Ацы азы кӕронмӕ национ проекты фӕрцы республикӕйы цы объекттӕ арӕзт цӕуы, уыдон срӕвдз уыдзысты. Уый тыххӕй Дзӕуджыхъӕу, Рахизфарсы, Кировы ӕмӕ Ӕрӕфы районтӕ бабӕрӕг кӕнгӕйӕ, йӕ хъуыдытӕ загъта РЦИ-Аланийы Хицауады Сӕрдар Тускъаты Таймураз. Уый бынӕтты федта арӕзтӕдтӕ, равзӕрста куыстытӕ куыд цӕуынц, уый, хатдзӕгтӕ скодта аразджыты архайдӕй, бахаста фӕндӕттӕ.
Хицауады Сӕрдар куыд бафиппайдта, афтӕмӕй ахсджиаг у ӕмгъуыдтӕ сӕххӕст кӕнын. «Бынӕттон хиуынаффӕйады оргӕнтӕ, куыстытӕ чи фӕдзӕхсы ӕмӕ аразӕг организацитӕн хъуамӕ уа хорз ӕмгуыстад, уый фӕрцы хъуыддӕгтӕ бантыстдзысты. Нӕ республикӕйы цӕрджытӕн тынг ахсджиаг у рӕвдауӕндӕтты сабитӕн бынӕттӕ саразыны фарст. Национ проект «Демографи»-йы фӕрцы уый нӕ къухы бафтдзӕн», — загъта Тускъайы-фырт.
Зӕгъӕм, Дзӕуджыхъӕуы Павленкойы уынджы рӕвдауӕндоны ис аст къорды. Барбашовы уынджы рӕвдауӕндоны та — 12 къорды, уыцы кусӕндӕттӕм ма бафтаудзысты уӕлӕмхасӕн бӕстыхӕйттӕ 55 бынатӕн. Кусӕг балцы рӕстӕг ма Хицауады Сӕрдар, иннӕ бӕрнон адӕймӕгтӕ се ‘ргом аздӕхто, 18-ӕм микрорайоны цы ног скъола арӕзт цӕуы, уымӕ дӕр.
Бирӕ ахсджиаг социалон объекттӕ арӕзт цӕуы Беслӕны, Джызӕлы, Кӕрдзыны, Елхоты, Змейкӕйы, Ног Урухы, Хӕзныдоны: рӕвдауӕндӕттӕм, скъолатӕм уӕлӕмхасӕн бӕстыхӕйттӕ, гом спортивон комплекстӕ, ахсджиаг фӕндаг Дзӕуджыхъӕуӕй Мӕздӕгмӕ — бындур ын сӕвӕрдтой Бӕтӕхъойыхъӕуы цурӕй ӕмӕ ӕндӕртӕ. Фӕстагмӕ ма ӕрӕфы районы федтой, Урухы доны сӕрты Хӕзныдоны хъӕуы цур цы хид аразынц, уый. Ног арӕзт хидӕн йӕ дӕргъ — 108 метры, йӕ уӕрх — 11 метры, уыдзӕн дзы фистӕгцӕуджытӕн къахвӕндӕгтӕ дӕр. Хид рӕхджы байгом уыдзӕн.
РЦИ-Аланийы Сӕргълӕууӕджы
ӕмӕ Хицауады пресс-службӕ
