ фыцын кӕй нӕ фӕхъӕуы, ахӕм хойраджы продукттӕ хъӕуы чъизийӕ хъахъхъӕнын.
Цыппӕрӕм ӕгъдау: цӕрӕнуӕттӕ хъӕуы сыгъдӕг дарын, тох кӕнын хъӕуы бындзыты ныхмӕ. Бырӕтты бедратӕ хъуамӕ уой ӕхгӕд, ӕрвылбон сӕ хъӕуы ӕвдӕлон кӕнын, рӕстӕгӕй-рӕстӕгмӕ та дезинфекци кӕнын.
Фӕндзӕм ӕгъдау: донуадзӕнтӕй цы дон ист не ‘рцыд, уымӕй пайда кӕныны агъоммӕ уый хъӕуы ӕнӕмӕнг рафыцын.
Ӕхсӕзӕм ӕгъдау: ахсӕны-тъӕнгты низты фыццаг миниуджыты рӕстӕг — гуыбын куы рисса, зӕрдӕ куы хӕсса, омын куы цӕуа, лӕмӕгъ уӕвгӕйӕ ӕмӕ арӕх ӕддӕмӕ цӕуын куы хъӕуа, уӕд ӕвӕстиатӕй фӕдзурын хъӕуы дохтырмӕ. Цас раздӕр райдайат низ дзӕбӕх кӕнын, уыйас ӕдасдӕр уыдзӕн рынчыны ӕмӕ, йӕ алыварс чи ис, уыдоны ӕнӕниздзинад.
Ӕвдӕм ӕгъдау: хи дзӕбӕх кӕныныл ма архайут.
Ацы ӕгъдӕуттӕ ӕххӕст кӕнгӕйӕ, уӕ бон бауыдзӕн тъӕнгты хӕцгӕ низтӕй уӕхи бахъахъхъӕнын ӕмӕ ӕнӕниздӕр уыдзыстут.
Нӕ фӕдзӕхстытӕм байхъусут!
Беслехъоты Ирӕ,
дохтыр
